10
1 Ngos kang dwis nyung goeus, ngos nhaiqkhoh zis yah noskyingh yvlyis gyo dyei aq.
2 Mangso eh, ngos lyis dang thang vthyet.
Nvng ngos lyis tsuk cho cha nghuot zis taiq aq.
3 Nvng hou iq lhoeng das zis gas nah xiklyis jus lhyeh?
Nvng nvnyang loq yah kuot toh yvlyis choqh lhyeh?
Lhung bang toeuq cho mha bos gaus lhyeh?
4 Nvng vyhang lhyi ngamoq nyvng teh nyvng lhyeh?
5 Nah kang ngamoq kang teh lyung lhyeh?
6 Housoeh lyis nvng ngah yaunos lyis xo lha
ngah yobos lyis chamus choq yoeuh.
7 Ngos yobos ma bos zis nvng seq,
ngos lyis nah yomsoq masyah hank ma yoh khyuot zis eq nvng seq.
8 Nah loq yah ngos lyis toeuq las gvnkhanh toh.
Gvshih hauh loq yah ngos lyis mhont.
9 Nvng ngos lyis tsohnyhon masyahnote 10.9 Tsohnyhon masyah ge zis Hebre mas tsohnyhon teh, ge bos. kuot toh yvlyis soh aq.
Nvng ngos lyis tsohmop mas doms thungh thyi das lhyeh?
10 Nvng ngos lyis ngah ungwes ung mha jeis soeh huot kat las,
ngah gungs houmha bes zoh los.
11 Nvng ngah gungs lyis shoh gyi yahge shohyau yah vzwvng kuot las,
shohyau lyis gyi yahge shohyeis yah nghop dyei.
12 Nvng ngos lyis kang yahge goeng joq dah jyetdap cho dyei,
nvng gomh toh yvmvyah ngos kang dwis nyeis.
13 Nghuot laus eq nvng ngos lyis nos nhang das
ge gauh toeuq nyeis cho gvshih ngos seq.
14 Ngos yaunos kuot lyis nvng chank comh las,
ngos lyis yobos khyuot dyei das zis nvng he.
15 Ngos yaunos kuot yah dvyih ngos gas yau cho mha jweh joq.
Nghuot laus eq ngos jus zis kuot lyis nyings ma hoeuh, shohjyen lha xoq dvphuh.
16 Ngos ung cho cha ma yoh lyis, nvng ngos lyis khangkhyi teh khat las,
ngos lyis nos nhang das zis yomsoq muh yangh kuot.
17 Nvng ngos lyis tyi dah kanghjyoeng vjangh yoh;
nvng ngos lyis nhaiqyo cho zes zes je los.
Nvng zan cho vsaiq vjangh cvvq nyeis.
18 Mangso eh, nvng ngos lyis chamus khoeu los nhang?
Ngos lyis hank eq ma nyvng shih lyis shei gis.
19 Ung mhayah lop pheh dan loh das zis gas
khanhamp eq ma nyeis teh gis.
20 Ngah kang vluk thank loh goeus ma nghuot lhyeh?
Nghuot lo goeus jungh.
Ngos thuq loh das shishenh lyis ngos lyis gaus nhang aq.
21 Ngos loh bah ge goeus las ma tauh los lo das.
Chuot las nhaiqkuk nhaiqngis phoh mau pheh loh.
22 Bvng zis yangh chuot joq dah mau,
chuot zis yahge siyet bos las khamkhvv dah mau nghuot.