13
Misyhwiq dyichih Yikhyoh
1 Yhensain ngos lyis Misyhwiq dyichih loh wis las chih toh aq, - nyang ngos lyis, Hauh zis jeis mas vkat, ge.
2 Housoeh las ngos hauh zis wis las tsain chih toh.
3 Hauh thang lhyi Yhensain ngos lyis doms jis las taiq,
4 Nvng Uphrat lvng mas loh las hauh dyichih lukjyvp mas kat shung toh aq, ge.
5 Housoeh ngos hauh zis Uphrat lvng nvm lukjyvp mas loh shung toh.
6 Dvyoq nyangh thang lhyi Yhensain ngos lyis Uphrat lvng mas doms loh las hau dyichih yoeus los nhang.
7 Housoeh ngos Uphrat lvng mas doms loh las, ngos dyichih shung toh joqyos xo nyvng lyis, hauh dyichih gas yom goeus, cha eq ma gis lo zis nyvng.
8 Hauh thang lhyi Yhensain ngos lyis doms jis las taiq,
9 Heika ngos Yuda dah khwank cho, Yerusalem dah khwank cho zainsmuh lyis khasoeh mhont das cho nghuot.
10 Hai ma gis dah dius jens gas ngah domsyos gyo das zis ngoek. Vkhang vgus nhaiqlom than zis yahge lhung lha gohtoeu mangso jens lyis paiq phuqsoe goeus. Housoeh las nyamoq gas hai ma gis lo dah dyichih teh bweh das.
11 Dyichih gas thyikdom mas toek toek chih toh teh, Israel yahge Yuda dius jens gas ngos lyis toek toek lang toh nhang mes. Ngos heisoeh kuot zis gas, nyamoq gas ngah dius jens bweh las ngah nyings lyis chungh cho, nyoqnho ngelang dyei cho she los das xiklyis nghuot, nghuot laus eq nyamoq ngah domsyos ma gyo.
Zvbiq Jywang
12 Yhensain Mangso ngos lyis taiq: Yeremia eh, Israel dius jens lyis zvbiq jywang khanghmuh mas zvbiq yah tyink chah, oen taiq aq. Nyamoq gas nvng lyis, Zvbiq jywang khanghmuh zvbiq tyink chah zis ngamoq seq, ge phuk taiq das.
13 Nvng nyamoq lyis taiq aq, Ngos, Yhensain haih mau mas nyeis bang lyis nyamoq yet shoq zvbiq yah tyink das. Dawi dah vnyau vshih hwankti jens, phudyei bang, lvpe jens yahge Yerusalem mas nyeis bang dvnganh lyis yet nhang das.
14 Ngos nyamoq lyis jywang nyang changh thungh thyi teh kuh bang ngis bang lyis dvyhangteh thungh thyi das. Ngos nyamoq lyis shoh ma nos, nhaiq eq ma nyen, shoh ma gyo lo sat das.
Khwank las Jonsdoeus das
15 Israel dius jens eh, Yhensain taiq goeus.
Ehnyet nyhen mha gyoh las nyang lyis kamp gyo geh.
16 Yhensain, nah Mangso
mau ma chuot nhang shih,
boms mas nah khyeiuh ma thungh shih,
nvng nghamhloms nyeis dah bvng zis soeng soeng noq yvpheh ma lhaiq kat shih lyis
nyang lyis nyoqnho ngelang dyei aq.
17 Namoq ma gyo lyis gas,
namoq khwank cho gvng mas ngos gauh ngaus das.
Yhensain dah dius jens jonsdoeus loh gvng mas ngos svsoh ngaus das las
ngah nyoqdyeis yaus gyoh das.
18 Yhensain ngos lyis taiq, Hwankti yahge nyah ungwes lyis hwankti tank masyah tsain gyoh los geh oen taiq aq. Khasoeh ge lyis yungh dah nyamoq buismuk gas nyamoq dah uhloms masyah gyoh goeus.
19 Yuda mautyi pheh dah wus jens lyis tsain lhaink toh. Hank eq nyamoq masyah ma yoh lai loh. Yuda jens dvnganh jonsdoeus loh goeus.
20 Yerusalem eh, yoeuh aq! Nah jeswus gas mautsung pheh yah los nyeis. Nvng lyis loqzamh zwi das xiklyis kyauh toh zis xauh bang khalhye loh goeus? Nah dius jens, namoq nyo khwank.
21 Nvng nah dyenschangh ge nghamh toh bang nvng lyis ung tyamp las nah thoq mas guon lyis nvng cha taiq das lah? Nvng gas lokhoeu nos nos dah vmesbih teh nos das.
22 Nvng mas haih dvnganh chamus bweh au? Nah dyimis chamus juiq au? Nah gungs lyis laih wangh zis chamus xauh au, ge nyei lyis, Houka nah yaunos gas svsoh gyukphoh gvng mas nghuot.
23 Dius gas nyamoq shohyeis vwot yoh thaiq lah? Lutyoeuh eq nyah yeis kywank yoh yoeus tyamp lah? Nyamoq yoh kuot lyis gas ma gis zis kyingh kuot bang, jus zis yoh kuot xuq das.
24 Yhensain ka namoq lyis, sihyos lyeis yah huhyau muot tangh teh, sanh tyo tyamp das.
25 Nyang taiq goeus, Heika nah uhpui loq kyoq nghuot das. Haih zis gas nyang nvng lyis kuot das ge nghamh thyet goeus. Khasoeh ge lyis nvng nyang lyis tohnyhik las ma jus dah mangso jens lyis loms goeus.
26 Yhensain nyang nah dyimis shang tyamp dyei las dede xoqphuh nhang das.
27 Nyang hoeng zis nvng kuot nyeis yvlyis nyvng goeus. Dius dvyuk nyah yhenkyoh dah yhensain nyhiq lyis nyetnau teh, nyang lus gas nyang zains thang mha chank teh, nvng jing thoq mas, boms mau mas phvra mangso thang mha chank loh yvlyis nyang nyvng goeus. Yerusalem bang eh, namoq gas mvtanhzoe nghuot. Nvng khanyhank jweh shoq ma lhoq mus nyeis das lah?