26
Yeremia Soetuon jang mas
1 Yosia lo, Yehoiakim Yuda hwankti bweh los zis ma nyangh lyis,Ref 26.1: 2Hw 23.36—24.6; 2Ss 36.5-7
2 Yhensain ngos lyis taiq: Yhensain dah Yhenmuh khyam mha yap las, ngos nvng lyis taiq dah tying dang dvnganh Yhensain dah Yhenmuh mas paiq das ge los dah Yuda wus jens mas bang dvnganh lyis taiq hoeuh aq. Cha eq vnyhet toh.
3 Dius jens gyo das las nyamoq dah lhung cho lhyi toh tyamp mvbeh. Nyamoq tyamp lyis gas, nyamoq dah lhung cho dvnganh gvng mas ngos nyamoq thoq mas she los das oen toeuq dah thyoqpi cho ngah ehnyet thaiq das.
4 Yhensain ngos lyis dius jens lyis taiq aq, ge. Ngos Yhensain namoq lyis dyei dah jyauh cho lhyi chank zis yah ngah domsyos gyo chah, oen taiq goeus.
5 Ngos namoq jyank mas tsoq nhang nyeis dah ngah jyeidwis lvpe jens dah dang kamp gyo zis yah ngah domsyos gyo chah, oen taiq goeus. Namoq khanhamp eq nyamoq taiq dang ma gyo.
6 Namoq tsoq las domsyos ma gyo lyis, ngos haih Yhenmuh lyis, Shilo lyis kuot teh kuot das. Mungkvn dius nyau dvnganh gas haih wus dah nyings yhung lha nhoengh das.Ref 26.6: Yosh 18.1; Chd 78.60; Yer 7.12-14
7 Ngos haih cho Yhenmuh mas taiq nyeis yvlyis phudyei bang, lvpe jens yahge dius jens dvnganh xauhgyo.
8 Yhensain ngos lyis taiq aq ge vmingh dyei zis dvnganh dye taiq yah dvyih nyamoq ngos lyis dap nyhik las tsain kaiq. Nvng haih nyhenshang sat zis xauh chah!
9 Haih Yhenmuh gas Shilo teh duot das, haih wus gas dyoqbis las houmha hank eq ma nyeis das oen Yhensain nyings mas chamus taiq, ge dius jens gas ngos lyis los tsain lhaink toh.
10 Chamus loh yvlyis Yuda uhshe bang xauhgyo lyis, nyamoq gas hwankti yhen mhayah Yhenmuh mas lvnyap los las, Khyam Khomh Saiq mas joqyos tsain yoeus.
11 Hauh uhlyis phudyei bang yahge lvpe jens, Uhshe bang yahge dius jens lyis taiq zis gas, Haih soeu ka shei das zaudang khyoq das zis mon: khasoeh ge lyis nyang gas yah wugungs lyis tyi lha taiq goeus. Namoq nyang no yah xauhgyo goeus, ge.
12 Hauh thang lhyi ngos taiq zis gas, Haih Yhenmuh yahge haih wus lyis tyi lha taiq zis dvnganh namoq xauhgyo goeus. Hauh zis Yhensain ngos lyis loh taiq hoeuh nhang.
13 Namoq kang dwis nyeis cho yahge namoq kuot nyeis cho lhyi thaiq las Yhensain, namoq dah Mangso domsyos gyo chah. Namoq nyah domsyos gyo lyis gas, nyang namoq thoq mas dyoqbis cho she los das ge cho ehnyet thaiq das.
14 Ngah xiklyis gas, ngos namoq dah yomsoq khau mha nghuot. Ngos lyis namoq nghamh lyis lyi bos, jus ge khyvlyis kuot geh.
15 Nghuot laus eq haih zis soh soh mus geh! Namoq ngos lyis sat lyis gas, namoq yahge haih wus mas nyeis bang gas tswi ma bos soeu lhyi sat dah yobos bos das: khasoeh ge lyis Yhensain ka haih zaih nhang dang namoq lyis los taiq kyoh nhang.
16 Housoeh las uhshe bang yahge dius jens gas, phudyei bang yahge lvpe jens lyis taiq. Haih soeu ka Yhensain, yah Mangso dah nyings yoeus las yang lyis taiq goeus, nyang lyis ma gis sat, ge.
17 Hauh thang lhyi logis jens dvyhamh toq las, houmha huom joq bang lyis taiq zis gas,
18 Yuda hwankti Hezekia zaih lyis Moreshet dius lvpe Mikha ka, Maukhung Jesphung Yhensain heisoeh ge, taiq goeus, ge dius jens dvnganh lyis taiq.Ref 26.18: Mik 3.12
Zion ka yos phuk teh phuk zis xauh das,
Yerusalem gas dyoq gyoh boms joq das.
Yhenmuh jing eq saiq khyam bweh das, ge.
19 Hwankti Hezekia yahge Yuda dius jens gas Mikha lyis ma sat. Hauh gungsthaiq Hezekia gas Yhensain lhyi nyoqnho ngelang dyei las Yhensain dah nyoqzons doeus zis xauh. Housoeh Yhensain ka nyamoq thoq mas dyoqbis zainsmuh she los das ge taiq toh cho ehnyet thaiq tyamp. Yang Yeremia lyis nos nhang lhyi yah thoq mas gyukphoh dyoqbis zainsmuh yvnyang she kat das, ge.
20 Gohtoeu dvyuk gas Kiriat Yearim mas dah Shemia lo Uria gas Yeremia teh Yhensain nyings yoeus las haih wus yahge dius nyau lyis tyi lha taiq ku.
21 Hwankti Yehoiakim, nyah jeslo jens yahge nyah zau jens Uria taiq zis xauhgyo lyis, hwankti ka nyang lyis sat mes. Hauh cho Uria xauhgyo lyis nyang gyuk las Egutu pheh phang luiq loh.
22 Nghuot laus eq hwankti Yehoiakim ka Uria lyis nyhik das zis Akbor lo Elnathan yah dvgeh gohtoeu dius dvyhamh lyis Egutu mas nhang kat.
23 Nyamoq gas Uria lyis Egutu masyah hwankti Yehoiakim jyank mas shwih los. Hwankti ka nyang lyis sat las mvng lyis shohjyen bang lop mas tyamp toh.
24 Nghuot laus eq Shaphan lo Ahikam ka ngos lyis pangh gvng mas, Ngos gas sat das xiklyis dius jens lyis kyauh zis ma xauh.