11
Zopha
1-2 Zopha gas, Hai vjyuk ma bos yvlyis hank eq ma phuk das.
Dang nyoshoq taiq zis gas nvng lyis jus ge dyei das lah?
3 Yoba eh, ngamoq nvng lyis ma yoh phuk taiq oen nghamh lhyeh?
Nvng jwangh dah dang gas ngamoq mas tsoeklo joq das lhyeh?
4 Nvng taiq lyis, nvng lomsjingh zis jus;
nvng Mangso nyoqlvtjvng mas gyingshang ge toenk toenk taiq.
5 Mangso nvng lyis phuk taiq nhang mes.
6 Nyang gas nvng lyis joeui cho vja ja lyis taiq kyoh das;
vyhang ka dius dah seq cho thoq lyis sunk noq.
Mangso ka nvng lyis kham vvng thoq lyis shauh las joeng nyeis.
7 Nvng Mangso dah kuhxing cho yahge yomsoq lyis
thank shoq yoh xo yoeuh lhyeh?
8 Mangso dah joeui ka maukhung thoq lyis zes nyhang.
Mangso ka shei mau lyis seq laus eq nvng gas ma seq.
9 Mangso dah kuhxing cho ka nyeisjvng thoq lyis zes dvm,
thomh thoq lyis zes lvm.
10 Mangso ka nvng lyis nyhik las zaukauq yvmas shwih loh lyis
nyang lyis tomp toh das zis hank nyeis?
11 Mangso ka khah dius jens vkyuh ma bos zis seq,
nyamoq dah ma gis zis kuot cho dvnganh nyvng.
12 Ye mauhlyihzoe dius thuqsoengh lyis,
koh bang joeui bos zoh los das.
13 Yoba eh, nvng nah nhaiqlom lyis jus jus toh las,
nah loq Mangso jyank pheh toeu aq.
14 Ma gis cho yahge shuot cho lhyi nah yhen mhayah yoeus tyamp aq.
15 Housoeh nvng mas xoqphuh cho ma bos das las nvng ma gyuk das.
16 Housoeh lyis jeis je zis lai las ma soh lo teh
nah yau cho dvnganh nvng soh nyeis masyah shen dyuk loh das.
17 Nah kang ka nyeihgungs buis tso thoq lyis zes bvng das,
kang dah mauchuot thank shishenh gas nyoq nyvng los lyis teh bvng das.
18 Nvng jesluiq las nghamhloms cho dyingh dyingh yah nyeis das.
Mangso nvng lyis gos las noyos dyei das.
19 Nvng nah jeswus jens lyis ma gyuk noh.
Dius nyoshoq nvng lyis pangh cho sang das.
20 Lhung bang gas yomgyau zis yah yvmlhaink yoeuh laus eq
phang luiq cho xo ma nyvng.
Nyamoq dah nghamhloms cho ka shei das cho kyingh dvnghuot, ge.