27
Yoba
1-2 Ngah lyi jus cho lhyi ngoek las ngah kang dwis cho lhyi khoh shoq kuot dyei,
dwis nyeis Yomzains Mangso mha ngos maukhi.
Mangso ngos lyis soq dyei toh dvchank,
ngah nhuotkuk gas ma gis zis khanhamp eq cha ma taiq das.
Ngah lhyo khanhamp eq hwah dang ma taiq kyoh das.
Ngos namoq jus oen khanhamp eq ma taiq das.
Ngos yobos ma bos cho ngos shei buisnyeis jweh shoq tungh taiq das.
Ngos dan das oen taiq goeus cho lhyi khanhamp eq ma katkhyoq das.
Ngah sohseq ehnyet gas shang shang nghuot.
 
Ngos lyis loqyom tyonh bang yahge ngos lyis tyi lha zan bang dvnganh
lhung soeu yahge ma dan soeu teh joeng zis xauh bas jungh.
Mangso ma bos bang xiklyis Mangso nyamoq kang lhyi yoeus tyamp shishenh lyis,
nyamoq xiklyis nghamhloms chank cha bos lo lah?
Yau cho los lyis Mangso ka nyamoq kaiq dung yvlyis xauhgyo dyei das lah?
10 Nyamoq gas nyang dyei dah gauslaus cho lhyi omes chah.
Nyamoq gas nyang lyis malyen lo shvmanh dung chah.
 
11 Mangso dah yomsoq kha iq kuh yvlyis ngos namoq lyis jyauh bah;
Yomzains Mangso cha toeuq cho lhyi phui kyoh bah.
12 Hai dvnganh yvlyis namoq nyang nyvng goeus;
housoeh lyis namoq chamus hau vjyuk ma bos zis taiq goh lah?
Zopha
13 Heika thyoqzo bang, lhung bang lyis
Yomzains Mangso khasoeh joeng cho nghuot.
14 Nyamoq yukgislo jens nyoshoq bos das,
laus eq nyamoq dvnganh jes mas gyoh das.
Nyah dah lo jens kha nhamp eq ma tham zo das.
15 Doeng nyeis shih bang gas nos shei das.
Nyamoq shei lhyi nyamoq dah chauhmuh jens yangh ma ngaus das.
16 Lhung bang gas ngwis ma thoq suon lo shoq yoh mvbeh.
Dyimis eq chah thoq lyis yoh joq.
17 Nghuot laus eq dius gis jens dvyhamh hauh dyimis wuot,
koptoq bang dvyuk yuk hauh ngwis yoh das.
18 Lhung soeu ka jvngkonh yhen teh,
nghuot ya yos zungh soeu jons dah yos zvng teh yhen tsain tsuk.
19 Thang thank dvlhain nyamoq gas dis zis yah yhet loh das.
Nyamoq soh los lyis nyamoq dah yoh khuiq cho xo ma nyvng lo.
20 Gyukphoh zis gas jeisphauq soeh nyetlos nyettant zan los;
nyenh lyis lyeis teh nyamoq lyis muot tangh loh das.
21 Buisthuq lyeis yah nyamoq lyis nyamoq yhen mhayah shenh loh das.
22 Nyamoq phang luiq das zis yomkat uhlyis
houka nyamoq lyis nhaiq ma nyen lo muot khyoq das.
23 Lyeis gas nyamoq wuih loh lyis muot tangh loh das.