2
Bokhim mha
1 Yhensain dah loeuswons soeu Giga masyah Bokhim mha los las Israel jens lyis taiq. Ngos namoq lyis Egutu masyah namoq dah phauh thyeih moq lyis dangthoengh toh dah mau mas shwih los goeus. Ngos namoq yah toh dah thanghchvp lyis khanhamp eq ma thyoq das oen taiq goeus.
2 Namoq haih mau mas nyeis bang yah thanghchvp ma gis toh. Namoq nyamoq dah phon lhyi tsain thyoq khyoq chah oen taiq goeus. Nghuot laus eq namoq ngos taiq khyvlyis ma kuot, namoq houyah tyi khyvlyis dvkuot.Ref 2.2: Dyu 34.12-13; Lyi 7.2-5
3 Housoeh las gvshih ngos taiq bah, ngos namoq jweh dah mau mas bang lyis ma khat tyamp dyei lo das. Nyamoq gas namoq dah jeswus duot las, nyamoq dah mangso lhyi paiq cho ka namoq dah lhyik duot das, ge.
4 Loeuswons soeu haih zis taiq lyis Israel jens dvnganh tsain ngaus.
5 Housoeh yvmvyah nyamoq hauh joqyos lyis ngaus ge vjyuk yah Bokhimnote 2.5 Bokhim vjyuk gas Hebre mas Ngaus bang ge. ge nyhink las nyamoq houmha Yhensain lhyi phudyei.
Yoshua Shei
6 Yoshua gas Israel jens lyis pont kat las, yuk khanghmuh vsainnyang yah sen dah vso mau sain das zis tsain loh.
7 Yoshua kang dwis nyeis dvchank Israel jens gas Yhensain lhyi tsain phuqsoe. Nyang shei thang lhyi eq Yhensain Israel jens lyis kuot dyei dah muh zains lyis nyvng dah logis jens kang dwis nyeis dvchank Yhensain lhyi tsoq phuqsoe.
8 Yhensain dah jyeidwis, Nun lo Yoshua gas nyenhkyi dvxo dvci zvn bos lyis shei.
9 Nyang lyis Ephraim boms mau Gash jing mautsung pheh nyah vso maunyeis Timnat Here mas nyhop.Ref 2.9: Yosh 19.49-50
10 Hauh caiq mas bang dvnganh eq shei lha gohcaiq mas bang gas Yhensain lhyi tohnyhik, Israel xiklyis nyang kuot dyei dah muh lyis eq ma seq lo.
Yhensain lhyi ma Paiq lo
11 Housoeh Israel jens gas Yhensain yah tyi lha Bala phvra lyis tsain phuqsoe zis yah yaunos kuot.
12 Egutu masyah nyamoq lyis shwih los, phauh thyeih moq dah Yhensain Mangso lhyi paiq cho no las, vyvm vwi bang dah phvra shot pheh chank loh, bos paiq zis yah Yhensain lhyi nhaiqyo nhang.
13 Nyamoq gas Yhensain lhyi ma paiq lo Bala yahge Ashtarot phvra lyis tsain phuqsoe.
14 Housoeh las Yhensain ka Israel jens lyis nhaiq svsoh yo las, nyamoq lyis Zan las thyoq das bang lyis nhang kat. Vyvm vwi mas dah jes jens gas nyamoq lyis ung lha, nyamoq gungs lyis nyamoq nyang ma yoh gos zo lo.
15 Yhensain nghuot das ge taiq toh goeus vgus, nyamoq jeszan loh khanghmuh Yhensain ka nyamoq yah tyi toh. Housoeh las nyamoq svsoh shanghsenh.
16 Hauh thang lhyi nyamoq lyis ung bang loq masyah khyuot yoeus das xiklyis Yhensain ka Israel uhshe bang dyei los.
17 Nghuot laus eq Israel jens gas nyamoq uhshe bang dah dang lyis eq ma gyo. Yhensain lhyi lom ma luk, gohtoeu mangso jens lyis paiq loh. Nyamoq dah uwus moq gas Yhensain dah tyingtoh dang lyis domsyos gyo. Nghuot laus eq hai dius caiq vsaiq mas bang gas domsyos gyo cho lvnyap no tyamp.
18 Yhensain Israel jens lyis uhshe soeu dyei khanghmuh nyang gas hauh uhshe soeu dwis nyeis dvchank nyang lyis pangh zis yah nyamoq lyis jeswus loq masyah khyuot kat. Khasoeh ge lyis nyamoq zaiq zis xauh las noskyingh lyis Yhensain ka nyamoq lyis nhaiqnyen.
19 Nghuot laus eq uhshe soeu shei thang lhyi dius jens gas nyamoq dah cho cauh pheh tauh loh las xik lyis dah dius caiq thoq lyis ma gis shoq kuot. Nyamoq gas gohtoeu phvra lyis paiq phuqsoe loh. Nyamoq dah ehnyet than zis yah nyamoq dah ma gis cho pheh tsoq loh.
20 Yhensain Israel jens lyis nhaiq svsoh yo los las taiq zis gas, Haih dius nyau gas ngos nyamoq dah phauh thyeih moq lyis tsomh toh nhang dah thanghchvp lyis tsain thyoq. Nyamoq ngah domsyos ma gyo yvmvyah,
21 ngos eq, Yoshua shei uhlyis hauh mau mas nyet joq shih dah khah dius nyau lyis eq nyamoq masyah ma khat tyamp dyei lo.
22 Ngos nyamoq lyis yhung lha Israel jens nyamoq dah phauh thyeih moq Yhensain dah cho chank teh, chank das, ma chank das zis kyink das, ge.
23 Housoeh las Yhensain ka hauh dius nyau jens lyis, Yoshua loq mas eq ma kyauh, Yoshua shei thang lhyi eq lvnyap ma khat tyamp, hauh mau mas nyhet toh.