44
Egutu mas Israel jens xiklyis
Egutu mau Migdol, Tapanhe, Memphi wus jens yahge hauh mau, mautyi pheh nyeis dah Israel jens dvnganh yah sen lha Yhensain ngos lyis jis. Maukhung Jesphung Yhensain, Israel Mangso taiq: Ngos Yerusalem yahge gohtoeu Yuda wus jens dvnganh mas she los dah dyoqbis cho lhyi nvnyang nyvng goeus. Gvshih yangh dvdyoq gyoh joq shih, houmha hank eq ma nyeis. Khasoeh ge lyis nyamoq dah dius jens gas ma gis zis kuot las ngos lyis nhaiqyo nhang. Nyamoq gas nyamoq eq, namoq eq ma seq, namoq dah phauh thyeih moq khanhamp eq ma paiq ku dah gohtoeu mangso jens lyis lomhxangh phudyei zis yah phuqsoe. Ngos ngah jyeidwis lvpe jens lyis namoq jyank mas tsoq nhang. Nyamoq gas namoq lyis hai ngos hoeng dah gyukphoh zis ma kuot das xiklyis taiq. Nghuot laus eq namoq ma gyo, ma kamp gyo. Namoq gohtoeu mangso lhyi phudyei dah ma gis zis kuot cho lhyi ma tyamp. Housoeh las ngah nhaiqyo cho yahge nhaiqlom dyis zis Yuda wus jens yahge Yerusalem talhoeu mas huot khyoq las nyi ngheq kat. Khvnyhik nghuot joq vgus, hauh zis dyoq gyoh las gyukphoh zis bweh joq.
Housoeh las ngos, Maukhung Jesphung Yhensain, Israel Mangso nyei: Namoq nyang chamus houteh ma gis zis kuot goh? Namoq vbusbih, vmesbih, loshang jens, lonoeuh jens thoq mas hank ma nyet lo shoq dyoqbis cho she kat mes goh lhyeh? Namoq los nyeis, hai Egutu mas phvra lyis paiq zis yah eq gohtoeu mangso lhyi phudyei zis yah eq chamus ngos lyis nhaiqyo nhang goh? Namoq haih zis kuot zis gas namoq nyang gungs lyis dvmhont nyeis las nyeisjvng thoq dius nyau dvnganh gas namoq lyis jwangh das, namoq dah nyings lyis nhoengh yvmas yhung das zis nghuot lhyeh? Yuda wus jens mas eq Yerusalem cho mha eq namoq dah phauh thyeih moq, Yuda hwankti jens yahge nyamoq dah yhensain nyhiq jens, namoq yahge namoq dah yhensain nyhiq jens gvng mas lhung cho bweh lai loh goeus yvlyis tohnyhik goeus lhyeh? 10 Namoq gas khvnyhik jweh shoq ehnyet nyhen mha ma gyoh, ngos lyis nyoqnho ngelang ma dyei nghuot ya ngos namoq yahge namoq dah phauh thyeih moq lyis dyei dah lyi khyvlyis kang ma dwis.
11 Housoeh las, ngos, Maukhung Jesphung Yhensain, Israel Mangso ka namoq yah tyi lha Yuda jens dvnganh lyis mhont das. 12 Egutu mas e nyeis das ge nghamh thyet dah Yuda nyet shih bang xiklyis gas, ngos nyamoq dyoqbis zis nyvng das. Nyamoq ngislo kuhlo dvnganh Egutu mau mas jes mas, phanghkhauq yah shei das. Nyamoq gas gyukphoh zis bweh das jwangh gus duot das, nyamoq dah nyings yhung lha nhoengh das. 13 Ngos Yerusalem lyis jeszan, phanghkhauq, yomh yah joeng teh, Egutu mau mas nyeis bang lyis joeng das. 14 Egutu mau mas e nyeis, nyet shih Yuda jens gas dvyuk eq ma doeng das nghuot ya ma phang luiq das. Yuda mau mas doms los nyeis mes bang dvyuk eq ma xauh tauh los das, jesphang bang dvtsiq mas lai las hank eq ma tauh los das.
