41
1 Nvng mvnjung lyis oengnghweh yah yoh nyhik lhyeh?Ref 41.1: Chd 74.14, 104.26; Esa 27.1
Nyah lhyo lhyi twih yah yoh twih lah?
2 Nyah nho lhyi twih yoh chuq kat lhyeh?
Nyah am mha nghweh yoh jauh lhyeh?
3 Nyang nvng lyis kat kat aq ge dung das lhyeh?
Nyang nvng lyis nhaiqnyen das xiklyis shangphu das lhyeh?
4 Nyang nvng lyis vcaiq vto phuqsoe das ge,
nvng yah xamxonh las dangthoengh toh das lah?
5 Nvng, nyang lyis nyhoeu dah nghoq lyis twih teh yoh twih das lah?
Nvng nyang lyis nah jyeidwis vmesbih jens lyis pyo nhang dah vyhang teh yoh kuot das lah?
6 Oeng nhoh bang nyang lyis kya dyet das lah?
Soenghi jens nyang lyis chap ungh das lah?
7 Nyah yeis lyis oeng thauh lham yah yoh dyingh nhang lhyeh?
Nghuot ya nyah uhloms lyis lham dung yah yoh thauh phank lhyeh?
8 Nyang lyis dvlhain zangh lyis nvng khanhamp eq ma doms shi yoeuh lo das.
Nvng hau zan goh cho khanhamp eq ma tohnyhik lo das.
9 Mvnjung lyis nyvng soeu hank laus eq
womh cho chithyuk las nyeisjvng mas lains loh.
10 Nyang lyis zeh lyis nyang gyukphoh nghuot las
hank eq nyah xik mas hank eq ma womh yap das.
11 Nyang lyis zan lyis jesluiq zis hank?
Mungkvn gonh mas hank eq ma yoh kuot.note 41.11 Ngis zis 11 Hebre mas ma bvng.
12 Mvnjung dah khyei cho yahge nyang kha iq kuh las kha iq yombos cho
ngos nvng lyis taiq kyoh bah.
13 Nyah thoq dyi lyis hank ma yoh lang chuiq.
Nghuot ya nyang wuot toh dah gos lyis hank ma yoh thauh phank.
14 Gyukphoh zwis jvng yah dyingh joq dah nyah am lhyi
phank shoq hank yoh kuot?
15 Nyah gvnunghnote 41.15 Gvnungh lyis Hebre mas khwank cho, ge bos. gas gos jvng yah kuot toh,
hauh zis dvgeh toek toek dap las luk teh than.
16 Dvkyvp yah dvkyvp toenk toenk dapgoh joq las
jo mas soq yangh ma yoh wvng.
17 Dvkyvp yah dvkyvp dvgeh kyent dap joq las
cha yah khanhamp eq ma yoh lang sanh.
18 Nyang jyei lhyi nyi bvng los,
nyah nyoqjeih gas buis canh los teh bvng.
19 Nyah nhuot masyah nyilhyam thuq,
nyijyenh thyoh thyoh thuq los.
20 Nyah nho mhayah nyikhauh thuq nyeis.
Auh chuk mas ngeh las tsoeu nyeis teh nghuot.
21 Nyang soqshe lhyi nyi ngeh nyeis,
nyah nhuot masyah nyi duk dyvm thuq los.
22 Nyah lainzain gas yomsoq svsoh bos las
nyang yah xauhgoh bang dvnganh gas gyuk.
23 Nyah shoh mas nhuk dah vdwang yangh thyeq teh than.
24 Nyah lukzains nhaiqlom gas ma gyuk,
houka mhoq teh than.
25 Nyang toq los lyis yombos thank bangnote 41.25 Yombos thank bang; nghuot ya mangso jens. yangh dvn.
Nyamoq gyuk las cha ma daq kuot lo.
26 Nyang lyis dvm yoh tap das moengsa ma joq;
Nyang lyis yoh nos nhang das lham, nyo, jeszis ma bos.
27 Nyah xiklyis thyeq gas huhyau teh ma goeng,
thunk gas saiq yom teh nhamp.
28 Nyang lyis yoh phang nhang dah nyo ma bos.
Nyang lyis luk yah doeuh zis gas huhyau khvt teh dvnghuot.
29 Lhamloq gas nyah xiklyis huhyau dvkhvt dvnghuot.
Dius jens lham yah guons lyis nyang yis.
30 Nyah womdau mas dah vkyvp gas auhjvp teh zoeu;
houka thomhbop yos lyis kyeq loh teh lang chuiq loh.
31 Nyang thomh lyis jeis tsoeu teh muk nhang lha,
houka coeu auh tsoeu teh jeis nyop toq nhang.
32 Nyang lai loh dah thang mha bvng dah vkhyoh dwvng loh las
thomh gas jeisnyop thyoeu loh.
33 Nyeisjvng thoq mas nyang yah byi das zis cha ma bos:
nyang gas gyuk zis ma bos dah gvnkhanh toh zis xauh.
34 Nyang gas khwank thank dah gaunyhauq lyis yangh chaxwe ma nhang;
nyang gas mhanhdyvp mas yewus dvnganh dah hwankti nghuot, ge.