13
1-2 Ngos nvng taiq zis dvnganh xauhgyo ku.
Ngos dvnganh seqgyo, ngos namoq seq nyhoq seq.
Ngos namoq o mha ma gyoh.
Nghuot laus eq ngos xamgoh mes zis gas nvng yah ma nghuot, Mangso yah dvnghuot.
Ngos ngah soe nyang yah taiq phyen-goh mes.
Namoq dah ma seq cho lhyi hwah zis yah nghop shung;
namoq gas hank lyis eq ma yoh yhoh dah lastsiang jens teh nghuot.
Namoq samlo nyeis ya, namoq joeui bos ge dvyuk yuk nghamh mvbeh.
 
Ngah soe taiq uhlyis gyo geh.
Namoq chamus hwah nyeis goh, namoq hwah zis gas
Mangso lhyi vkyuh dyei das oen nghamh goh lhyeh?
Namoq gas Mangso o khyvlyis kuot oen lhyeh?
Nyah soe lhyi soetuon jang mas taiq phyen-goh das lhyeh?
Mangso namoq lyis tanh tanh yoeuh lyis nyang gis zis xo nyvng das lah?
Nvng gohyuk lyis mhuih teh Mangso lhyi yoh mhuih das oen nghamh lhyeh?
10 Namoq nyoqnho ma khyen teh kuot laus eq
nyang namoq lyis than than nyho das.
11 Nyah yomsoq gas namoq lyis gyuk cho dyingh nhang das.
12 Namoq dah sodang gas nyiyvp teh yhung pvjus.
Namoq taiq goh zis eq thomhbop teh yomnhuk.
13 Samlo nyeis geh, ngos lyis taiq das toeuh dyei geh:
cha bweh lyis eq bweh goeus jungh.
 
14 Ngos ngah kang dyei das zis cicont nghuot.
15 Nyang ngos lyis sat das las ngos nghamhloms chank ma bos,
nghuot laus eq ngos nyang lyis ngah soe taiq das.
16 Lhung soeu ka Mangso xikkhonh mas ma womh yap yvmvyah,
haih zis gas ngos lyis jyoengh khyuot yoeus mvbeh.
17 Gvshih ngos taiq phui dang lyis gyo geh.
18 Ngos jus yvlyis ngos seq yvmvyah,
ngos ngah soe taiq das zis cicont nghuot.
 
19 Mangso eh, nvng ngos lyis kauq das zis los lhyeh?
Housoeh nghuot lyis gas ngos samlo shei loh das zis cicont nghuot.
20 Ngos lyis hai aiq ja jenh dung nhang aq;
housoeh lyis ngos nvng lyis ma tamh das.
21 Ngos lyis vjoeng lo, nah gyukphoh zis yah ngos lyis vthungh thyi tyamp.
 
22 Mangso eh, taiq shih taiq aq, ngos toeuh das;
nghuot ya, ngos lyis taiq nhang lha nvng ngos lyis phuk taiq aq.
23 Ngos ma gis cho yahge yaunos khanyhoq kuot goeus?
Ngos cu cho yahge ngah yaunos ngos lyis chixoeuq aq.
 
24 Nvng ngos lyis chamus jhank?
Ngos lyis nah jeswus teh chamus kuot?
25 Nvng ngos lyis kyuk das lah? Ngos gas saiqhuq kyingh dvnghuot.
Nvng gas huhyau kyuk dvkhvt lyis dvzan nyeis.
 
26 Nvng ngos lyis tyi lha khoh khoh tsuk cho she los,
ngah loyvm yoq lyis dah yaunos lyis yangh taiq pau.
27 Nvng ngah khyei lhyi kyomh kyomh toh,Ref 13.27: Yob 33.11
ngos bescheh khanghmuh zungh yoeuh nyeis,
ngah khyeiyos lyis yangh kyink nyeis.
28 Hauh vthang ka ngos gas saiq bop teh,
naus zo dah dyimis teh yom loh.