29
Yeremia Maussauh
1 Nebukhaneza Yerusalem masyah Babilon pheh shwih jons loh dah phudyei bang, lvpe jens, dius jens dah uhshe bang yahge dius jens dvnganh lyis ngos maussauh lhaih.Ref 29.1-2: 2Hw 24.12-16; 2Ss 36.10
2 Hwankti Yehoiakhin, nyah ungwes, hwankti yhen mha dah zau jens, Yuda mau yahge Yerusalem mas dah uhshe bang, ngwis shonh bang yahge loqmuh dap bang shwih jons loh thang lhyi lhaih.
3 Ngos haih maussauh, Yuda hwankti Zedekia, Babilon hwankti Nebukhaneza jyank mas nhang kat xauh bang, Shaphan lo Elasa yahge Hikia lo Gemaria moq lyis yah huon kat. Houmha taiq zis gas,
4 Maukhung Jesphung Yhensain, Israel Mangso ka nyang Nebukhaneza lyis Yerusalem masyah Babilon pheh shwih jons loh nhang lha jonsdoeus loh bang dvnganh lyis, heisoeh ge:
5 Houmha yhen kuot las khyei khyoq nyeis geh, khyam tsungh las houmha yuk zis zo geh.
6 Nyihwank las lo bos geh, namoq lo jens lyis nyihwank nhang geh, housoeh nyamoq eq loshang bos das. Nyamoq houmha nyoshoq jebais los chah, ma gis yoms loh.
7 Ngos namoq lyis jonsdoeus nhang dah wus dah gis cho kuot geh, nyamoq gungsthaiq ngos lyis shvmanh dung geh, khasoeh ge lyis nyamoq nyeisgis lyis namoq eq nyeisgis das.
8 Ngos Yhensain, Israel Mangso namoq lyis zaih nhang: Namoq mas dah lvpe jens nghuot ya botthyet bang yah namoq lyis vmhuih nhang goh, nyamoq moq dah yhetmoq lyis vgyo goh.
9 Nyamoq gas ngah nyings mas tsain hwah taiq. Ngos nyamoq lyis ma nhang. Ngos Maukhung Jesphung Yhensain taiq goeus.
10 Yhensain taiq: Babilon dah yomsoq nyhetci zvn lai lyis ngos namoq yah sen cho chixoeuq das las ngah dangthoengh chank las ngos namoq lyis yhen mha shwih tauh los das.Ref 29.10: 2Ss 36.21; Yer 25.11; Dan 9.2
11 Ngos namoq xiklyis nghamh toeuq cho bos zis ngos kyingh dvseq. Nyeisgis yaplhoq cho she los das nghamh toeuq cho nghuot, dyoqbis zainsmuh she los das cho ma nghuot. Thang pheh namoq nghamhloms cho she los das dah nghamh toeuq cho nghuot.
12 Namoq ngos lyis lui das. Namoq ngah jyank mas shvmanh los dung das las ngos namoq lyis toeuh dyei das.
13 Namoq ngos lyis xo das. Namoq ngos lyis ehnyet nhaiqlom dvnganh yah xo lhyi nyvng das.Ref 29.13: Lyi 4.29
14 Nghuot goeus, namoq ngos lyis nyvng das oen taiq. Ngos namoq mau lyis doms toeu das. Ngos namoq lyis sanh tyamp dah mau yahge joqyos khanghmuh masyah tsainh das. Ngos namoq lyis jons loh nhang dah mau masyah shwih tauh los das. Ngos, Yhensain, taiq goeus.
15 Namoq taiq lyis Yhensain ka, Babilon mas namoq lyis lvpe jens dyei, ge.
16 Dawi guon khoq dah munghdan lyis guon dah hwankti cho yahge namoq yah dvgeh jons ma doeus loh, namoq dah sainhchangh jens, haih wus mas nyeis bang dah cho Yhensain cha taiq zis gyo geh.
17 Maukhung Jesphung Yhensain taiq, Ngos nyamoq thoq mas moeng dyoq cho, phanghkhauq, yomh she los. Ngos nyamoq lyis nyo bop las ma yoh zo lo dah maiphang shih teh kuot das.
