39
Nvng ye beqlo khanhamp sot zis seq lah?
Ye cvtlo sot yvlyis zungh yoeuh nyeis lhyeh?
Nyamoq lodap zis khanyhank nghuot yvlyis seq lhyeh?
Nyamoq losot shishenh nvng seq lhyeh?
Nyamoq khanhamp whop las mungkvn mas lo tsain sot
toh das zis nvng seq lhyeh?
Nyamoq lo jens eq mhanhdyvp mas kuh yangh los;
nyamoq loh las ma tauh los lo.
 
Ye mauhlyihzoe jens lyis luiq cho hank dyei?
Nyamoq lyis hank phui kat las chwang yenh nhang?
Ngos nyamoq lyis mhanhdyvp gas nyamoq dah yhen khyvlyis dyei toh.
Nyamoq lyis coh janggyon mas nyeis nhang.
Nyamoq gas hoeu dah wus masyah we we nyeis,
nyamoq lyis mhiq yoeus las muh hank eq ma yoh zwi nhang.
Boms gas nyamoq xo zo dah katjang nghuot las houmha nyamoq nyaus ya nyaus yvlyis tsain xo zo.
Dius yah vmingh dyei zis ma xauhgyo nhang.
 
Noeuphuk gas nah xiklyis muh zwi dyei das lhyeh?
Nyang nah zungs mas mes yhet das lhyeh?
10 Noeuphuk lyis twih dvkhvt yah she lha yos yoh phuk nhang lhyeh?
Nah nyang zungs nvm mas khont yoh she nhang das lah?
11 Nvng nyah yombos yvlyis nges las
nyang nah muhchangh lyis kuot dyei das oen yoh nghamhloms lhyeh?
12 Nyang nah jyo yhomh yvlyis thanjang masyah tsainh yoeus las
chi los dyei das oen nghamhloms lah?
 
13 Gola-u nghoq dungs phap zis kha iq nyap!
Nghuot laus eq khah gola-u nghoq eq
nghoq kywank teh ma yoh dang.note 39.13 Ngis zis 13 Hebre mas ma bvng.
14 Gola-u nghoq gas nyah uq lyis tsohmop mas buis yah
nywe nhang das xiklyis nyeisjvng mas toh.
15 Nyang gas khyei yah uq lyis zangh nang phuk das,
yewus yah lhoq khwih das ge ma chiq.
16 Nyang gas hau uq gas nyah zis nghuot teh ma kuot,
nyang yomkat cho ka vkom dvnghuot yvlyis ma sen teh dvkuot.
17 Houka ngos nghuot.
Ngos nyang lyis joeui ma dyei, koh nhang.
18 Nghuot laus eq nyang wuihnote 39.18 Haih sonzoh Hebre mas ma bvng. lhyi,
nyang yahge nyang ji soeu lhyi yoh yis.
19 Yoba eh, nyang lyis yombos nhang zis
yahge nyang mham lhyi xing nhang zis nvng nghuot lhyeh?
20 Nvng nyamoq lyis janghgyik teh dyvm nhang lhyeh?
Nyamoq nyings thwe yah dius lyis dvn nhang lhyeh?
21 Nyang jens gas langhkhau mha nyeisjvng lyis nhaiq wvng zis yah dyik;
nyamoq yombos nyhoq jeszan yvmas duon loh.
22 Nyamoq gyuk cho ma seq,
khah moengsa eq nyamoq lyis ma yoh tauh loh nhang.
23 Nyamoq mas ji bang wons dah kyonhkhyi nhont nyhink,
hauh zis buis mas ying ying nghuot.
24 Sainh hwangh zis yah nvn las nyang jens xikpheh wuih loh.
Lvbuh muot kat lyis nyamoq samlo ma yoh yap.
25 Lvbuh muot kat khanghmuh nyamoq nyings.
Jeszan yvmas ma ni loh shih,
jeszau jens vmingh kaiq dyei zis ma xauhgyo shih lyis nyamoq jes shom xauh nvm.
26 Wuq dvng zons gas dungs tyo lha mautyi pheh
khasoeh dang loh das zis nah jyank masyah xuq lhyeh?
27 Zons gas boms nyhang mha nyah sot sot das zis
nah vmingh lyis langh lhyeh?
28 Nyang nyah yhen lhyi nyhang thank luktyoq thoq mas kuot toh.
Zuk dah luk-tyoq thyoh lyis nyah thoenkgus jesdvp kuot.
29 Nyang dvja ja lyis sat las zo das xiklyis
hou mhayah ni mas we mas zungh yoeuh nyeis.
30 Shei mvng yvmlhaink zons zain los,Ref 39.30: Mat 24.28; Luk 17.37
zons lo jens gas suih tsain shuk, ge.