34
1-2 Dius jens namoq gas joeui svsoh bos, svsoh yik bang nghuot;
gvshih ngos cha taiq yvlyis gyo geh,
Nvng zonoms lyis chaq yoeuh lyis gis zis seq,Ref 34.3: Yob 12.11
nghuot laus eq nvng dang xauhgyo lyis joeui dang nghuot yvlyis ma seq.
Soe nghamh thyet das zis gas yvnyang dvnghuot.
Yoba gas nyang tswi ma bos laus eq,
Mangso ka nyang lyis jyoeng jus cho dyei das zis ngoek, ge taiq.
Nyang nyei, Ngos cu oen khasoeh yoh hwah taiq das lah?
Ngos dvmdap zis xungh, nghuot laus eq ngos yaunos ma bos, ge.
 
Nvng haih dius Yoba teh zis dvyuk yuk nyvng ku lhyeh?
Nyang Mangso lhyi phauh nyang cho khanhamp eq ma chixoeuq.
Nyang gas ma gis dah dius phung lhyi o,
yaunos yoh bang yah dvgeh suh yenh.
Nyang taiq, Houka Mangso dah ehnyet tungh chank das zis gas
dius xiklyis vkyuh ma bos, ge.
 
10 Seqgyo bang eh, ngah dang gyo geh:
Yomzains Mangso ka shuot yvlyis kuot das lhyeh!
11 Nyang gas dius jens kuot zis yah dvyhangteh phauh shangh.Ref 34.11: Chd 62.12
Nyamoq kham vvng zis yah dvyhangteh kuot.
12 Yomzains Mangso ka ma gis zis ma kuot.
Nyang hank lyis eq lyi ma jus zis khanhamp eq ma kuot.
13 Mangso ka nyah yomsoq lyis dvyuk yuk masyah xauh yoeus lhyeh?
Nyang lyis dvyuk yuk yah mungkvn lyis yoeuh nhang toh lhyeh?
14 Mangso ka nyah dyos yahge kang yoeus tyamp das zis yoh nghamh thyet.
15 Dwis nyeis bang yuk khanghmuh gas shei lha
tsoh mas doms tauh e das.
 
16 Nvng joeui bos lyis, gvshih ngah dang gyo aq.
17 Jus cho lhyi hoeng soeu lhyi hank ma yoh guon.
Nvng lyi jus cho yahge yomsoq bos dah Mangso lhyi yobos khasoeh yoh huon?
18 Mangso ka hwankti jens lyis, Namoq chah vkyuh ma bos, yhaugyen bang lyis,
Namoq ma gis bang nghuot, ge soeu nghuot.
19 Nyang gas guon bang shot ma dap,
shohjyen bang yah tyi dah dis bang lyis nyoqnho ma dyei,
khasoeh ge lyis nyang yuk khanghmuh lyis gvnkhanh toh.
20 Yang nyenh lyis nyetlos nyettant shei mvbeh.
Mangso yang lyis batkhyoq las yang dyoqbis loh.
Thoeuqzoe lyis yom ma kat noh sat.
21 Nyang gas yang bes cheh khanghmuh zungh yoeuh nyeis.
22 Yaunos bos soeu Mangso mhayah
yoh tamh shoq chuot dah chuot zis ma bos.
23 Mangso ka nyang yang lyis soetuon das xiklyis loh das zis
shishenh toeuq toh chah zis ma nghuot.
24 Uhshe bang lyis yoeus tyamp las hauh joqyos mas
gohyuk lyis kat das zis nyang ma choq yoeuh noh.
25 Khasoeh ge lyis nyang nyamoq cha kuot zis seq.
Nyenh lyis nyang nyamoq lyis thyoq las thungh thyi tyamp.
26 Nyang yaunos dap bang lyis dvnganhmoq yoh nyvng yvmas joeng.
27 Khasoeh ge lyis nyamoq nyah thang mha ma chank lo.
Nyang tyingtoh dang dvnganh lyis tyamp toh.
28 Nyamoq gas nyungs bang lyis Mangso jyank mas tsoengh kaiq nhang lha
nyang nyamoq pangh das cho sang zis xauhgyo.
 
29 Mangso cha eq ma kuot das ge nghamh thyet lyis, nyang lyis yobos hank ma yoh huon.
Nyang nyah nyoqnho shung lyis yang nyang lyis hank ma nyvng das.
30 Houmha dius nyau jens yoh kuot zis cha ma bos.
Mangso ma bos dah zaiq bang lyis guon toh nhang shih.
 
31 Yoba eh, nvng nah yaunos Mangso lhyi rhen goeus lah?
Yaunos ma doms kuot lo oen dangthoengh toh goeus lah?
32 Nvng Mangso lhyi nah yobos chixoeuq dyei aq oen vdung ku lah?
Ma gis zis kuot cho no lo das zis xam vxonh lah?
33 Nvng Mangso kuot yvlyis peq goeus ya,
nvng o yvlyis kuot dyei das oen vyoh nghamhloms lah?
Hau thyet cho ka ngah zis ma nghuot, nah zis dvnghuot.
Gvshih nvng khasoeh nghamh zis ngamoq lyis taiq aq.
 
34 Seqgyo cho bos soeu ka jyoengh xamxonh das.
Ngah dang xauhgyo dah joeui bos soeu taiq das zis gas,
35 Yoba gas seqgyo cho ma bos masyah taiq nyeis.
Nyang taiq dang gas chah vjyuk ma bos.
36 Yoba gas ma gis soeu teh phuk taiq yvmvyah
nyang lyis soetuon jang mas shwih loh.
37 Yoba Mangso lhyi jwangh cho ma no,
nyang yaunos bos las Mangso yah tyi loh, ge.