18 Ngos nyamoq lyis moeng dyoq zis, phanghkhauq, yomh yah chank khat das las mungkvn mas dius nyau dvnganh gas nyamoq cha nyvng yvlyis gyukphoh nghuot das. Ngos nyamoq lyis dvkhauyah sanh tyamp las dius jens gas nyamoq cha bweh yvlyis gyuk dvn das. Dius jens nyamoq lyis yisnaus toeuq las, nyamoq dah nyings yhung lha nhoengh das. das.
19 Nyamoq mas haih zis bweh das: khasoeh ge lyis ngos nyamoq lyis hauh loeus ngah jyeidwis lvpe jens lyis yah tsoq huon nyeis laus eq nyamoq ngah domsyos ma gyo. Nyamoq gyo yoeus das zis ngoek.
20 Ngos Babilon pheh jons loh nhang zis xauh bang dvnganhmoq eh, ngos Yhensain cha taiq yvlyis gyo geh.
21 Maukhung Jesphung Yhensain, Israel Mangso ka Kolaia lo Ahab yahge Maseia lo Zedekia cho taiq. Nyah aiq yuk gas nyah nyings mas namoq lyis hwah pe. Yhensain taiq zis gas, Nyang hau aiq yuk lyis Babilon hwankti Nebukhaneza yomsoq mas kyauh tyamp las nyang gas hau aiq yuk lyis namoq nyoqjeih mas sat das.
22 Yerusalem masyah Babilon pheh jonsdoeus loh bang dvyuk yuk lyis nhoengh.mes lyis, nyamoq taiq zis gas, Yhensain nvng lyis Babilon hwankti ka Zedekia yahge Ahab lyis nyi mas kank sat teh kuot bas jungh, ge.
23 Heika nyamoq dah uhpui loqkyoq nghuot das, khasoeh ge lyis nyamoq mas gyukphoh yaunos bos, nyamoq gas nyi shuot, thang lhyi Yhensain nyings yoeus las hwah taiq. Heika Yhensain dah ehnyet yah tyi zis nghuot: nyang gas nyamoq cha kuot goeus yvlyis seq. Nyang gas nyamoq yah tyi dah kanghjyoeng nghuot,note 29.23 Nyang nyamoq kuot yvlyis nyvng. ge Yhensain taiq goeus.
Shemaia dah Maussauh
24-25 Maukhung Jesphung Yhensain, Israel Mangso ka ngos lyis Nehelam dius Shemaia xiklyis loeus dyei. Nyang gas nyah nyings mas Yerusalem dius jens dvnganh, Maseia lo phudyei Zephania yahge gohtoeu phudyei bang dvnganh lyis maussauh huon. Haih maussauh mas Shemaia gas Zephania lyis lhaih.
26 Yhensain ka nvng lyis phudyei Yehoiada joqyos mas phudyei soeu kuot nhang. Nvng gvshih Yhenmuh mas zau nghuot. Lvpe guons kuot dah huonh soeu khanghmuh lyis yoeuh las lainzain mas thyeq khwank yah kyomh kyomh toh das zis nah yvwons nghuot.
27 Dius jens lyis lvpe khyvlyis taiq nyeis dah Anathot dius Yeremia lyis housoeh chamus ma kuot?
28 Nyang no chah: khasoeh ge lyis nyang gas Babilon mas jonsdoeus loh bang lyis hauh zis nyangh das las yhen tsuk las houmha khyei khyoq geh, khyam tsungh las houmha yuk zis zo geh, ge taiq.
29 Hauh maussauh Zephania ngos lyis nghap kyoh.
30 Hauh thang lhyi Yhensain ngos lyis taiq zis gas,
31-32 Hai Nehelam mas Shemaia dah loeus lyis Babilon pheh jons loh bang dvnganh lyis taiq kat aq. Ngos Yhensain, Shemaia yahge nyah vnyau vshih dvnganh lyis joeng das. Ngos nyang lyis ma nhang, nghuot laus eq nyang gas namoq lyis lvpe dvyuk teh taiq las namoq lyis hwah lomsjingh nhang. Namoq mas nyah vnyau vshih ma bos das. Nyang ngos lyis tyi lha gomloeus toq das zis ngah dius jens lyis taiq yvmvyah ngos ngah dius jens lyis kuot dyei das dah gis cho lhyi nyang ma xauh nyvng das. Ngos, Yhensain taiq goeus.