21
Yoba
1-2 Ngos cha taiq nyeis yvlyis gyo dyei geh,
houka ngos namoq lyis dung dah nhaiqtaink cho nghuot.
Ngos lyis dang taiq das toeuh dyei geh;
namoq jwangh mes lyis ngos taiq thang lhyi jwangh geh.
 
Ngos lop zis gas dius yah tyi zis ma nghuot.
Ngos ma yoh jhen dah gis cho bos.
Ngos lyis yoeuh las mauh dvn geh,
housoeh mauh dvn zis yah namoq nhuot mas loq yah nghop geh.
Ngos mas cha bweh au oen nghamh lyis,
svsoh gyuk las ngah gungs loek loek ko los.
 
Mangso chamus ma gis bang lyis dwis nyeis nhang au?
Nyamoq lyis chamus kang xing lha nyeisgis yaplhoq nhang.
Nyamoq lo jens, nyeilo jens yoh.
Nyamoq gas hauh bang dvnganh bes los shoq zungh yoeuh nyeis.
Mangso ka nyamoq dah yhen mha dyoqbis zainsmuh ma she los dyei,
nyamoq nyeis yvmas gyukphoh cho khanhamp eq ma bos.
10 Nghuot goeus, nyamoq dah noeu nyhoeu lha,
yau cho ma bos noeulo suot los dyei.
11 Nyamoq loshang jens gas yvnglo jens teh wuih las lhoeu nyeis.
12 Toenk, khvlhank, janghau thwe yah tsain goh nyeis.
13 Nyamoq caiq lyis nyenstap zis yah nyeis lai las,
nos ma xauh tsoek yah shei loh.
 
14 Lhung bang gas Mangso lhyi, nyamoq jyank masyah thuq aq;
nyamoq nyah cho lhyi ma mes seq.
15 Nyamoq gas Mangso lhyi ma phuqsoe noh ge nghamh.
Nyang lyis shvmanh dung lyis chah vkyuh yoh das lah, ge.
16 Nyamoq gas nyamoq nyang yom yah ung das ge taiq.
Nghuot laus eq nyamoq dah nghamh cho lhyi ngos ma yoh lhom yoeus.
 
17 Lhung soeu dah bvng zis vshei loh ku lah?
Nyamoq mas dvyuk yuk dyoqbis zainsmuh vxauh ku lah?
Mangso nhaiqyo zis yah nyamoq lyis vjoeng ku lah?
18 Nyamoq lyis lyeis mas huhyau teh muot tangh las
lyeis jyang mha tsohmop lyis teh shenh loh.
 
19 Nvng gas Mangso lhyi, loshang dvyuk lyis nyah uwus dah yaunos gvng mas joeng aq ge sang.
Housoeh ma nghuot, Mangso ka yaunos yoh bang nyang lyis dvjoeng bas jungh.
Nyang gas nyamoq dah yaunos gvng mas nyang hauh zis kuot yvlyis chixoeuq bas jungh.
20 Yaunos kuot bang gas nyamoq nyang dah joeng cho kham bas jungh.
Yomzains Mangso dah nhaiqyo zis lyis kham yoeuh bas jungh.
21 Yah kang thank loh lyis, yah loshang jens pyo das lah,
oen yang jyoengh yoh zaih lhyeh?
22 Loeuswons bang lyis yangh soetuon soeu
Mangso lhyi dvyuk yuk yoh jyauh lhyeh?
 
23-24 Dius dvyhamh shei loh buisnyeis jweh shoq yanghzan zis yah nyeis.
Nyamoq gas pyo pyo nyens nyens shei loh.
Nyamoq gungsdom lyis vlhomuh nyhoeu toh.
25 Gohyhamh gas pyo cho ma bos.
Nyamoq nyeis las nhaiq khoh zis yah shei loh.
26 Nghuot laus eq dvnganh gas dvyhangteh shei lha nyhop zis xauh.
Nyamoq dvnganh lyis luk yah nghop tyamp.
 
27 Namoq mas hoeng phoh nghamh cho cha bos yvlyis ngos seq.
28 Namoq nyei zis gas, Gvshih hau ma gis zis kuot,
dius zains jens dah yhen khalhye nghuot, ge.
 
29 Nvng gyung suh bang yah ma jisgoh ku lhyeh?
Nvng nyamoq doms taiq los zis ma seq lhyeh?
30 Mangso nhaiqyo las joeng dah buisnyeis lyis,
lhung bang lhyi ma joeng.
31 Lhung bang lyis kauq das zis hank ma bos, \q2 nghuot ya nyamoq kuot goeus yvlyis lvto phuk das zis hank ma bos.
32 Nyamoq lyis vlhomuh zungh nyeis dah nyamoq lopkhyung,
lop khyam mha dvng loh lyis,
33 dius nyoshoq vzoh yah bos jens loh.
Tsoh yangh nyamoq mvng thoq mas noeuh noeuh nhamp nhamp joq.
 
34 Namoq gas, ngos lyis vjyuk ma bos zis tungh nhaiqtaink nyeis.
Namoq ngos lyis dyei dah phuk dang khanghmuh gas hwah zis dvnghuot.