YOHAN
CANGXEIH VLHAIN HUON MAUSSAUH
(1 JOHN)
Hauh cho jyauh bang taiq zis gas, khyuot yoeus cho ge zis gas, haih nyeisjvng mas zo das, shuk das, nyeis das cho mha yaukyenh shanghsenh chiqjyen cho mhayah lhuiq kat xauh das xiklyis eq, khyuot yoeus cho ka dius dah wotwu yahge dvyuk yah dvyuk jyetdap goh cho yah cha ma sen, ge eq tsain jyauh. Hauh bang dah jyauh cho lhyi taiq nhoeuh tyamp khyvlyis yah maussauh lhaih soeu ka; Yesu Khristu gas cangsoeu dius gyingh lyih duot ku goeus cho debangh taiq kyoh toh goeus. Hauh thoq ma goh Yhensain Yesu Khristu lyis lomsjingh las Mangso lhyi jyetdap bang dvnganh gas nyang changh nyang eq jyetdap goh chah cho wangh wangh taiq toh goeus.
1
Vcaiq Vto Kang ge dah Dang
1 Cangxeih lyis yah nyeis, hauh kang dwis dang dah cho namoq jyank mas ngamoq lhaih kat. Ngamoq hauh zis lyis xauhgyo ku goeus. Nyoqjeih yah eq, nghuot goeus ngamoq nyvng eq nyvng ku goeus, ngamoq loq yah eq tanh ku goeus.Ref 1.1: Yoh 1.1
2 Hauh kang thuq los uhlyis ngamoq hauh zis lyis nyvng ku goeus. Housoeh las ngamoq hauh cho lhyi kanghjyoeng tsain kat. Uwus yah dvgeh nyeis ku goeus hauh vcaiq vto kang ka ngamoq jyank thuq los las ngamoq hauh kang cho namoq lyis taiq kyoh.Ref 1.2: Yoh 1.14
3 Ngamoq gas Uwus Mangso yah eq, Lo Yesu Khristu yah eq, zomh ku goeus las namoq eq ngamoq yah dvgeh yoh zomh bas jungh, ngamoq gyo ku, nyvng ku dah cho ngamoq namoq lyis taiq hoeuh.
4 Ngamoq gas hau gausyis cho namoq mas top jweh los bas jungh oen haih maussauh lhaih kat.
Mangso ka Bvng zis
5 Mangso ka bvng zis nghuot las Nyang mas chuot zis ma bos. Haih Mangso dang lyis nyah lo masyah ngamoq xauhgyo ku goeus gvng mas namoq lyis taiq kyoh.
6 Yang gas nyang yah yoh zomh nyeis goeus ge las mauchuotdwang mas suh e nyeis shih lyis gas yah dang mas eq, yang kuot dah muhzoh mas eq, yang hwah bang tsain nghuot.
7 Nghuot laus eq, nyang gas bvng yvmas nyeis teh, yang eq bvng yvmas suh e nyeis lyis gas yang dvyuk yah dvyuk nyang changh zomh goh nyeis bang nghuot las nyah lo Yesu dah suih gas yang mas bos dah yaunos lyis cheihshang tyamp dyei goeus.
8 Yang yobos ma bos ge taiq lyis gas, yah gungs lyis yvnyang hwah bang tsain nghuot las yang gas dan cho ma bos bang tsain nghuot.
9 Nghuot laus eq, yah yaunos lyis Mangso xikkhonh mas Chixoeuq las rhen zis yah shangphu lhyi ka, nyang gas nyah dangthoengh mas doengs joq las hauh dan dah muhzoh lyis kuot soeu nghuot gvng mas, yah yaunos lyis khyuot tyamp dyei das zis yahge kuot cu cho dvnganh masyah cheihshang tyamp dyei das.
10 Yang yaunos ma kuot ge taiq lyis gas, yang Mangso lhyi hwah soeu kuot nhang lha Mangso dah dang eq yah jyank mas ma bos.