8
Thang thank Midian Somh
Ephraim jens Gideon lyis, Nvng Midian jens lyis loh zan lyis ngamoq lyis chamus ma shwih? Nvng ngamoq lyis chamus housoeh kuot, ge haih cho lhyi khoh khoh tsain lop.
Nyang nyamoq lyis taiq zis gas, Ngos namoq iq gis shoq cha ma kuot Namoq dvmhauh kuot zis gas ngah dius Abiezer kuot zis dvnganh thoq lyis zes gis. Mangso dah yomsoq yah namoq Midian zau aiq yuk, Oreb yahge Zeb lyis sat goeus. Namoq kuot zis yah ngos kuot zis khasoeh yoh byi das lah, ge. Nyang housoeh ge lyis nyamoq nhaiqyo bi tyamp.Ref 8.3-5: Chd 83.11
Hauh thang lhyi Gideon yahge nyah dius somhxo ka Yodan lvng mas jweh las goeu loh. Nyamoq gas nyung laus eq jeswus lyis chank khat shih. Nyamoq Sukhot mas jweh lyis nyang hauh wus mas bang lyis taiq zis gas, Ngah dius jens lyis ohlhyoq jenh dyei aq, nyamoq svsoh nyung goeus. Ngos eq Midian hwankti Zeba yahge Zalmuna lyis chank khat nyeis, ge.
Nghuot laus eq Sukhot uhshe bang taiq zis gas, Ngamoq chamus nah jesphung lhyi zonoms dyei das? Nvng Zeba yahge Zalmuna lyis ma nyhik shih, ge.
Housoeh las Gideon taiq zis gas, Nghuot goeus, Yhensain Zeba yahge Zalmuna ngah loq kyauh lyis, ngos nvng lyis mhanhdyvp mas dah zoeudoms yahge zoeukyen yah lyuk das, ge. Gideon Penuel wus pheh loh las, houmha bang lyis eq houyah dvyhangteh dung. Penuel bang eq Sukhot bang taiq teh dvtaiq. Housoeh las nyang Penuel bang lyis taiq zis gas, Ngos ung cho yoh thang lhyi heimha doms los das. Housoeh ngos haih tyoeuqzvm lyis thyoq khyoq das, ge.
10 Zeba yahge Zalmuna gas nyamoq jesphung yah dvgeh Kako mas nyeis. Nyamoq jesphung ka dvmons oeng khyoengh ko bos. Nyamoq gas buisthuq lo jens masyah nyet bang nghuot. Jeslo dvsens aiqmons gas sat zis xauh goeus. 11 Gideon gas Noba yahge Yogbeha wus dah buisthuq pheh nyeis bang dah zvng bos yvcho loh las jeswus jesphung lhyi nyetlos nyettant zan. 12 Midian hwankti aiq yuk Zeba yahge Zalmuna gas phang loh. Gideon eq chank khat nyhik las nyamoq dah jesphung dvnganh lhyi dyos loh nhang.
13 Yoash lo Gideon jeszan masyah Here langhwuq cho yah tauh los lyis, 14 Sukhot mas dah loyvm dvyuk lyis xauh nyhik las nyang lyis choq nyei. Hauh soeu ka Gideon lyis Sukhot mas uhshe bang nyhetci nyhet yuk dah nyings lhaih dyei. 15 Housoeh Gideon gas Sukhot jens jyank loh las taiq, Namoq ngos lyis pangh das zis ngoek yvlyis vsoh lah? Namoq ngos lyis, Nvng Zeba yahge Zalmuna lyis ma yoh nyhik shih las, nyungdaus los dah nah jesphung lhyi ngamoq ohlhyoq ma yoh dyei ge taiq goeus. Heineh Zeba yahge Zalmuna! 16 Housoeh nyang Sukhot uhshe bang lyis mhanhdyvp mas dah zoeudoms yahge zoeukyen yhung lha joeng. 17 Penuel tyoeuqzvm eq thyoq khyoq las hauh wus mas bang lyis eq sat.
