4
Cangxeih taiq goh
Elipha
1-2 Yoba, Ngos dang taiq lyis nvng lyis vthauqkhyi jus lah?
Ngos samlo ma yoh nyeis lo.
3 Nvng dius nyoshoq lyis jyauh goeus;
yomnhuk las nvn nyeis soeu lyis yombos nhang.
4 Dvyuk yuk thungh lains, yomnhuk las nyung lyis
nah dang gas nyang yoh yap das xiklyis yomdyei.
5 Gvshih gas yau cho nah jyank jweh las nvng yomgyau.
Hauh zis nvng lyis zangh las dvn nyeis.
6 Nvng Mangso lhyi paiq las nah kang dwis cho ka yobos huon chank ma bos.
Housoeh las nah nghamhnywe cho, nghamhloms cho bos chah.
7 Gvshih doms nghamh aq, ma jus zis ma kuot soeu ka ma shei das.
Dan soeu ka khanhamp eq dyoqbis zis ma bos das.
8 Ngos nyvng zis gas dius jens ma gis cho yosphuk,
lhung cho ge dah jyo khyoq;
gvshih nyamoq gas lhung cho yahge ma gis cho xauh yhomh yoeus.
9 Lyeis jyang teh Mangso ka nhaiqyo zis yah nyamoq lyis mhont tyamp.
10 Lhung bang khangkhyi jens teh nyings,
laus eq Mangso ka nyamoq lyis sam nhang lha nyamoq dah zwis lyis khyauh tyamp dyei.
11 Ngat sat zo das zis cha ma joq dah khangkhyi jens gas
shei lha nyamoq dah lo jens dvnganh gas dyos sanh tyamp teh nghuot.
12 Loeus dvkoeuq samlo los,
hauh zis ngah no mas dvtsiq dvxauhgyo.
13 Ngos yhet joq lyis yhetthyiq thyiq teh ngos lyis los thauqkhyi.Ref 4.13: Yob 33.15
14 Ngos gyuk las dvgungs gonh dwis shoq
tyik tyik nvn nyeis.
15 Lyeis jyamh gas ngah nyoqnho mha los tanh las
ngos shink nyang gyuk lyis ngah gungs mas mauh zang los.
16 Ngos thyimha dvja yap joq zis nyvng;
ngos yoeuh tsuk toh laus eq hauh zis cha nghuot zis ngos ma yoh taiq.
Hauh thang lhyi ngos hau sam masyah thwe dvkoeuq xauhgyo.
17 Dius dvyuk gas Mangso thoq lyis zes yoh dan lhyeh?
Dvyuk yuk gas gvnkhanh soeu thoq lyis zes yoh gyingshang lhyeh?
18 Mangso ka nyah maukhung jyeidwis jens lyis ma loms;
nyah loeuswons bang lyis yangh yobos huon.
19 Naus lyis teh yoh mhont tyamp,
tsohmop tsohnyhon yah kuot toh zis xauh bang lyis nyang loms das oen nghamh lhyeh?
20 Yang nvp lyis kang dwis nyeis mvbeh,
nghuot laus eq nyenhthang ma jweh shih lyis hank eq ma soh kat shei loh.
21 Yang yoh zis dvnganh yoeus tyamp dyei.
Yang joeui ma bos zis tsain shei loh.