20
Zopha
1-2 Yoba eh, nvng ngos lyis lhoeu nhunk.
Gvshih ngos phuk taiq das zis ma yoh jhen toh lo.
Nvng taiq zis ngos lyis laihwangh zis nghuot,
laus eq khasoeh phuk das zis ngos seq.
 
4-5 Yang cangsoeu dius lyis nyeisjvng mas cangxeih toh
dah gohlhain mhayah lhung bang hank eq
nyangh shoq ma yoh pyo zis gas
nvng jyoengh nyang seq.
Nyamoq khwank cho maukhung lhyi duons,
las nyamoq uhloms jyommauh lyis tanh laus eq,
nyamoq gas phvlhau teh muot dang loh das.
Nyamoq lyis seq ku bang gas,
Nyamoq khapheh loh au, ge mauh das.
Nyamoq gas yhetmoq teh, nyenh lyis dah nyoqnyvng
teh dyuk tyamp las khanhamp eq ma doms nyvng lo das.
Lhung bang gas nyamoq gyangh nyeis joqyos masyah dyuk loh das.
10 Nyamoq lo jens gas, nyamoq dah uwus moq nyungs bang jyank masyah khauh toh yvlyis, doms dyei das.
11 Nyamoq dah gungsdom gas noeuh las yangh.
Nghuot laus eq ma nyangh lyis nyamoq phvlhau pheh tauh loh das.
 
12-13 Nyamoq xiklyis ma gis dah whitau ka svsoh gis las,
nyamoq nhuot khau mha dvkhamh kat las nyah shom ngoms toh.
14 Nghuot laus eq nyah womdau mas hau zonoms gas lhangnyis duk teh khoh loh.
15 Lhung soeu ka nyang khauh toh dah zisyos duk thuq los.
Mangso ka nyah womdau masyah yangh hauh yvlyis doms yoeus.
16 Ma gis bang nyhau zis gas nyonoq teh nghuot.
Hauh zis gas duk bos dah lhangnyis chweh teh nyamoq lyis sat.
17 Nyamoq gas tsanlun coeu lvng nyvng shoq,
nghuot ya nauh yahge dyoyhei yaus dah jeislo lvng jens nyvng shoq ma nyeis das.
18 Nyamoq zwi khank las yoh dah zisyos dvnganh lyis tyamp chah.
Nyamoq dah nyeisgis cho lhyi gausyis das toeuh ma yoh.
19 Khasoeh ge lyis nyamoq gas shohjyen bang lyis zaiq las doeuh tyamp toh,
dvyuk yuk tsuk toh yhen lhyi yoeus.
20 Nyamoq dah nyoqnoq cho ka khanhamp eq nhaiq ma tap.
21 Nyamoq zo lyis cha eq ma nyet lo;
housoeh las gvshih nyamoq dah nyeisgis yaplhoq cho thank tyamp goeus.
22 Nyamoq nyoshoq yoh joq shih lyis
yau cho ka nyamoq lyis chank duons das.
Nhaiqkuk cho zainsmuh nyamoq thoq mas jweh los das.
23 Nyamoq o zis dvnganh zo nhang geh.
Mangso dah nhaiqyo zis gas nyamoq dah zonoms kuot das.
24 Nyamoq thyeq moengsa mhayah tungh phang luiq lyis
thunk nyo yah baiq khyoq das.
25 Nyamoq gungs masyah nyo nuot thuq los das.
Nyamoq dah suih masyah nyothyoh ying ying nuot thuq los das las,
nyamoq nhaiqlom mas gyuk dvn cho jweh das.
26 Nyamoq yung toh dah vyhang dvnganh dyoqbis tyamp.
Dius loq yah ma tap dah nyi yah nyamoq eq,
nyamoq yhenbang dvnganh ngeh tyamp.
27 Maukhung ka nyamoq yaunos lyis tuonhshet.
Nyeisjvng eq nyamoq lyis tyi lha kanghjyoeng kat.
28 Nyamoq dah nyeisgis cho dvnganh gas
Mangso dah nhaiqyo jeis nhauq yvmas dyoqbis tyamp das.
 
29 Heika ka lhung bang lyis Mangso toeuq dyei toh dah
uhpui loqkyoq nghuot.