37
1 Hauh lyeisjyang ka ngos lyis sainh guk thungh nhang.
2 Namoq dvnganhmoq Mangso dah thwe lhyi gyo geh,
nyah nhuot masyah thuq dah maujau lyis gyo geh.
3 Nyang hauh maunyoq lyis maukhung gonh nhang kat.
Nyeisjvng dvthang mhayah gohtoeu dvthang mha jweh shoq loh.
4 Hauh thang lhyi nyah thwe nyings zis xauhgyo,
maujau thwe shoenkkhyi los las maunyoq nyik bvng loh.
5 Mangso dah dang khonh gas
yang ma yoh seqgyo dah mauhphoh vyhang bweh los.
6 Nyang gyu lyis nyeisjvng mas gyoh das xiklyis vmingh dyei,
mau thunghkyei eq gyoh nhang.
7 Yah muh lyis eq no toh nhang.
Nyang cha yoh kuot cho yang lyis chixoeuq.
8 Yewus jens gas nyamoq khyung mas wvng nyeis.
9 Lyeisjyang ka mautyi pheh yah los,
ngamh zis gas mautsung pheh yah los.
10 Mangso dah soq yah jeis lyis gyamh nhang lha
houka nghantungh thaiq loh.
11 Mangso ka jyommauh mas jeis tyink toh.
Maunyoq gas jyommauh masyah nyik thuq los.
12 Hauh zis Mangso dah ehnyet yah dvyhangteh loh las
mungkvn gonh joqyos khyiq khanghmuh mas Mangso zaudang khyoq zis dvnganh kuot.
13 Mangso ka nyeisjvng lyis jyweq nhang das xiklyis mauwus dyei.
Hauh zis yang lyis joeng das zis nhang mvbeh.
Nghuot ya yang lyis nyang nyoq zons doeus cho chixoeuq mvbeh.
14 Yoba eh, dvxa no las gyo aq;
Mangso kuot dah mauhphoh cho lhyi nghamh yoeuh aq.
15 Nvng Mangso vmingh khasoeh dyei zis vseq lah?
Jyommauh masyah maunyoq khasoeh nyik nhang zis vseq lah?
16 Nvng maukhung mha jyommauh khasoeh dang zis vseq lah?
Mangso dah muhzoh mauhphoh lyes cho muhzoh lyis nvng vseq lah?
17 Ma seq, mautyi lyeis yah nyeisjvng lyis toeu khuk los lyis
dyi khau mha gywes zis kyingh dvxauh kham.
18 Mangso maukhung lhyi lhywa lha shonh dah thunk teh
goeng shoq kuot uhlyis nvng yoh bos pangh lhyeh?
19 Ngamoq Mangso lhyi khasoeh taiq das zis jyauh aq;
ngamoq seq cho ma tham lha cha ma daq taiq.
20 Ngos Mangso yah jisgoh das cho ma sang das.
Ngos nyang lyis chamus ngos lyis mhont das toeuh dyei das?
21 Gvshih hau maukhung mha dah bvng zis gas tsoek tsoek tso joq,
hauh zis ngamoq xiklyis nyo bvng las ma yoh yoeuh.
Lyeis muot zis yah maukhung eq lhyang joq.
22 Mautsung shot pheh xing vwot lyis nyvng,
Mangso phunk gas yang lyis gyukphoh zis yah tyink dyei.
23 Mangso dah yomsoq gas svsoh kuhxing lha yang nyah nvm mas ma yoh loh.
Nyang yang lyis kuot dyei yvmas nyang gas dan las lyi jus.
24 Housoeh las yuk khanghmuh nyang lyis gyuk;
nyang gas joeui bos ge taiq bang lyis tyamp toh, ge.