17
Mikha dah Phvra
Gohlhain Ephraim boms mau mas Mikha ge soeu dvyuk nyeis. Nyang nyah ungwes lyis taiq zis gas, Nah ngwis kyvp dvkhyoengh dvxo khauh loh uhlyis nvng hauh khyanktau lhyi nhoengh zis ngos xauhgyo. Yoeuh aq, hauh ngwis ngos yoeus toh las ngah jyank mas joq, ge.
Nyah ungwes gas, Ngah lo eh, Yhensain nvng lyis shvmanh dyei bas jungh, ge. Nyang hauh ngwis nyah ungwes lyis doms dyei. Nyah ungwes taiq zis gas, Nhoengh dang ngah lo lyis ma zangh das nyhenshang ngvnyang hauh ngwis Yhensain lhyi kyauh goeus. Haih zis saiq phvra kuot las ngwis yah gyangh shauq. Housoeh las gvshih haih ngwis ngos nvng lyis tauh dyei das, ge. Hauh thang lhyi nyang hauh ngwis nyah ungwes lyis doms dyei. Nyah ungwes gas hauh ngwis kyvp aiqxo yoeus las saiq kyungh las ngwis shauq dah ngwis shonh soeu lhyi dyei las phvra kuot nhang. Hauh phvra gas Mikha yhen mha toh.
Haih Mikha ka nyang paiq das joqyos eq yoh. Nyang gas phvra eq, phudyei bang dah ephod eq kuot las nyah lo dvyuk lyis nyah phudyei muh kuot nhang toh. Hauh zaih lyis Israel mas hwankti ma bos, hank eq hank o khyvlyis dvkuot.Ref 17.6: Soe 21.25
Hauh yoq lyis Yuda mau Betlehem wus mas nyeis dah Lewi loloeu dvyuk nyeis. Nyang hau Yuda mau Betlehem masyah thuq las nyang nyeis das gohtoeu joqyos xo loh. Nyang gyung suh uhjyangh Ephraim boms mau Mikha yhen mha jweh loh. Mikha nyang lyis nyei, Nvng kha mhayah los, ge. Nyang gas, Ngos Yuda mau Betlehem mas dah Lewi dius nghuot. Ngos nyeis das joqyos xo, ge toeuh.
10 Mikha nyang lyis taiq zis gas, Ngos yah nyeis goh, ngos lyis joeui dyei soeu, ngah phudyei soeu duot aq. Dvzvn dvzvn ngos nvng lyis ngwis kyvp dvci, dyimis dyei las wom tsoh das, ge. 11 Hau Lewi loloeu eq Mikha yah nyeis das zis xamxonh las nyah lo teh bweh los. 12 Mikha ka hau Lewi loyvm lyis phudyei muh huon lha, nyang eq Mikha yhen mha nyeis. 13 Mikha taiq zis gas, Gvshih ngos ngah phudyei soeu khyvlyis Lewi dius yoh goeus. Yhensain ngos lyis gis zis kuot dyei lo das zis ngos seq, ge.