14
1 Yang dvnganh gas yomnhuk zis yah vshoh vjyen khoeu los.
Yah kang ka lyung las yau cho nyoshoq bos.
2 Yang bes los las ban teh lvnyap nyhauh loh;
Yang siyet teh dyuk loh.
3 Mangso eh, nvng ngos lyis yoeuh tsuk toh lhyeh?
Ngos lyis zaukauq las soetuon lhyeh?
4 Dius cangsoeu teh ma lhoq masyah lhoq zis
khanhamp eq cha ma yoh thuq los?
5 Nyah kang dah buisnyeis, lhamhmuh khyvp
kang dwis das zis lyis xik lyis yah thyet toh dyei goeus.
Nvng toh las hauh yvlyis ma yoh thaiq tyamp.
6 Yau dah nyah kang dwis cho thank shoq
nah nyoqnho nyah jyank masyah lhain loh aq.
7 Saiqzains thoeuq lhain laus eq hauh xiklyis nghamhloms cho bos.
Vkoq tot las yoh doms nyonh los.
8 Hauh vnyet cauh loh las,
vngot gas nyeisjvng mas yom tyamp laus eq,
9 jeissoq gvng mas hauh zis gas saiqlo zains teh vnyuk tot los das.
10 Nghuot laus eq dius shei lhyi houka thank goeus.
Nyang soqdom goeus ya nyang khalhye nyeis?
11 Jeislvng kanh loh teh,
thomhlo kyuk loh teh,
12 dius gas shei lha khanhamp eq ma toq los lo.
Nyamoq gas maukhung joq dvchank khanhamp eq ma soh los lo;
nyamoq yhet masyah khanhamp eq nhont zis ma xauh lo das.
13 Nvng ngos lyis shei mau mas tamh joq nhang mes;
nvng nhaiqyo zis lai shoq ngos lyis tamh nhang aq,
hauh thang lhyi ngos lyis soh das shishenh toeuq toh aq.
14 Dius gas shei goeus ya yoh doms dwis das lah?
Nghuot laus eq ngos gas zes gis shishenh lyis langh das.
Hai yau shishenh thank shoq langh das.
15 Hauh thang lhyi nvng lui das, ngos gas toeuh das las,
nvng kuot toh soeu ngos lyis nvng nhaiqdoeus das.
16 Nvng ngos bes cheh khanghmuh chank yoeuh las
ngah yaunos lyis ma zungh yoeuh dyei.
17 Nvng hauh yvlyis khyuot dyei las yoeus tyamp dyei das.
Nvng ngos kuot shuot zis dvnganh yvlyis buot tyamp dyei das.
18 Boms mas gvkhyot khyot las
goeng dah luktyoq khyot she loh.
19 Jeis yah luk lyis khyot loh das,
mau jyang yah nyeis coeu lyis cheih loh das;
housoeh kang dwis cho xiklyis dius nghamhloms yvlyis nvng thyoq tyamp.
20 Nvng dius thoq mas yomsoq chi lha nyang lyis vcaiq vto khat tyamp.
Nyah nyoqnho shei yvpheh thaiq loh.
21 Nyah lo jens nyoqnho ngelang yoh laus eq nyang khanhamp eq ma seq lo;
xoqphuh laus eq nyang lyis hank ma taiq kyoh.
22 Nyang nyah gungs mas khih zis lyis kyingh kham zo las,
nyah dyos kuk nyeis, ge.