33
1 Yoba eh, gvshih ngos taiq chah dang dvnganh vlhomuh gyo yoeus aq.
2 Ngos ngah uhnuk mas bos zis taiq das xiklyis cicont nghuot.
3 Ngah dang dvnganh gas shang shang nghuot,
ngos jyoeng zis taiq nyeis.
4 Mangso dah Dyos gas ngos lyis gvnkhanh las ngos lyis kang dyei.
5 Nvng yoh phuk lyis phuk aq;
nah dang sont las ngah xik mas yap aq.
6 Mangso nyoqlvtjvng mas ngos yahge nvng gas dvyhangteh nghuot:
yah aiq yuk gonh gas tsoh yah zwvng toh.
7 Housoeh las nvng ngos lyis gyuk chank ma bos.
Ngos nvng lyis ma nos nhang das.
8 Gvshih haih zis gas nvng taiq yvlyis ngos xauhgyo zis nghuot.
9 Ngos yobos ma bos; ngos cha ma cu,
ngos tswi ma bos, yaunos ma dap.
10 Nghuot laus eq Mangso ka ngos lyis zan das xiklyis jyamp gus xo,
ngos lyis jes teh kuot.
11 Nyang ngah khyei lhyi kyomh kyomh lasRef 33.11: Yob 13.27
ngos loh khanghmuh zungh yoeuh nyeis, ge.
12 Nghuot laus eq Yoba eh, ngos nvng lyis taiq bah,
nvng shuot, Mangso ka dius thoq lyis zes kuhxing.
13 Nvng ngamoq lop dang lyis khanhamp eq ma phuk dah
Mangso lhyi chamus kauq?
14 Mangso ka doms taiq doms taiq laus eq
nyang cha taiq yvlyis hank eq ma gyo dyei.
15 Nyenh lyis dius jens yhet lyisRef 33.15: Yob 4.13
Mangso ka yhetmoq yahge nyoqnyvng masyah jis.
16 Mangso ka nyamoq lyis nyang cha taiq zis gyo nhang lha
nyamoq gas nyang zaih nhang yvlyis dvn.
17 Mangso ka nyamoq lyis yaunos ma kuot lo das xiklyis taiq las
nyamoq lyis khwank cho masyah khyuot yoeus.
18 Nyang nyamoq lyis ma dyoqbis nhang das.
Nyang nyamoq lyis nyang pheh yah shei cho mhayah khyuot yoeus.
19 Mangso ka yang lyis nosthyoh nhang,
yah gungsdom mas khih cho dyingh nhang zis yah soq dan.
20 Nos bang gas whitau ma bos,
gis thank zonoms lyis yangh nhaiq yoeuh nos.
21 Nyamoq dah gungsshoh dyoqbis loh,
nvng nyamoq dah shohyau dvnganh yoh nyvng.
22 Nyamoq gas shei mungkvn pheh loh bah ge.
23 Loeuswons soeu dvyuk nyamoq lyis los pangh mvbeh -
Mangso dah loeuswons bang khyoengh mons masyah
yah yvwons lyis taiq kyingh das nyhenshang dvyuk los.
24 Nhaiqnyen zis yah hau loeuswons taiq das zis gas,
Nyamoq lyis kat kat aq, nyamoq shei mau mas ma gyo das.
Haih zis gas nyamoq lyis khyuot kat das phauh nghuot, ge.
25 Nyamoq dah gungsdom gas wotyamh teh kuh los las yom doms bos das.
26 Nyamoq shvmanh dung lyis Mangso toeuh dyei das.
Nyamoq Mangso lhyi gauslaus zis yah paiq das;
Mangso ka nyamoq xiklyis jus zis doms kuot dyei das.
27 Dvyuk dvyuk moqphung mha taiq das zis gas,
Ngos yaunos kuot goeus, ngos jus zis ma kuot lo,
nghuot laus eq Mangso ngos lyis yobos shauh las dyei.
28 Nyang, ngos shei mau pheh loh nyeis masyah,
shwih las ngos dwis nyeis shih.
29 Mangso ka hai dvnganh lyis doms kuot doms kuot:
30 Nyang gas dius dah kang lhyi khyuot yoeus las
dvyuk dvyuk lyis gauslaus dah nyeisyap cho dyei.
31 Yoba eh, gvshih ngos cha taiq nyeis yvlyis gyo aq;
samlo nyeis aq, ngos taiq bah.
32 Nghuot laus eq nvng taiq dais bos lyis taiq shih aq ngos gyo bah.
Ngos nvng jus yvlyis gaus zis yah rhen das.
33 Taiq dais ma bos lyis gas nvng samlo ngah dang gyo aq;
ngos nvng lyis khasoeh joeui bos chah cho jyauh das, ge.