37
Zedekia Yeremia lyi Sang
Babilon hwankti Nebukhaneza gas Yehoiakim lo hwankti Yehoiakhin dah joqyos mas Yosia lo Zedekia lyis Yuda hwankti toh.Ref 37.1: 2Hw 24.17; 2Ss 36.10 Nghuot laus eq Zedekia yahge nyah zau jens, dius jens hank eq Yhensain ngos lyis dyei dah loeus lyis domsyos ma gyo.
Hwankti Zedekia gas Shelemia lo Yehukha yahge Maseia lo phudyei Zephania lyis ngah jyank mas nhang lha, Ngamoq dius nyau gungsthaiq Yhensain, ngamoq Mangso lhyi bos dung dyei aq ge taiq nhang kat. Ngos thung ma gyoh shih, dius jens mas e los kuot nyeis shih. Babilon jesphung ka Yerusalem lyis lhaink toh, nghuot laus eq nyamoq gas, Egutu jesphung Egutu maukyo lai los ge xauhgyo lyis, Yerusalem masyah jik loh.
Hauh thang lhyi Yhensain, Israel Mangso ngos lyis taiq, Zedekia lyis taiq aq, Egutu jesphung ka nvng lyis pangh das ge cho mha nghuot goeus. Nghuot laus eq nyamoq nyang dah Egutu pheh tauh loh das. Hauh thang lhyi Babilon bang doms los las hauh wus lyis zan yoeus das, hauh yvlyis nyi ngheq tyamp das. Ngos, Yhensain namoq lyis, Babilon bang ma doms los lo das oen nghamh zis yah namoq nyang gungs lyis vmhuih goh, nyamoq los nyang los das, oen zaih nhang. 10 Namoq Babilon jesphung gonh lyis ung lha nyamoq mas dvmdap bang kyingh nyamoq zvng mas dvnyet lo laus eq nyamoq toq las wus lyis nyi ngheq das.
Yeremia lyis Nyhik, Thung kat
11 Babilon jesphung Yerusalem masyah jik loh: khasoeh ge lyis Egutu jesphung jweh los nyeis. 12 Housoeh las ngos gas Benyamin mau mas ngah yhenbang zisyos mas ngos sain gvmboms yoeus das zis Yerusalem masyah thuq loh. 13 Nghuot laus eq ngos Benyamin khomh mas jweh lyis, Shelemia lo, Hanania nyeilo Iriya ge, houmha zungh bang jeslo jens dah vgyis gas ngos lyis tomp las taiq. Nvng Babilon jens jyank pheh phang loh, ge.
14 Ngos toeuh zis gas, Housoeh ma nghuot, ngos ma phang, oen. Nghuot laus eq Iriya gas ngah dang ma gyo dyei. Hauh gungsthaiq ngos lyis zau jens jyank nyhik shwih loh. 15 Zau jens eq nhaiqgis yo zis yah ngos lyis bat lho lha lhaih soeu Yonathan yhen mha lhunk toh. Hauh yhen lhyi nyamoq thung kuot toh. 16 Ngos lyis nyeis khau khyung mha kat las nyangh nyangh lo lhunk toh.
17 Thang lhyi hwankti Zedekia gas ngos lyis khi nhang lha, nyah hwankti yhen mha ngos lyis gauh nyei zis gas, Yhensain jyank masyah dang vbos lah, ge.
Ngos gas, Bos oen lha taiq lhungh zis gas, Nvng Babilon hwankti loq mas kyauh zis xauh das. 18 Hauh thang lhyi ngos nyei, Nvng ngos lyis thung khyoq shoq ngos nvng lyis, nah zau jens lyis, haih dius jens lyis tyi lha cha cu? 19 Babilon hwankti ka nvng lyis, nah mau lyis ma los zan das ge pe dyei dah nah lvpe jens cha mus loh goeus? 20 Gvshih shoenkkhyi bos hwankti eh, ngos nvng lyis shangphu dang gyo yoeus dyei las ngos dung zis jenh kuot dyei aq. Ngos lyis Yonathan yhen thung mha vdoms jenh nhang lo. Nhang lhyi ka ngos houmha jyoengh shei das, ge.
21 Housoeh las hwankti Zedekia ka ngos lyis hwankti yhen khyam khau mha lhunk toh das xiklyis vmingh dyei. Ngos houmha nyeis las ohlhyoq piq bang jyank masyah hauh wus mas dah ohlhyoq dvnganh thank shoq dvnyeih dvkoeuq dyei zis xauh.