2
Yhensain Zaih nhang
Mangso dah gyingshang jing Zion mha Lvbuh muot geh;
nhauh thwe nyhink geh;
Yuda dius jens eh, gyuk nvn geh!
Yhensain dah buisnyeis jweh bah ge.
Hauh buisnyeis gas chuot las nhaiqkuk dah buisnyeis nghuot das.
Hauh buisnyeis gas noq las jyommauh nhoenk toh.
Hau yombos jesphung zainsmuh gas
mauchuotdwang gas boms jens thoq mas nghop toh teh duon los.
Houmha housoeh teh zis khanhamp eq ma bos ku,
thang pheh khanhamp eq ma doms bos lo das.
 
Nyamoq vzains lyis nyi soeh lhyoq tyamp.
Nyamoq xik mas maunyeis gas
Eden khyam teh nghuot laus eq,
nyamoq thang mha ka tyeihgesles sihyos teh nghuot.
Nyamoq masyah phang luiq vzains cha ma bos.
Nyamoq gas nyang jens teh doeus.Ref 2.4-5: Nyoq 9.7-9
Nyamoq gas jes nyang jens teh wuih.
Nyamoq gas boms thyoh jens thoq mas tsain dyvm lyis
jeslhyingh nyings teh,
huhyau ngeh thwe teh tsain nyings.
Nyamoq gas jeszan das zis cicont nghuot dah
jesphung zainsmuh teh jens toh.
Nyamoq jweh los lyis, yuk khanghmuh gyuk dvn,
yuk khanghmuh nyoqnho dyoq.
Nyamoq gas jes thoeuqzoe jens teh zan las
wusciank mas jeslo jens teh doq.
Nyamoq dvnganh gas xik pheh dan dan jens loh las
nyamoq loh cho ma i,
gohtoeu cho mha ma wvng.
Nyamoq thoenk dvp chank whom loh las
nyamoq lyis cha yah eq ma yoh tomp.
Nyamoq gas wus pheh duon jyenh los.
Nyamoq ciank thoq mas wuih;
yhen jens thoq mas tsain doq las
khauh bang teh khomhbaiq cho tsain wvng loh.
 
10 Nyamoq duon loh lyis maulop nyeisloeh;Ref 2.10: Nyoq 8.12
maukhung nonh.
Buislom lhamhmuh noq los,
kyi jen eq ma buh lo.
11  Yhensain ka nyah jesphung lhyi maujau jau zis yah tying toh.Ref 2.11: Nyoq 6.17
Jeslo jens nyang lyis domsyos gyo bang gas
nyo las yomsoq bos.
Yhensain dah buisnyeis gas kha iq gyuk chank bos zis nghuot!
Hank doeng nyeis das lah?
Nhaiqlom Thaiq das zis Khi
12  Yhensain taiq,
Gvshih laus eq namoq ehnyet gyingh yah nhaiqlom thaiq, womkyi lha
ngausdyeis ngausnhvp kuk zis yah ngah jyank pheh lhain los geh.
13 Nah ehnyet dyet zis gas
nvng kuk cho lhyi chixoeuq bas jungh.
Nah dyi langchuiq zis kyingh ma tham.
 
Yhensain namoq dah Mangso jyank mas tauh los geh:
nyang gas nhaiqbos las nhaiqnyen cho dyingh shoq bos.
Nyang gas nhaiqlom xing lha
nyah dangthoengh tsomh das.
Nyang gas yobos khyuot dyei las
ma joeng das cho vjangh cicont nghuot.
14  Yhensain, namoq dah Mangso ka nyah ehnyet thaiq das las
jyo vbomsdom shvmanh dyei mvbeh.
Housoeh lyis namoq nyang lyis jyo yahge zvbiq yoh dyei das, ge.
 
