4
Nhaiqlom Thaiq aq
Yhensain taiq: Israel dius jens eh, namoq tauh mes lyis ngah jyank mas tauh los geh. Namoq ngos lyis lomluk lyis ngos hoeng dah phvra lyis yoeus tyamp geh. Ngah nyings mas maukhi das zis gas namoq xiklyis jus das. Housoeh lyis dius nyau jens dvnganh gas nyamoq lyis shvmanh dyei aq ge ngos lyis sang das, nyamoq ngos lyis chungh das.
Yhensain ka Yuda jens yahge Yerusalem bang lyis taiq: Namoq dah danh hwangh phuk geh. Zoeu gyomh mas jyo vkhyoq goh.Ref 4.3: Hos 10.12 Yuda jens yahge Yerusalem bang eh, namoq dah ehnyet nhaiqlom lyis vthyoh tyomh las namoq dah gungs Yhensain lhyi kyauh geh. Namoq ma kuot lyis namoq ma gis zis kuot goeus gvng mas ngah nhaiqyo cho ka nyi soeh ngeh das. Hauh zis ngeh lyis hank eq ma yoh sat shoq ngeh das.
Nyhenh Wvng das ge Kyuk
Dvmau gonh lvbuh muot geh,
than than kaiq geh.
Jesdvp bos wus mas phang geh oen
Yuda yahge Yerusalem bang lyis taiq kyoh geh.
Zion loh cho shet geh!
Gau joqyos pheh phang geh, vsheq nyeis lo goh!
Yhensain ka mautsung pheh yah dyoqbis zainsmuh,
dyoqbis cho she los nyeis.
Dius nyau jens dah thyoqpi soeu ka
khangkhyi ka nyang tamh joqyos masyah los nyeis teh thuq los goeus.
Nyang gas Yuda lyis thyoqpi das zis los.
Yuda wus jens gas dyoq gyoh joq, houmha hank eq ma nyeis das.
Housoeh las yanghthung tsungh las kuk ngaus geh:
khasoeh ge lyis Yhensain dah gyukphoh nhaiqyo cho ka
Yuda jyank masyah ma tauh loh.
 
Yhensain taiq, Hauh nyeih lyis hwankti jens yahge zau jens gas womh cho ma bos lo das. Phudyei bang gas nhaiq chuot las lvpe bang eq mauh das, ge.
10 Hauh thang lhyi ngos taiq zis gas, Yomzains Yhensain eh, nvng Yerusalem bang lyis mhuih goeus. Nvng taiq lyis houmha nyenstap zis joq das, ge laus eq moengsa ka nyamoq dah khyung-kang mha yings toh.
11 Yerusalem bang lyis toeuq las taiq das shishenh jweh los. Ngeh dah lyeis gas sihyos masyah nyamoq jyank mas muot los das. Houka phihsan dvmuot tangh dah lyeis jyamh ma nghuot. 12  Yhensain dah vmingh yah los dah lyeis gas hauh thoq lyis svsoh zes than. Hauh zis gas nyah dius jens lyis soetuon cho taiq nyeis soeu Yhensain nyang dvnghuot.
Yuda lyis Jeswus Lhaink toh
13 Yoeuh aq, jeswus gas jyommauh teh jweh los. Nyamoq dah jeslhyingh gas lyeislhain teh, nyamoq dah nyang jens gas zons thoq lyis nyap. Ngamoq kha iq gyuk chank bos, ngamoq dyoq gyoh goeus.
14 Yerusalem eh, nah nhaiqlom masyah ma gis zis cheih tyamp aq, housoeh lyis nvng khyuot yoeus zis xauh mvbeh. Yaunos cho lhyi khanyhank jweh shoq nghamh nyeis shih das lah?
