52
Mangso Yerusalem lyis Khyuot
1 Yerusalem gas yombos las doms kuhxing das!Ref 52.1: Nyoq 21.2, 27
Mangso dah gyingshang wus eh, shoenkkhyi yah wuot toh aq.
Mangso lhyi ma seq bang nah khyam khomh mas khanhamp eq ma doms wvng das.
2 Yerusalem eh, nah gungs lyis ko tyamp aq.
Phvlhau mhayah toq las nah hwankti tank mas tsung aq.
Jonsdoeus dah Zion dius jens eh,
nvng lyis twih dah shamjvng phui tyamp aq.
3 Yomzains Yhensain nyah dius jens lyis heisoeh ge: Namoq jonsdoeus loh lyis ngwis ma dyei zis yah dvyhangteh namoq doms luiq das nyhenshang ngwis ma gyoh noh.
4 Namoq Egutu mas boengh e duot nyeis das xiklyis vsainnyang ehnyet yah loh. Nghuot laus eq Asiria jens gas nyamoq xiklyis chah phauh ma dyei tsoengh shwih loh.
5 Babilon mas eq houyah dvyhangteh bweh. Namoq jonsdoeus loh, namoq xiklyis cha ma dyei. Namoq lyis guon bang gas moengs, khwank zis yah ngos lyis vjangh loeusmus soqzo.Ref 52.5: Rom 2.24
6 Jweh los das shishenh lyis ngos Mangso nghuot las ngos namoq cha bweh das zis taiq cho lhyi namoq yoh seq das.
7 Boms jens lyis lai las loeus gis,Ref 52.7: Nah 1.15; Rom 10.15; Eph 6.15
nyenstap loeus wons los dah khyei ka kha iq yungh joq lah!
Nyang gas Khyuot yoeus cho lhyi taiq hoeuh zis yah
Zion lhyi taiq zis gas,
Nah Mangso ka Hwankti nghuot, ge.
8 Wus zungh bang kaiq,
Gaus zis yah dvgeh tsain kaiq.
Zion pheh Yhensain tauh los yvlyis
nyamoq nyang nyoqjeih yah yoh tsain nyvng.
9 Yerusalem mas dah jyamhjyuklhyuk joqyos jens eh,
gauslaus zis yah kaiq geh:
Yhensain ka nyah wus lyis khyuot las
nyah dius jens lyis nhaiqtaink goeus.
10 Yhensain ka nyah gyingshang yomsoq lyis yhung das.
Nyang nyah dius jens lyis khyuot yoeus das las
hauh yvlyis mungkvn gonh nyvng das.
11 Yhenmuh vyhang dvng bang dvnganh eh,Ref 52.11: 2Kr 6.17
Babilon masyah thuq das cho sont geh.
Tung toh vyhang lhyi vzangh tanh goh.
Namoq nyang gungs gyingshang nhang lha thuq geh.
12 Haq lhain ka namoq gyen gyen thuq das zis ma nghuot.
Phang teh eq ma thuq:
Yhensain, nah Mangso namoq lyis
shot khanghmuh mas gos las cho she das.
Shanghsenh dah Jyeidwis
13 Yhensain taiq,
Ngah jyeidwis gas nyah muh mas ung los das.
Nyang nyhang nyhang chunghtoq zis xauh das.
14 Dius nyoshoq nyang lyis nyvng lyis svsoh dvn.
Nyang gas dius teh ma doeus lo shoq gungskhyank dyoq.
15 Nghuot laus eq gvshih dius nyau jens nyoshoq nyang lyis tsain mauh.Ref 52.15: Rom 15.21
Hwankti jens eq mauh las dang ma yoh taiq lo das.
Nyamoq nyvng las khanhamp eq ma seq ku dah
seqgyo cho bos los.