15 Zion boms mas lvbuh muot geh;
womkyi das zis yahge moqhuom khi das xiklyis vmingh dyei geh.
16 Dius jens lyis dvgeh tsainh las
gyingshang huom xiklyis sont geh.
Dius cauh jens lyis shwih los geh,
loshang jens yahge nauhnoeuh jens lyis eq tsainh geh.
Phoengh vsaiq wvng vzomh jens yangh
yhen mhayah thuq las los chah.
17 Yhenmuh khomh yahge phon jo mas
Yhensain lhyi phuqsoe dah
phudyei bang gas ngaus las shvmanh dung chah:
Yhensain eh, nah dius jens lyis nhaiqnyen aq.
Gohtoeu dius nyau jens ngamoq lyis,
Namoq dah Mangso khalhye nyeis, ge sang zis yah
ngamoq lyis dius ngis khyoq las vjwangh nhang.
Mau mas nyeiscoeu bos nhang
18 Hauh thang lhyi Yhensain ka nyah mau xiklyis chiqh cho bos yvlyis tuonhshet.
Nyang nyah dius jens lyis nhaiqnyen cho bos.
19 Nyang nyamoq lyis phuk taiq:
Gvshih ngos namoq lyis jyo,
zvbiq yahge tsanlun coeu dyei das las
namoq nhaiqtap das.
Gohtoeu dius nyau jens namoq lyis dius ngis ma khyoq lo das.
20 Ngos mautsung pheh yah los dah jesphung lhyi yoeus tyamp das.
Dvyhamh lyis sihyos pheh khat tyamp das.
Nyamoq dah xik pheh vjens lhyi Coh Thomh pheh,
thang thank vjens lhyi Mediteranean Thomh pheh khat khyoq das.
Nyamoq dah mvng hoengh hoengh nvm das.
Nyamoq gas namoq lyis kuot goeus gvng mas ngos nyamoq lyis mhont tyamp das.
 
21 Maunyeis eh, Vchiqh,
Yhensain nah xiklyis kuot dyei gvng mas
gausyis las dvgauslaus nyeis aq.
22 Gaunyhauq jens eh, vchiq goh,
katjang tsain nyaus joq;
shihzains mas vshih tsain shih joq,
maiphang shih yahge zvbiq shih nyoshoq nghuot.
 
23 Zion dius jens eh,
Yhensain, namoq dah Mangso
namoq xiklyis kuot dyei goeus cho mha gauslaus geh:
nyang gas cungh thuq zoh lyis mau geh ko wus dyei.
Nah xiklyis cungh mau huot khyoq dyei las
zvn wvng zoh lyis xik pheh vgus mau wus dyei.note 2.23 Nyang gas lyi jus yvmvyah cungh thuq zoh lyis mau wus nhang das.
24 Housoeh thanjang mas jyo yah tsain dyingh las,
nyhetzwvng vnvm mas dah dwang jens eq zvbiq yahge tsanlun coeu yah dyingh muis das.
25 Janghgyik whom yah
namoq dah jyo zo las somh loh dah zvn lyis zis ngos namoq lyis doms dyei das.
Namoq lyis tyi lha haih jesphung lhyi nhang soeu ka ngos nghuot.
26 Gvshih namoq zo zis nyoshoq yoh das las ehnyet tap das.
Namoq gas namoq lyis mauhphoh zis kuot dyei goeus dah Yhensain
namoq dah Mangso lhyi tsain chungh das.
Ngah dius jens lyis khanhamp eq
dius ngis ma doms khyoq lo das.
27 Housoeh lyis Israel jens eh, Ngos namoq mas nyeis zis eq,
ngos Yhensain ka namoq dah Mangso nghuot zis eq,
Mangso gohtoeu ma bos lo zis eq namoq seq das.
Ngah dius jens lyis khanhamp eq
dius ngis ma doms khyoq lo das.
Yhensain dah buisnyeis
28 Hauh thang lhyi ngos ngah Dyos
yuk khanghmuh thoq mas huot khyoq las,Ref 2.28-32: Lgy 2.17-21
namoq dah loloeu lonyi jens lvpe pe das;
namoq dah lokhoq jens yhetmoq moq las,
namoq dah wotyamh jens nyoqnyvng nyvng das.
29 Hauh yoq lyis ngos ngah Dyos jyeidwis jens,
vbusbih vmesbih thoq mas yangh huot khyoq das.
30 Ngos hauh buisnyeis dah zaih nhang cho maukhung mha eq,
nyeisjvng mas eq dyei das.
Houmha suih huot cho, nyi yahge
nyikhauh bungh nghuot das.
31 Kuhxing lha gyukphoh dah
Yhensain buisnyeis ma jweh shih lyisRef 2.31: Mat 24.29; Mak 13.24-25; Luk 21.25; Nyoq 6.12-13
buis gas chuot las lhamhmuh eq suih teh nes das.
32 Nghuot laus eq Yhensain lhyi pangh cho sang bang dvnganh khyuot yoeus zis xauh das:Ref 2.32: Rom 10.13
Yhensain taiq goeus zis yah dvyhangteh,
Yerusalem wus mas zis dvyhamh phang luiq das.
Ngos khyen toh bang doeng das.