4
Debora yahge Barak
1 Ehud shei thang lhyi Israel jens gas Yhensain yah tyi dah yaunos doms kuot.
2 Housoeh las Yhensain ka nyamoq lyis Hazo wus lyis guon dah Khanan hwankti Yabin lyis yah los ung nhang. Nyah jeszau gas Sisera nghuot. Sisera gas gohnyau bang dah Haroshet wus mas nyeis.
3 Yabin gas thyeq jes lhyingh gauxo yoh las Israel jens lyis aiqci zvn svsoh lhoeng khyvlyis guon goeus. Housoeh Israel jens gas nyamoq lyis pangh aq ge Yhensain lhyi lui.
4 Gvshih Lapidot dah yhensain nyhiq Debora gas dangcoq soeu nghuot. Hauh yoq lyis nyang gas Israel jens lyis soetuon soeu khyvlyis phuqsoe nyeis.
5 Nyang gas Ephraim boms mau, Rama yahge Bethel jo, nyang gyangh tsung dah dyoms zains khyei mha tsung las Israel jens soe bos lyis nyang lyis los tsain thyet nhang.
6 Dvnyeih gas nyang Napthali mau Kedesh wus mas dah Abinoam lo Barak lyis khi nhang lha taiq zis gas, Yhensain, Israel dah Mangso nvng lyis haih vmingh dyei toh. Napthali yahge Zebulun vkoq jens masyah dius dvmons lyis shwih las Tabor boms mas loh aq.
7 Ngos eq Yabin hwankti jesphung dah jeszau Sisera lyis Kishon lvng mas nvng lyis zan das zis shwih los das. Nyang mas nyah jes lhyingh jens eq, jesphung eq bos das. Nghuot laus eq ngos nvng lyis ung cho dyei das, ge.
8 Barak nyang lyis taiq zis gas, Nvng ngos yah loh lyis gas ngos loh das, laus eq nvng ngos yah ma loh lyis gas ngos eq ma loh, ge.
9 Nyang phuk taiq zis gas, Ngos nvng yah loh das laus eq nvng ung los cho mha nyings ma hoeuh das: khasoeh ge lyis Yhensain ka Sisera lyis vmesbih loq mas kyauh das, ge. Housoeh Debora gas Barak yah Kedesh pheh loh.
10 Barak gas Zebulun yahge Napthali vkoq jens lyis khi lha dius dvmons nyah thang mha chank zis yah Kedesh pheh loh. Debora eq nyang yah loh.
11 Hauh shishenh lyis Ken dius Hazo gas Zananim mas dah dyoms zains nvm Kedesh yah tanh yvmas nyah zvng kuot las nyeis langh goeus. Nyang gas Moshe dah auyis Hobab vnyau vshih Ken jens masyah dyung los.
12 Abinoam lo Barak Tabor boms mas doq loh cho Sisera seq lyis,
13 nyang gas nyah thyeq jeslhyingh gauxo, nyah dius dvnganh lyis tsainh las gohnyau bang dah Haroshet masyah Kishon lvng pheh nhang kat.
14 Hauh thang lhyi Debora Barak lyis taiq zis gas, Loh aq, Yhensain ka nvng lyis choshe nyeis! Khvnyhik nyang nvng lyis Sisera thoq mas ung cho dyei goeus, ge. Housoeh las Barak gas Tabor boms masyah nyah dius dvmons yah gyoh loh.
15 Barak gas nyah jesphung yah Sisera yahge nyah jesphung lhyi jeszan uhlyis, Yhensain ka Sisera yahge nyah jeslhyingh jens, nyah jesphung lhyi moengsa yah mhont dyei. Sisera gas nyah lhyingh masyah gyoh las khyei cho phang.
16 Barak gas hau jeslhyingh yahge jes jens lyis gohnyau bang dah Haroshet wus jweh shoq chank khat las, Sisera dah jesphung dvnganh lyis dvyuk eq ma nyet lo shoq sat.
17 Sisera gas phang lha Ken dius Hazo dah yhensain nyhiq Yael zvng mas wvng loh: khasoeh ge lyis Hazo hwankti Yabin gas Hazo yhenbang yah nyenstap goh.
18 Yael gas Sisera lyis e zes las taiq zis gas, Ngah yhensain eh, wvng los aq, ngah zvng mas wvng los aq, vgyuk, ge. Housoeh las nyang wvng loh lyis, Yael gas nyang lyis gosseh nungsthanknote 4.18 Yael gas nyang lyis mistyang yah nghop shung toh, ge. mas shung toh.
19 Sisera Yael lyis taiq zis gas, Ngos jeis shet, jeis dvtsiq jenh dyei aq ge lyis, Yael gas shohyeis thung phank las nauh shuk nhang lho lha doms phomh shung toh.
20 Sisera taiq zis gas, Nvng zvng khomh mas zungh nyeis aq, dvyuk yuk, Heimha hank vnyeis lah, ge nyei lyis, Ma nyeis oen aq, ge.
21 Sisera gas svsoh nyung las yhet muih loh. Hauh uhlyis Yael gas zvng jywangh dvkoeuq yahge doeus yoeus chi lha nyah jyank mas tsoek yah loh las nyah uhloms mas hauh saiq jywangh yah nyeisjvng mas battsuk dyei zis yah sat.
22 Barak Sisera lyis chank xo lha houmha jweh lyis Yael thuq e lha nyang lyis zes zis yah taiq zis gas, Heimha los aq, ngos nvng xo soeu lhyi chixoeuq bah, ge. Housoeh las Barak gas Yael yah dvgeh wvng loh lyis, Sisera gas uhloms mas saiq jywangh battsuk zis nyeisjvng mas shei joq.
23 Mangso ka hauh nyeih lyis Israel jens lyis Khanan hwankti Yabin thoq mas ung nhang.
24 Nyamoq eq Khanan hwankti Yabin lyis yoh mhont shoq zes zes zaiq.