11
Yeremia yahge Thanghchvp
1 Yhensain ngos lyis taiq:
2 Hai thanghchvp dang gyo aq. Yuda jens yahge Yerusalem mas bang lyis taiq kyoh aq.
3 Ngos, Yhensain, Israel dah Mangso ka: haih Thanghchvp dang lyis domsyos ma gyo soeu khanghmuh thoq mas nhoengh zis toh.
4 Houka ngos nyamoq dah phauh thyeih moq yah, nyamoq xiklyis ngeh dah nyikhyomp teh nghuot dah Egutu mau masyah shwih thuq los uhlyis, kuot toh dah thanghchvp nghuot. Ngos nyamoq lyis, ngah domsyos gyo geh, ngos tying toh zis dvnganh kuot geh oen taiq toh. Ngos nyamoq lyis taiq zis gas, Nyamoq domsyos gyo lyis gas, nyamoq ngah dius duot las ngos gas nyamoq dah Mangso duot das, oen.
5 Housoeh lyis gvshih nyamoq yoh toh, nyeis coeu bos las dis dah mau ngos nyamoq lyis dyei das oen nyamoq dah phauh thyeih moq yah toh dah dangthoengh doengs nhang das, ge.
Ngos gas, Yhensain eh, bweh bas jungh, oen.
6 Hauh thang lhyi Yhensain ngos lyis taiq, Yuda wus jens yahge Yerusalem talhoeu mha loh aq. Houmha ngah loeus taiq hoeuh aq. Thanghchvp dang dvnganh gyo las chank kuot geh oen dius jens lyis taiq aq.
7 Ngos nyamoq dah phauh thyeih moq lyis Egutu masyah shwih los uhlyis ngah domsyos gyo geh oen gvgis zaih nhang goeus. Khvnyhik jweh shoq eq ngos dius jens lyis tsoq zaih nhang.
8 Nghuot laus eq nyamoq ma kamp gyo, domsyos ma gyo, hauh gungsthaiq yuk khanghmuh nhaiqlom than khyvlyis vjangh kuot nyeis dah ma gis cho dvtsoq kuot loh. Ngos nyamoq lyis hau thanghchvp chank das xiklyis tying toh laus eq nyamoq ngoek. Housoeh las ngos nyamoq thoq mas hau taiq toh dah joeng cho dvnganh she los.
9 Tsai, Yhensain ngos lyis taiq, Yuda jens yahge Yerusalem mas bang gas ngos lyis tyi lha khaujei tsain ni.
10 Ngos taiq yvlyis chank das zis ngoek dah nyamoq phauh thyeih moq dah yaunos doms tauh kuot loh. Nyamoq gohtoeu mangso jens lyis paiq loh. Ngos nyamoq phauh thyeih moq yah toh dah thanghchvp lyis Israel yahge Yuda aiq yuk yah thyoq tyamp goeus.
11 Housoeh las gvshih ngos Yhensain, nyamoq thoq mas dyoqbis cho she kat das las nyamoq phang ma luiq das oen zaih nhang. Nyamoq ngos lyis pangh aq ge ngaus lyis ngos nyamoq lyis ma gyo dyei das.
12 Hauh uhlyis Yuda jens yahge Yerusalem bang gas nyamoq xangh ngheq dyei ku dah mangso jens lyis pangh aq ge loh kaiq das. Nghuot laus eq hau dyoqbis cho los lyis nyamoq ma thyeh khyuot yoeus das.
13 Yuda jens gas nyamoq wus nyo nyhoq mangso jens eq nyo joq. Yerusalem mas nyeis bang eq wus mas talhoeu nyo nyhoq vchoqh vlhauq Bala mangso lhyi phudyei das phon tsain toh.
14 Yeremia eh, haih dius jens xiklyis ngos lyis shvmanh vdung, vkhyoeuq. Nyamoq yaukyenh las pangh aq ge ngos lyis lui lyis, ma gyo dyei das.
15 Yhensain taiq, Ngos jyet dah dius jens gas ma gis zis kuot. Ngah Yhenmuh mas nyamoq chah toeuh yoh? Nyamoq dyoqbis zainsmuh lyis dangthoenghnote 11.15 Dangthoengh ge zis Hebre mas gas Nyoshoq, ge toh. toh zis yahge gaunyhauq jyungshuk phudyei zis yah yoh gos toh das ge nghamh lhyeh? Hauh zis nyamoq lyis pyo nhang das lhyeh?
16 Ngos nyamoq lyis nyaus yungh las gis dah vshih yah dyingh dah tsanlun zains oen lui ku. Nghuot laus eq gvshih gas maujau jau teh kaiq zis yah ngos hauh vhuq lyis nyi ngheq las nyah vko lhyi khyauh das.
17 Maukhung Jesphung Yhensain ka Israel yahge Yuda lyis tsungh toh. Nghuot laus eq gvshih gas ngos nyamoq lyis dyoqbis zainsmuh yah kyuk tant. Nyamoq kuot cu yvmvyah haih zis nyamoq mas nyamoq nyang she los. Nyamoq gas Bala lyis jyungshuk phudyei zis yah ngos lyis nhaiqyo nhang.
Yeremia Kang lhyi lhaink
18 Ngah jeswus ngos lyis tyi lha lhaink cho Yhensain ngos lyis taiq kyoh.
19 Ngos gas, sat das xiklyis she loh dah noeuh nhamp yvnglo teh nghuot. Nyamoq ngos lyis tyi lha ma gis cho nghamh toeuq zis ngos ma seq. Nyamoq taiq zis gas, Saiqzains yangh shih lyis zains eq shih eq mhont goh, nyang lyis sat goh, housoeh lyis nyang lyis hank ma soh los das.
20 Hauh thang lhyi ngos dung zis gas, Maukhung Jesphung Yhensain eh, nvng gas dan dah soetuon soeu nghuot. Nvng gas dius dah nghamh cho yahge sohseq cho lhyi shi yoeuh. Ngos ngah cho lhyi nah loq khau mha toh. Housoeh las ngos lyis nvng haih dius jens lyis lvto phuk yvlyis zungh yoeuh nhang aq.
21 Anathot dius jens gas ngos lyis sat mes las nyamoq ngos lyis taiq zis gas, ngos Yhensain dah loeus tsoq taiq hoeuh nyeis shih lyis gas nyamoq ngos lyis sat das, ge.
22 Housoeh las Maukhung Jesphung Yhensain taiq, Ngos nyamoq lyis joeng das! Nyamoq dah loyvm jens jes mas sat zis xauh das. Nyamoq dah loshang jens yuot shei das.
23 Ngos Anathot jens thoq mas dyoqbis zainsmuh she los das shishenh toh. Hauh shishenh jweh lyis hank eq ma doeng das, ge.