18
Auh Shonh Soeu Yhen mha
1 Mangso ngos lyis taiq:
2 Nvng auh shonh soeu yhen mha gyoh e aq, houmha ngos nvng lyis ngah loeus dyei das, ge.
3 Housoeh las ngos houmha gyoh e lhyi auh shonh soeu ka nyah auh shonh zwvng mas muh zwi nyeis yvlyis nyvng.
4 Nyang shonh dah tsoh auh dvkoeuq shop shop ma mus khanghmuh, nyang hau tsohnyhon yoeus las gohtoeu dvja doms kuot.
5 Hauh uhlyis Yhensain ngos lyis taiq:
6 Israel dius jens eh, ngos namoq lyis hai auh shonh soeu kuot teh kuot das toeuh ma yoh lhyeh? Tsohnyhon ka auh shonh soeu loq mas bos teh, namoq gas ngah loq mas bos.
7 Khanhamp laus eq ngos dius dvnyau, munghdan dvkoeuq lyis nuot tyamp das, thyoq khyoq, mhont das oen taiq.
8 Nghuot laus eq hauh dius nyau gas ma gis cho mhayah tauh los lyis ngos nyamoq lyis kuot das oen taiq zis ma kuot lo das.
9 Gohtoeu dvshishenh lyis dius dvnyau nyau, munghdan dvkoeuq lyis toeutsung lha doengs nhang das, oen taiq toh.
10 Nghuot laus eq hauh dius nyau gas ngah domsyos ma gyo, ma gis zis kuot lyis gas ngos kuot das oen taiq toh zis ma kuot das.
11 Housoeh las gvshih Yuda jens yahge Yerusalem bang lyis taiq aq. Ngos nyamoq lyis tyi dah nghamh toeuq cho kuot las nyamoq lyis joeng das zis cicont nghuot. Yaunos kuot dah kang dwis cho no toh geh. Nyamoq dah cho yahge nyamoq kuot nyeis yvlyis thaiq geh, oen taiq aq.
12 Nyamoq phuk taiq das zis gas, Ma nghuot, ngamoq chamus thaiq chah? Ngamoq dvnganh gas ngamoq nhaiqlom than zis yah dvyhangteh, ngamoq nyang bweh nhang mes khyvlyis ma gis zis kuot das.
Dius jens Yhensain lhyi Peq
13 Yhensain taiq:
Houteh cho xikpheh bweh ku lah oen
dius nyau khanghmuh lyis nyei geh.
Israel jens gas gyukphoh cho kuot goeus!
14 Lebanon boms mas dah luktyoq nyhang mha gyu ma joq mus lhyeh?
Hauh boms mas dah jeisjyamh lvng kyuk loh lhyeh?
15 Nghuot laus eq ngah dius jens gas ngos lyis tohnyhik goeus,
nyamoq phvra lyis xangh ngheq dyei.
Nyamoq loh chah cho mha khyeiuh thungh.
Nyamoq cho cauh ma chank lo;
nyamoq ma suh ku dah chokhyoh chank loh.
16 Nyamoq gas haih mau lyis gyukphoh kuot las
vcaiq vto diusngis gyoh nhang.
Houcho suh lai bang dvnganh nyamoq nyvng yvlyis dvn las
mauh zis yah uh tsain tyi.
17 Buisthuq lyeis gas tsohmop lyis muot lhank teh
ngos ngah dius jens lyis nyamoq dah jeswus xikkhonh mas sanh tyo tyamp das.
Ngos nyamoq lyis nungs phuk das;
dyoqbis zainsmuh los lyis ngos nyamoq lyis ma pangh das, ge.
Yeremia lyis Lhom
18 Hauh thang lhyi nyamoq taiq zis gas, Yeremia lyis dvja kuot goh! Yang lyis choshet das zis phudyei bang vjangh nyeis. Joeui bos soeu ka yang lyis joeui dyei, dangcoq bang gas Mangso dah loeus taiq hoeuh. Yang nyang yah tyi lha tsuk cho kuot las nyang taiq zis ma gyo dyei lo goh, ge.
19 Housoeh las ngos shvmanh dung. Yhensain eh, ngos taiq zis xauhgyo dyei aq. Ngah jeswus jens ngah cho taiq yvlyis gyo dyei aq.
20 Gis cho nyhenshang ma gis zis nghuot lhyeh? Nghuot laus eq nyamoq gas ngos gyoh das zis ngah xiklyis dwang tsain doeu goeus. Ngos gas nvng nhaiqyo zis yah nyamoq lyis ma kuot bas jungh oen, nah jyank mas los las, nyamoq gungsthaiq khasoeh taiq zis soh aq.
21 Nghuot laus eq Yhensain eh, gvshih nyamoq lo jens lyis yuot shei nhang aq. Nyamoq lyis jes mas shei nhang aq. Nyamoq dah vmesbih jens, nyamoq dah yhensain phoq jens yahge lo jens chithyuk bas jungh. Nyamoq dah vbusbih jens noslom yah shei lha loyvm jens gas jes mas sat zis xauh bas jungh.
22 Nyamoq dah yhen mha thyoq das zis dius phung nyetlos nyettant nhang aq. Nyamoq gyuk dvn zis yah kaiq ngaus nhang aq. Nyamoq ngos lyis gyoh bas jungh ge dwang doeu; ngos lyis nyhik das zis lhyik tsain thung.
23 Nghuot laus eq Yhensain eh, nyamoq ngos lyis sat das khaujeini cho dvnganh nvng seq. Nyamoq dah ma gis cho lhyi vkhyuot dyei, nyamoq yaunos lyis vkhyuot dyei. Nvng nhaiqyo nyeis uhlyis nyamoq lyis somh yvmas doeuh khyoq aq, nyamoq lyis zwi aq.