27
Yeremia Tanzoe Dvng
1 Zedekia lo Yosia Yuda hwankti bweh los thang lhyi ma nyangh lyis Yhensain ngos lyis taiq.Ref 27.1: 2Hw 24.18-20; 2Ss 36.11-13
2 Ngvnyang saiq yah tanzoe kuot las shohyeis twih yah ngah lainzain mas tap toh nhang.
3 Hauh thang lhyi Yhensain ngos lyis taiq: Yerusalem wus, Yuda hwankti Zedekia yah los xauhgoh khoq dah lvgyo jens lyis yah Edom, Moab, Amon, Taire yahge Sidon hwankti jens lyis loeus kyoh kat aq.
4 Maukhung Jesphung Yhensain, Israel Mangso ngos lyis taiq, Yhensain taiq zis nyamoq dah hwankti jens lyis taiq geh oen vmingh dyei aq, ge.
5 Ngah yomsoq zainsmuh yahge yom yah ngos mungkvn lyis eq, cangsoeu dius lyis eq, nyeisjvng thoq mas nyeis dah gaunyhauq dvnganh lyis eq gvnkhanh toh: hauh yvlyis ngos khyen soeu hank lyis laus eq dyei.
6 Ngos gas haih dius nyau dvnganh lyis, ngah jyeidwis Babilon hwankti Nebukhaneza dah yomsoq o mha toh soeu nghuot. Yewus jens lyis yangh nyang lyis phuqsoe das zis kuot toh.
7 Housoeh las Babilon gyoh dah shishenh jweh shoq dius nyau dvnganh gas Nebukhaneza yahge nyah lo jens nyei jens lyis phuqsoe das. Hauh thang lhyi nyah dius nyau jens gas, yomsoq bos dah dius nyau jens yahge hwankti zainsmuh jens lyis phuqsoe das.
8 Babilon hwankti Nebukhaneza lyis ma phuqsoe, nyah lyi mas ma wvng dah dius nyau, munghdan lyis gas ngos moeng zan cho, phanghkhauq gyoh, noslom yah Nebukhaneza dvnganh dye mhont shoq joeng das.
9 Namoq lvpe jens, yhetmoq moq bang, gyuis wvng bang, mandan muot bang teh jweh los das cho uhlhomh taiq zis vgyo goh. Nyamoq dvnganh gas nvng lyis, Babilon hwankti lhyi ma phuqsoe das cho taiq das.
10 Nyamoq gas, namoq lyis mhuih zis yah namoq dah mau masyah we mau pheh shwih loh nhang. Ngos namoq lyis khat thuq tyamp las dyoqbis das.
11 Nghuot laus eq Babilon hwankti dah omha gyoh las nyang lyis phuqsoe dah vnyau lyis gas, ngos nyamoq nyang mau mas nyeis nhang lha nyamoq gas houmha xauh zwi zo nyeis das. Ngos Yhensain taiq goeus.
12 Ngos hai dvyhangteh dang Yuda hwankti Zedekia lyis taiq. Babilon hwankti omha gyoh aq. Nyang yahge nyah dius jens lyis phuqsoe lha namoq kang dwis nyeis das.
13 Nvng yahge nah dius jens chamus moeng zan yvmas, phanghkhauq mas, noslom mas shei das lah? Heika Yhensain taiq toh las Babilon hwankti omha ma gyoh dah dius nyau mas bweh das.
14 Namoq gas nyang lyis ma kyauh noh ge taiq dah lvpe jens dang lyis vgyo goh. Nyamoq gas namoq lyis dvmhuih nyeis.
15 Yhensain nyang taiq goeus, Nyang nyamoq lyis ma nhang zis nyamoq gas nyah nyings mas namoq lyis hwah nyeis. Housoeh las nyang namoq lyis khat thuq das, namoq eq namoq lyis hai hwah taiq dah lvpe jens eq sat zis xauh das.
16 Hauh thang lhyi ngos phudyei bang yahge Yhensain taiq goeus dah dius jens lyis taiq. Ma nyangh lyis Babilon masyah Yhenmuh zisyos chi tauh los das ge dah lvpe jens lyis vgyo goh. Nyamoq gas namoq lyis hwah nyeis.
17 Nyamoq dang lyis vgyo goh. Babilon hwankti omha gyoh geh, namoq kang dwis das. Chamus haih wus dyoq gyoh joq das?
18 Nyamoq lvpe jyoengh nghuot lyis, nyamoq ngah loeus yoh lyis gas, ngos Maukhung Jesphung Yhensain lhyi nyei bas jungh. Yhenmuh mas, hwankti yhen mha nyet shih dah zisyos lyis Babilon pheh ma yoeus loh das xiklyis nyei bas jungh.
19-20 Hwankti Nebukhaneza gas Yehoiakim lo Yuda hwankti Yehoiakhin, Yuda mau yahge Yerusalem mas dah uhshe bang lyis Yerusalem masyah Babilon pheh shwih jons loh uhlyis, nyang zains jens, thunk thomh, gyamh jens yahge gohtoeu Yhenmuh zisyos dvkhamh nyhet toh khoq.
21 Ngos Maukhung Jesphung Yhensain, Israel Mangso Yhenmuh mas, Yerusalem mas dah Yuda hwankti yhen mha nyet dah zisyos cho cha taiq yvlyis gyo geh.
22 Hauh zis Babilon pheh yoeus loh das las ngos loh yoeus shoq houmha joq das. Hauh thang lhyi ngos doms yoeus los das las haih joqyos mas toh das. Ngos Yhensain, taiq goeus.