28
Yeremia, Lvpe Hanania
Hauh vzvn, Zedekia hwankti guon zis nyei vzvn, oeng vkhyvp lyis, Gibeon mas dah Azur lo lvpe Hanania gas Yhenmuh mas phudyei bang yahge dius jens nyeis yvmas ngos lyis taiq.Ref 28.1: 2Hw 24.18-20; 2Ss 36.11-13 Maukhung Jesphung Yhensain, Israel Mangso taiq: Ngos Babilon hwankti dah yomsoq lyis khyauh goeus. Hwankti Nebukhaneza Babilon pheh yoeus loh dah Yhenmuh zisyos dvnganh lyis aiq zvn gyo lyis ngos haih joqyos mas doms chi tauh los das. Babilon pheh shwih jons loh dah Yuda hwankti Yehoiakim lo Yehoiakhin yah dvgeh Yuda dius jens dvnganh lyis eq shwih tauh los das. Nghuot goeus, ngos Babilon hwankti dah yomsoq lyis khyauh das. Ngos Yhensain taiq goeus ge, ge.
Hauh thang lhyi phudyei bang yahge Yhenmuh mas yap joq bang dvnganh dah xikkhonh mas ngos lvpe Hanania lyis taiq. Mauhphoh nghuot! Ngos, Yhensain haih zis kuot dyei das oen nghamhloms. Nyang nvng pe cho bweh los nhang lha Yhenmuh mas dah zisyos yahge shwih jons loh bang dvnganh Babilon masyah shwih tauh los das oen svsoh nghamhloms. Nghuot laus eq ngos nvng yahge dius jens lyis cha taiq zis gyo geh. Nah shishenh, ngah shishenh dah xik pheh, gohlhain dah lvpe jens gas dius nyau nyoshoq yahge yomsoq bos dah munghdan jens mas moeng dyoq zis, phanghkhauq, yahge noslom jweh los das ge pe toh. Lvpe dvyuk, Nyenstap cho bos das ge pe mvbeh, hau nyang pe dang bweh los lyis nyang gas Yhensain nhang dah lvpe jyoengh nghuot cho yoh seq los das, ge.
10 Housoeh Hanania gas ngah lainzain mas dah tanzoe lyis yoeus las kying kyop khyauh tyamp. 11 Hanania dius jens dvnganh xikkhonh mas taiq, Yhensain taiq, Heika dius nyau dvnganh dah lainzain mas hwankti Nebukhaneza kih dyei dah tanzoe lyis khasoeh khyauh das cho nghuot. Nyang aiq zvn gyo lyis kuot das, ge. Hauh thang lhyi ngos thuq loh.
12 Dvyoq nyangh thang lhyi Yhensain ngos lyis taiq. 13 Hanania lyis loh taiq aq. Yhensain heisoeh ge: Nvng saiq tanzoe yoh khyauh das laus eq nyang thyeq tanzoe doms toh das. 14 Maukhung Jesphung Yhensain, Israel Mangso taiq, Nyang haih dius nyau jens lyis thyeq tanzoe kih dyei las nyamoq gas Babilon hwankti Nebukhaneza lyis phuqsoe das. Yhensain taiq: Yewus jens lyis yangh Nebukhaneza lyis phuqsoe nhang das.
15 Hauh thang lhyi ngos Hanania lyis haih zis puk taiq. Hanania eh, gyo aq. Yhensain nvng lyis ma nhang, nvng gas haih dius jens lyis loms bas jungh ge hwah nyeis. 16 Housoeh las Yhensain nyang heisoeh ge: ngos nvng lyis nyeisjvng thoq masyah shung tyamp das. Nvng dius jens lyis Yhensain dah cho gomloeus dang taiq yvmvyah nvng khvzvn ma thank lyis shei das, ge.
17 Housoeh las Hanania gas hauh zvn, nyhet vkhyvp lyis shei.