5
Debora yahge Barak Lvkhyank
1 Hauh nyeih lyis Debora yahge Abinoam lo Barak gas haih chunghthwe kat.
2 Yhensain lhyi chungh!
Israel jens zan das ge thyet lyis
dius jens gaus gaus yis yis xihhonh los.
3 Hwankti jens eh, gyo geh!
Guon bang eh, kamp gyo geh!
Ngos Yhensain, Israel dah Mangso lhyi
toenk khvlhank yah chungh das.
4 Yhensain eh, nvng Seir boms masyah gyoh los,
Edom pa mhayah thuq los uhlyis nyeisjvng gas nvn las
maukhung mhayah eq mau wus gyoh,
jyommauh masyah mau shuon gyoh.
5 Sina boms dah Yhensain xikkhonh mas boms jens gas nonh nyeis,Ref 5.5: Dyu 19.18
Yhensain, Israel dah Mangso xikkhonh mas boms jens yangh nvn nyeis.
6 Anat dah lo Shamgar zaih yahge
Yael dah buisnyeis lyis
hauh mau mha soenghi jens hank ma suh lai lo,
gyung suh bang eq cho khyoh dvyhung.
7 Debora eh, Israel wus jens gas tyamp toh.
Nvng thuq los shoq vkom dvjoq.
Nvng gas Israel ungwes teh thuq los.
8 Nyamoq mangso jens vsaiq khyen yoeus lyis
hauh mau mas moeng dyoq.
Israel nyei mons mas gos dvkoeuq,
lham dvkoeuq vchi lah?
9 Ngah nhaiqlom gas xihhonh zis yah kuot dah gausyis bang
Israel dah zau jens yah dvgeh nghuot.
Yhensain lhyi chungh!
10 Dis dah Mauhlyihzoe thyoeu ji bang,
anhzoe mas tsung bang,
nyungs las khyei cho suh e bang eh, taiqnote 5.10 Taiq geh, ge zis gas, nghamh yoeuh geh, ge zis nghuot. geh.
11 Jeis dwang yvmlhaink yah dius phung hoeu thwe gyo geh!
Nyamoq gas Yhensain dah ung cho,
Israel dius jens dah ung cho taiq nyeis.
Hauh thang lhyi Yhensain dah dius jens nyamoq dah wusnote 5.11 Nyamoq dah wus masyah ge yvmas, nyamoq dah wus khomh pheh eq ge. masyah tsain jens gyoh los.
12 Uhshe aq, Debora eh uhshe aq!
Uhshe aq! chunghthwe kat aq.
Abinoam lo Barak eh, xik pheh loh aq,
yoh nyhik shwih los bang lyis shwih loh aq.
13 Hauh thang lhyi nyet shih bang gas nyamoq dah uhshe bang jyank mas gyoh los;
Yhensain dah dius jens gas nyah jyank masnote 5.13 Nyah jyank mas, ge yvmas, Hebre mas gas, Ngah jyank mas, ge bos. jeszan das zis cicont los.
14 Nyamoq gas Ephraim boms masyah langhkhau pheh los.
Nyah thang mha ka Benyamin vkoq yahge nyah dius jens nghuot.
Zauzains jens gas Makir vhuh masyah nghuot las
zau jens gas Zebulun mas zis nghuot.
15 Isakha dah uhshe bang gas Debora yah los.
Isakha los lyis Barak eq bos los.
Nyamoq gas langhkhau pheh nyah thang mha chank los.
Ruben vkoq gas gang goh loh las
los das ge ma yoh thyet.
16 Nyamoq chamus yvng yah nyeis khoq?
Yvng yoeuh bang yvng phung lhyi lui yvlyis gyoh nyeis lhyeh?
Nghuot goeus, Ruben vkoq gas gang goh loh las
nyamoq los das ge ma yoh thyet.
17 Gad vkoq gas Yodan lvng buisthuq tvp pheh nyeis.
Dan vkoq eq sangpho yvm mas tsain nyet joq.
Asher vkoq gas thomh yvm mas nyeis las
thomh jyankyvm chank yah goeukhanh mas tsain nyet joq.
18 Nghuot laus eq Zebulun yahge Napthali dius jens gas
jeszan jang mas nyamoq kang lhyi dyei las zan goeus.
19 Hwankti jens gas Megido jeislo lvng yvm Tanak wus mas los zan.
Khanan hwankti jens, los zan laus eq
ngwis ma tsain yoeus loh.
20 Kyi jens gas maukhung mhayah zan dyei.
Nyamoq gas maukhung mha ywi loh zis yah
Sisera lyis zan.
21 Kishon lvng, jeis je yvmas nyamoq lyis khyuot she loh.
Ngos gas yombos bos jens loh das.
22 Nyang jens gas pant gyoh los;
nyamoq dah khyeikhu nyeisjvng mas thungh.
23 Yhensain dah loeuswons soeu taiq, Meroz wus lyis nhoengh geh.
Houmha nyeis bang lyis nhoengh geh.
Nyamoq gas Yhensain lhyi ma los pangh,
nyah xiklyis jeslo jens khyvlyis ma los bos zan.
24 Ken dius Hazo dah yhensain nyhiq Yael gas
vmesbih jens mas ngelhoq thank soeu nghuot.
Zvng mas nyeis dah vmesbih jens mas ngelhoq thank soeu nghuot.
25 Sisera jeis sang lhyi nyang gas nauh dyei,
khuq yungh masyah nauh chi los dyei.
26 Nyang zvng jywangh dvloq, muh zwi soeu dah doeus dvloq yoeus chi lha los.
Hauh zis Sisera dah uhloms mas battsuk dyei.
27 Nyang gyuis gyoh las Yael dah khyeiyang mas lains gyoh loh.
Nyang Yael dah khyeiyang mas lains joq goeus,
nyang nyeisjvng mas lains shei joq.
28 Sisera dah ungwes gas khomhbaiq cho yoeuh las khomhgos khau mhayah gop las taiq zis gas,
Nyah jes lhyingh los zis chamus hei iq thang gyoh au?
Nyah nyang jens tauh los zis chamus hei iq phyiq au, ge.
29 Joeui bos thank lonyi jens nyang lyis puk taiq dyei,
nyang doms taiq, doms taiq zo zis gas,
30 Nyamoq zan ung los dah lvnyhvp gvm goh nyeis.
Jeslo dvyuk lonyi dvyuk aiq yuk,
Sisera xiklyis cauh yungh misseh,
hwankti nyhiq dah lainzain xiklyis cauh las khoh kat dyimis gvm goh nyeis, ge.
31 Housoeh las Yhensain eh, nah jeswus jens housoeh shei loh bas jungh.
Nghuot laus eq nah buisnoms jens gas canh los dah buis teh tso bas jungh, ge.
Housoeh hauh mau mas nyeici zvn nyenstap joq.