15 Nyamoq dah yhensain nyhiq jens gohtoeu mangso lhyi lomhxangh lainh zis seq dah yukgis jens dvnganh yahge houmha yap joq dah vmesbih jens dvnganh, Egutu mautyi pheh dah Israel jens bos dah moqphung zainsmuh ngos lyis taiq. 16 Nvng ngamoq lyis Yhensain nyings mas taiq zis ngamoq ma gyo. 17 Ngamoq kuot das oen taiq zis dvnganh kuot das. Ngamoq phauh thyeih moq, ngamoq hwankti jens, zau jens, Yuda wus jens yahge Yerusalem talhoeu mha kuot ku vgus, ngamoq maukhung hwankti nyih gywes nyhiq lyis lomhxangh lainh las zvbiq jyungshuk huot das. Housoeh lyis ngamoq zonoms nyoshoq yoh; nyeisgis cho yoh las yau cho ma bos zis nyvng. 18 Ngamoq Maukhung hwankti nyih lyis lomhxangh ma lainh lo, zvbiq jyungshuk ma huot lo las ngamoq cha ma yoh lo. Ngamoq dius jens jes mas shei, phanghkhauq yah shei loh.
19 Vmesbih jens taiq shih, Ngamoq Maukhung hwankti nyih teh dah ohlhyoq zwvng piq lyis, nyang lyis lomhxangh lainh las zvbiq jyungshuk huot. Hau ngamoq kuot yvlyis ngamoq dah yhensain phoq jens eq bos xihhonh, ge.
20 Ngos gas, ngos lyis phuk taiq bang vbusbih, vmesbih, dius jens dvnganh lyis heisoeh taiq. 21 Namoq yahge namoq dah phauh thyeih moq, namoq hwankti jens, namoq zau jens, hauh mau mas bang Yuda wus jens yahge Yerusalem talhoeu mha lomhxangh lainh dah cho namoq nghamh lyis Yhensain ma seq das, nghuot ya tohnyhik hah das oen lhyeh? 22 Khvnyhik jweh shoq namoq mau gas dyoq gyoh joq las houmha hank ma nyeis. Houka namoq dah lhung cho yahge ma gis zis kuot cho lhyi Yhensain ma yoh thoq jhen lo gvng mas, hauh yvlyis gyukphoh joqyos, dius jens nhoengh yvmas yhung nyings bweh tyamp. 23 Namoq gohtoeu mangso jens lyis lomhxangh lainh, Yhensain tyingtoh dang dvnganh lyis domsyos ma gyo zis yah Yhensain lhyi tyi dah yaunos kuot yvmvyah, hai dyoqbis zainsmuh namoq thoq mas jweh los, ge. 24 Ngos dius jens dvnganh, zes las vmesbih jens lyis taiq, Egutu mas nyeis dah Yuda jens lyis Maukhung Jesphung Yhensain, Israel dah Mangso heisoeh ge: 25 Namoq eq, namoq dah yhensain nyhiq jens eq, Maukhung hwankti nyhih lyis dangthoengh toh. Nyang lyis lomhxangh lainh dyei das, zvbiq jyungshuk huot dyei ge dangthoengh toh las kuot dyei. Svsoh gis, housoeh namoq dah dangthoengh chank, nyhen toh vgus kuot dyei. 26 Nghuot laus eq gvshih ngos, Yhensain ngah yomzains nyings mas Egutu mas nyeis dah Israel jens dvnganh lyis nyhen toh zis gyo geh. Namoq hank lyis eq ngah nyings yhung lha, Yomzains Yhensain nyang nyeis zis yah dvyhangteh, oen ngos khanhamp eq mau ma doms khi nhang lo das. 27 Nyeisgis cho ma nghuot, dyoqbis cho lhyi ngos nyvng das. Namoq dvyuk eq ma nyet lo shoq jes mas, nghuot ya yomh yah dvnganh shei das. 28 Nghuot laus eq namoq hau shei cho mhayah dvtsiq phang luiq das las Egutu masyah Yuda mau mas tauh los das. Housoeh hau doeng los bang gas ngah dang jus lah, nyamoq dang jus lah zis seq das. 29 Ngos, Yhensain haih joqyos mas, namoq lyis joeng las, namoq thoq mas dyoqbis cho she los das oen dangthoengh toh zis bweh los dah kanghjyoeng chixoeuq das. 30 Ngos Yuda hwankti Zedekia lyis nyah kang lhyi xo dah jes ge, Babilon hwankti Nebukhaneza loq mas kyauh teh, Egutu hwankti Hopra sat mes dah nyah jes lyis nyah loq mas kyauh das, ge.Ref 44.30: 2Hw 25.1-7