3
Dius nyau lyis Soetuon das
Yhensain taiq,
Hauh uhlyis ngos Yuda mau yahge
Yerusalem wus dah nyeisgis yaplhoq cho lhyi doms toeu dyei das.
Ngos dius nyau jens dvnganh lyis tsainh las
Soetuon cho Langhkhau mha shwih los das:
nyamoq ngah dius jens lyis kuot goeus cho gvng mas
Ngos houmha nyamoq lyis soetuon das.
Nyamoq gas Israel jens lyis
lvbaus mau mas sanh tyamp las
ngah mau Israel lyis kangh tyamp.
Nyamoq gas jonsdoeus bang
hank yoh oeng zis doeugoh zis yah tsain thyet.
Nyamoq gas nghe nyhiq phauh yahge
zvbiq xiklyis nyelo yukgis lo jens lyis jons tsain ungh.
 
Taire, Sidon yahge Philisti mau dvnganh mas bang eh, namoq ngos lyis cha kuot bah oen? Namoq ngos lyis lvto phuk bah oen lah? Namoq phuk nghuot lyis, ngos namoq lyis lvnyap tauh dyei das.Ref 3.4-8: Esa 14.29-31, 23.1-18; Jer 47.1-7; Ezk 25.15—28.26; Amo 1.6-10; Zep 2.4-7; Zek 9.1-7; Mat 11.21-22; Luk 10.13-14 Namoq ngah ngwis xing yoeus, ngah phauhdap zisyos lyis namoq dah yhenmuh jens mas tsain wuq toh. Namoq gas Yuda yahge Yerusalem dius jens lyis nyamoq mau yah we mau mas shwih loh las Greek jens jyank mas ungh. Gvshih ngos nyamoq lyis namoq ungh toh joqyos masyah shwih thuq los das. Namoq nyamoq lyis kuot goeus zis ngos namoq lyis kuot das. Ngos namoq dah loloeu lonyi jens lyis Yuda dius jens jyank mas ung nhang lha; nyamoq gas nyamoq lyis we dah Sabean jens jyank mas ungh das. Ngos Yhensain taiq goeus.
 
Haih hoeuh cho dius nyau jens mas taiq kyoh geh.
Moeng zan das xiklyis sont las,
jes thoeuqzoe jens lyis lui geh:
nah jeslo jens dvnganh tsainh las jens loh geh.
10 Namoq khont-suh lyis moengsa,Ref 3.10: Esa 2.4; Mik 4.3
banlyenh lyis lham bat geh;
yomnhuk soeu yangh zan chah.
11 Vyvm vwi mas nyeis dius nyau jens dvnganh eh,
langhkhau mha lvnyapnote 3.11 Lvnyap ge zis Hebre mas Pangh aq, ge. los zop geh.
Yhensain eh, nah jesphung gyoh los nhang lha nyamoq lyis zan aq!
 
12 Dius nyau jens gas cicont kuot las
Soetuon Langhkhau mha los chah.
Houmha ngos Yhensain ka tsung lha
vyvm vwi mas nyeis dah dius nyau jens dvnganh lyis soetuon das.
13 Nyamoq gas svsoh lhung.Ref 3.13: Nyoq 14.14-16, 19-20, 19.15
Jyo yhomh nyos lyis
guk yet teh zan khyoq geh;
nyamoq lyis zvbiq dyingh dah
nyhetzwvng mas zvbiq shank shoq
nyhet teh thungh thyi geh.
 
14 Hau Soetuon Langhkhau mha
Yhensain dah buisnyeis jweh los bah ge goeus las
dius mons mons tsain nyeis.
15 Buislom lhamhmuh chuot tyamp las
kyi eq ma bvng lo.
Mangso shvmanh das
16  Yhensain ka Zion boms masyah kaiq lasRef 3.16: Amo 1.2
nyah thwe ka Yerusalem masyah maujau soeh jau das;
maukhung yahge nyeisjvng nonh das.
Nghuot laus eq nyang nyah dius jens lyis gos das.
17 Housoeh Israel eh, Ngos gas Yhensain namoq Mangso nghuot yvlyis namoq seq das:
ngos gas ngah gyingshang jing Zion mha nyeis.
Yerusalem gas ngah gyingshang wus nghuot das las
lvbaus yah khanhamp eq ma doms ung lo das.
18 Hauh shishenh lyis boms jens gas zvbiq khyamh yah nghop das.
Jing khanghmuh mas noeu jens lyis nyvng das.
Yuda mau gonh nyhenshang jeis nyoshoq yoh das.
Yhensain dah Yhenmuh masyah jeislo dvlvng yaus das las
hauh zis Akhesia Langhkhau lhyi jyweq das.
 
19 Egutu mau gas sihyos,
Edom mau jyamhjyuklhyuk joqyos bweh das:
khasoeh ge lyis nyamoq gas Yuda mau lyis zan las
tswi ma bos dius jens lyis sat.
20-21 Sat zis xauh bang xiklyis ngos lvto phuknote 3.20 Lvto phuk ge zis Hebre mas Tswi ma bos cho taiq hoeuh, ge toh. das.
Yobos bos soeu lyis eq ma kat kat das.
Nghuot laus eq Yuda mau yahge Yerusalem wus gas vcaiq vto dius nyeis jang nghuot das.
Ngos Yhensain ka Zion boms mas nyeis das.