15
Aiq Vlhain Jisgoh
Elipha
1-2 Vjyuk ma bos dang, Yoba eh, vjyuk ma bos dang!
3 Joeui bos soeu hank eq nvng teh ma taiq,
nghuot ya houteh vjyuk ma bos dang yah gungs gos dang ma taiq.
4 Nvng nvnyang cho loh lyis Mangso lhyi hank ma gyukwoms das,
nyang lyis shvmanh hank ma dung das.
5 Nvng taiq dang masyah nvng lhung cho dede thuq los,
nvng gas yik dah dang yah gos las tamh joq.
6 Ngos nvng lyis dang thang ma thyet noh,
nvng nvnyang taiq dangkhonh khanghmuh yah dvthyet nyeis.
7 Nvng gas cangxeih khoeu los dah dius nghuot oen nghamh lhyeh?
Mangso boms lyis kuot uhlyis nvng houmha nyeis lhyeh?
8 Nvng Mangso yah maukhung loeuswons bang dah huom cho lhyi bos xauhgyo lhyeh?
Dius dah joeui ka nvng yah kyingh sen lhyeh?
9 Nvng ngamoq ma seq zis cha eq ma seq.
10 Ngamoq gas uhthyoeu bang jyank masyah joeui xuq,
nyamoq gas namoq uwus ma khoeu shih lyis khoeu goeus.
11 Mangso nvng lyis nhaiqtaink cho dyei;
chamus hauh yvlyis peq tyamp nyeis shih?
Ngamoq nyah xiklyis dangkhonh yah yangh nyens nyens taiq.
12 Nghuot laus eq nvng gas sainh hwangh las
nhaiqyo zis yah ngamoq lyis nyoqtyi yoeuh.
13 Nvng Mangso yah nhaiqyo las nyang lyis kyoq kyoq taiq.
14 Cangsoeu dius gas jyoengh yoh gyingshang lhyeh?Ref 15.14-16: Yob 25.4-6
Dvyuk yuk Mangso xikkhonh mas yoh dan lah?
15 Mangso ka nyah loeuswons bang lyis yangh ma loms?
Maukhung yangh nyah nyoqlvtjvng mas ma gyingshang.
16 Ngamoq gas ma gis cho lhyi jeis soeh shuk las,
ngamoq dyoqbis goeus,
17 Gvshih Yoba eh gyo aq, ngos nyvng zis taiq bah.
18 Joeui bos bang gas nyamoq phauh thyeih moq jyank masyah
xuq dah jyoeng cho ngos lyis jyauh.
Hauh zis nyamoq nghop shung toh zis cha ma bos.
19 Nyamoq dah mau mas lvbaus ma bos nyeis.
Houmha nyamoq lyis Mangso mhayah shwih thuq loh das zis hank ma bos.
20 Gohyhamh bang lyis zaiq dah lhung bang gas dvcaiq yah shanghsenh.
21 Nyamoq no mas gyukphoh thwe nyings huomh toh das.
Nyamoq jesluiq ge nghamh nyeis uhlyis khyanktau los thyoq.
22 Sham chi bang gas dvyos masyah nyamoq lyis sat das ge
lhom nyeis yvmvyah, chuot masyah phang luiq das zis nghamhloms chank ma bos.
23 Lvngda gas nyamoq dah mvng zo das zis langh nyeis.
Nyamoq dah jweh das buisnyeis gas chuot yvlyis nyamoq seq.note 15.23 Nyamoq seq ge zis Hebre mas nyang khalhye nyeis khalhye shei.
24 Dyoqbis zainsmuh gas nyamoq lyis kyuk zis yah
yomsoq bos dah hwankti teh thyoq das zis langh nyeis.
25 Houka Mangso lhyi loqtsop yhonh bang,
Yomzains lyis toeu nghank bang dah uhpui loqkyoq nghuot.
26-27 Nyamoq gas khwank las gomloeus toq bang nghuot.
Nyamoq gas nyamoq dah gos lyis nhaiqlom than zis yah toeu lha
Mangso lhyi tyi lha zan das zis nyhenh loh.
28 Nyamoq gas Mangso dah domsyos ma gyo bang nyeis dah wus,
dyoq gyoh joq dah yvmas nyeis bang nghuot.
Houteh joqyos gas nhoengh zis xauh dah joqyos nghuot oen lomsjingh.
29 Nyamoq nyangh shoq ma dis nyeis das,
nyang sain zis cha eq ma goeng joq das, hauh siyet yangh dyuk tyamp das.note 15.29 Siyet ge zis Hebre mas bvng bvng ma nghuot.
30 Nyamoq gas chuot masyah ma yoh phang luiq das.
Nyamoq gas saiqko ngeh kyih dah saiqzains yah doeusgoh das.
Nyamoq lyis Mangso soq yah muot tangh tyamp das.
31 Nyamoq gas ma gis cho lhyi vkoh vpaq loms lyis gas
hau ma gis zis gas nyamoq xiklyis phauh ma dap lo.
32 Nyamoq dah shishenh ma jweh shih lyis nyamoq nyhauh loh das;
khanhamp eq ma doms nyaus lo nyhauh loh dah vko teh nghuot das.
33 Nyamoq gas zvbiq shih-kyei gywis dah zvbiq nwis teh,
vbuh khywi tyamp dah tsanlun zains teh nghuot das.
34 Mangso ma bos ge bang xiklyis dius jangh caiq ma bos das;
khauwhot yah tsuk toh yhen ka nyi yah mhont tyamp das.
35 Haih bang gas yau cho toeuq las ma gis zis kuot bang nghuot.
Nyamoq dah nhaiqlom mas vjangh mhuih cho yah dyingh joq, ge.