30
1 Nghuot laus eq gvshih gas dius caiq ngis bang ngos lyis jwangh;
nyamoq dah uwus moq gas vjangh yah chah phauh ma dap las
ngos nyamoq lyis ngah yvng zungh khuih jens lyis ma mes pangh nhang.
2 Nyamoq yomguons goeus,
yom nyo nhuk las ngah xiklyis chah muh ma yoh zwi lo.
3 Nyamoq gas shoh jyen lha yuot zis yah saiq nyet kyuk lyis pau zo.
Nyamoq gas nyenh lyis dius ma nyeis dah mhanhdyvp mas suh whang yenh.
4 Nyamoq gas mhanhdyvp mas dah vzains lyis khuot las tsain zo.
Whitau ma bos dah ratam zains vnyet lyis yangh tsain zo.
5 Yuk khanghmuh gas nyamoq lyis khauh soeu lhyi
kaiq teh kaiq las tsain khat tyamp.
6 Nyamoq gas luk-uk mas, luk tyoq yvm mas
tsoh dwang doeu las tsain lungh chah.
7 Nyamoq mhanhdyvp mas gaunyhauq teh oeu lha
mhanhgyomh khyei mha dvgeh duon jyenh nyeis.
8 Nyamoq gas phauh ma dap, nyings ma yoh bang nghuot.
Nyamoq gas hauh mau masyah khat thuq zis tsain xauh.
9 Gvshih nyamoq dah lo jens ngos lyis los yis.
Ngos gas nyamoq dah jwangh gus duot.
10 Nyamoq ngos lyis choqh las we mas nyeis.
Ngah nyoqnho mha svkanh yangh dyeh gyon.
11 Mangso ka ngos lyis yomnhuk las shohjyen nhang yvmvyah
nyamoq nhaiqgis yo zis yah ngos yah tsain tyi loh.
12 Nyamoq gas zau ma guon moqphung teh ngos lyis tsain zan.
Ngah khyei mha twih tsain khyoq. Nyamoq ngos lyis zan das zis tsain sont.
13 Nyamoq ngos lyis mhont.
Ngos lyis mhont das zis nyamoq lyis hank ma tomp.note 30.13 Hank ma tomp, ge zis Hebre mas, hank ma pangh, ge.
14 Nyamoq ngos lyis wusciank thyoq khyoq teh zan.
15 Gyukphoh zis yah ngos lyis ung tyamp las
ngah shop shop cho uklyeis teh dyuk loh goeus.
Ngah ung cho ka jyommauh soeh bi tyamp.
16 Gvshih ngos shei bah ge goeus,
ngos xauh kham zo zis gas sunghhuq das cho ma bos lo.
17 Nyenh lyis ngah shohyau khih;
hauh nos gas ma lyen lo khih nyeis.
18 Mangso ka ngos lyis ngah dyigop masyah nyhik las
dyi vzwvng ma bos lo shoq lhyent.
19 Nyang ngos lyis thomhbop mas doeuh kat;
ngos gas tsoh teh bweh loh.
20 Mangso eh, ngos nvng lyis lui laus eq nvng khanhamp eq ma toeuh;
ngos shvmanh dung lyis nvng ma gyo dyei.
21 Nvng ngos lyis nhaiq ma nyen lo kuot.
Nah yomsoq dvnganh yah ngos lyis shoeuhshih.
22 Nvng ngos lyis lyeis mas muot dang loh nhang.
Nvng ngos lyis Lyeismuh jyang mha toqh kat.
23 Nvng ngos lyis hau yuk khanghmuh xiklyis yung toh
uhpui loqkyoq shei das yvmas shwih loh nyeis zis ngos seq.
24 Cha ma yoh kuot lo dvdung zo;
dyoqbis loh nyeis soeu lhyi nvng chamus thyoq?note 30.24 Sonzoh ngis zis 24 Hebre mas bvng bvng ma mus.
25 Ngos yau cho bos bang yah dvgeh ngaus ku ma nghuot lhyeh?
Nyungs bang xiklyis nhaiqnyen ku ma nghuot lhyeh?
26 Ngos pyo cho yahge bvng zis lyis nghamhloms,
nghuot laus eq hauh gungsthaiq yau cho yahge chuot cho dvthuq los.
27 Chiq cho yahge nos zis gas ngos lyis lang chingh loh.
Dvnyeih thang lhyi dvnyeih xauh kham zo nyeis.
28 Ngos buis tso zis ma bos dah kuk cho mha loh;
ngos moqphung mha toq yap las pangh das xiklyis dung.
29 Ngos kuk las nhaiq ngis ngaus thwe ka ye khuih ngaus,
nghuot ya gola-u nghoq dah nyings thwe teh nghuot.
30 Ngah shoh noq los, ngos gungs ngeh las nos nyeis.
31 Xikpheh ngos gauslaus turiya xauhgyo joqyos,
gvshih kuk las ngaus thwe dvxauhgyo lo.