18 Hauh thang lhyi Gideon gas Zeba yahge Zalmuna lyis nyei, Tabor mas namoq sat bang gas khasoeh teh zis nghuot lah, ge. Nyamoq taiq zis gas, Nvng soeh teh zis nghuot, yuk khanghmuh gas hwankti lo teh zis nghuot, ge.
19 Gideon taiq zis gas, Nyamoq gas ngah vmang vnoeuh moq, ngvnyang ungwes dah loloeu jens nghuot. Ngos maukhi bah, namoq nyamoq lyis ma sat ya, ngos namoq lyis ma sat das, ge. 20 Nyang nyah lobes Yetha lyis, Haih bang lyis sat aq, ge. Nghuot laus eq nyang loshang dvnghuot shih yvmvyah sham she das zis sheq nyeis.
21 Zeba yahge Zalmuna Gideon lyis taiq zis gas, Ngamoq lyis nvnyang sat aq. Loyangh dah muh lyis loyangh nyang kuot khau, ge. Housoeh Gideon toq las Zeba yahge Zalmuna lyis sat thang lhyi nyamoq dah gola-u lainzain mas shauq toh luk yungh tsain yoeus.
22 Hauh thang lhyi Israel jens Gideon lyis taiq, Nvng ngamoq lyis Midian loq masyah khyuot goeus las, nvng ngamoq lyis locaiq ehchen jweh shoq guon aq, ge.
23 Gideon toeuh zis gas, Ngos namoq lyis ma guon das, ngah lo eq ma guon das. Yhensain namoq lyis guon das, ge. 24 Gideon taiq shih, Ngos namoq jyank masyah dvja sang mes. Namoq yuk khanghmuh yoh los dah nodangh ngos lyis dyei geh.note 8.24 Ishmael jens gas mhanhdyvp dius jens teh xing nodangh tsain cwih
25 Dius jens toeuh zis gas, Hauh zis ngamoq mes dyei, ge. Nyamoq misseh dvkoeuq lhywa nyhoeuh las, yuk khanghmuh nyamoq yoh los dah nodangh tsain kat. 26 Gideon yoh dah xing nodangh gas nyeici paung nyhet lyei. Houmha shunk zis, ywi, Midian hwankti jens shunk dah dyi lanh ma bos, nyamoq gola-u lainzain mas shauq dah dyigop eq ma bos shih. 27 Gideon gas hauh xing yah ephod dvkoeuq kuot las nyah yhen wugungs Ophra mha toh. Israel dvnganh gas Mangso lhyi tyamp las hauh phvra lyis loh tsain paiq. Houka Gideon yahge nyah yhenbang xiklyis lhyik bweh loh.
28 Midian jens lyis Israel jens yah ung lha hou mhayah yau cho ma yoh dyei lo. Gideon zaih lyis hauh mau mas nyeici zvn moeng dvm joq.
Gideon Shei
29 Yoash lo Gideon gas nyah yhen pheh tauh loh las houmha nyeis. 30 Gideon gas yhensain nyhiq nyoshoq yoh yvmvyah, nyang loloeu jens nyhetci yuk bos. 31 Nyang Shekhem mha eq hwank nyhiq dvyuk yoh; nyang eq loloeu dvyuk khoeu dyei las nyang lyis Abimelek ge nyhink. 32 Yoash dah lo Gideon gas mang las shei. Nyang lyis Abiezer vhuh dah Ophra wus, nyah uwus Yoash dah lop khyung mas nyhop.
33 Gideon shei thang lhyi, Israel jens Mangso lhyi lom ma luk, Bala phvra lyis doms paiq loh. Bala Berit lyis nyamoq dah mangso ge khyen yoeus. 34 Nyamoq lyis nyamoq dah vyvm vwi mas dah jeswus masyah khyuot yoeus, Yhensain nyamoq dah Mangso lhyi ma paiq lo. 35 Nyamoq gas Israel xiklyis gis zis kuot dyei khoq dah Gideon yhenbang lyis jyehjuh ma soh lo.