15 Dan wus yahge Ephraim jing masyah loeuskyoh bang ka loeus gang kyoh kat. 16 Nyamoq gas dius nyau jens lyis los zaih nhang zis yahge Yerusalem lyis, we mau masyah jeswus los nyeis goeus cho los taiq. Haih jeswus gas Yuda wus jens lyis tyi lha kaiq das. 17 Nyamoq gas Yerusalem lyis yos zungh bang teh lhaink toh das. Khasoeh ge lyis nyah dius jens gas Yhensain lhyi tyi lha gomloeus toq. Yhensain taiq goeus.
18 Yuda eh, haih zis gas nvng kang dwis cho yahge nvng kuot cho yah nah jyank mas nvnyang dvshe los. Hai khamzo cho ka nah yaunos gvng mas nghuot. Houka nah sainh mas thauh kyank dyei.
Yeremia Nhaiqkuk
19 Nos, nos ma yoh kham lo
ngah nhaiqlom mas sainh guk thungh!
Ngos samlo ma yoh nyeis;
ngos lvbuh thwe yahge jeszan hoeu thwe xauhgyo.
20 Dyoqbis zainsmuh dvkoeuq thang lhyi dvkoeuq chank los:
dvmau gonh dyoq gyoh joq.
Ngamoq zvng gas nyetlos nyettant dyoqbis goeus,
hauh gosseh eq vchingh chingh juiq goeus.
21 Jeszan hoeu zis lyis ngos khanyhank jweh shoq yoeuh chah lah?
Lvbuh muot thwe khanyhank jweh shoq gyo das lah?
22  Yhensain taiq,
Ngah dius jens gas koh;
nyamoq ngos lyis ma seq.
Nyamoq gas koh dah loshang jens teh nghuot las seqgyo cho ma bos.
Nyamoq gas ma gis zis kuot das yvmas lyes laus eq
gis zis kuot das yvmas seq cho nain.
Dyoqbis cho Nyoqnyvng
23 Ngos nyeisjvng lyis yoeuh lyis,
houka cha ma joq vzwvng vkhyoq ma bos,
maukhung mha eq bvng zis ma joq.
24 Ngos boms jens lyis yoeuh lyis houka tsain nvn nyeis,
jing jens eq thyipheh heipheh ngot nyeis.
25 Ngos houmha dius ma nyvng,
nghoq yangh dang dyuk goeus.
26 Nyeis coeu bos dah mau gas sihyos duot goeus.
Yhensain dah gyukphoh nhaiqyo cho gvng mas
nyah wus jens dyoq gyoh joq.
27 Nyeisjvng gonh jyamhjyuklhyuk nghuot das ge, Yhensain taiq goeus laus eq, nyang dvnganh ma mhont das.
28 Nyeisjvng gas kuk das,
maukhung eq soeng soeng noq das.
Hauh cho Yhensain taiq goeus las
nyah ehnyet ma thaiq lo das.
Nyang nghamh thyet goeus zis
ma auhuiq lo das.
29 Nyang ji bang yahge lyei chi bang dah thwe gvng mas
yuk khanghmuh phang loh das.
Dvyhamh mhanhdyvp pheh phang loh das.
Gohyhamh gas luk-uk thoq mas tsain doq loh das.
Wus khanghmuh vkom toh khoq las
houmha hank ma doms nyeis lo das.
30 Yerusalem eh, nvng dyoqbis goeus.
Nvng nes zis chamus wuot?
Nvng chamus phauhdap ngwis xing yah shunk,
nah nyoqjeih lyis chamus cauh?
Nvng nvnyang gungs lyis yungh shoq kuot zis chah vkyuh ma bos.
Nah hwank changh jens gas nvng lyis peq tyamp las,
nvng lyis sat mes.
31 Vmesbih lo khoeu nos nos teh dah thwe,
loxeih khoeu dah vmesbih kaiq ngaus teh dah thwe dvkoeuq ngos xauhgyo.
Houka Yerusalem wus soq she thank bah ge
nyah loq lvm las taiq zis gas,
Ngos dyoqbis goeus!
Nyamoq ngos lyis sat das zis los nyeis, ge.