50
1 Yhensain heisoeh ge:
Nyah yhensain nyhiq lyis kangh tyamp soeu teh ngos ngah dius jens lyis kangh tyamp oen nghamh goh lhyeh?
Housoeh lyis hau kangh maussauh khalhye gah?
Nyah lo jens lyis jons ungh soeu teh ngos jonsdoeus yvpheh ungh kat oen nghamh goh lhyeh?
Housoeh ma nghuot, namoq dah yaunos gvng mas namoq jonsdoeus loh.
Namoq dius sat yobos gvng mas namoq jons loh.
2 Ngos ngah dius jens lyis khyuot das xiklyis loh lyis
nyamoq chamus ma phuk taiq? Ngos lui lyis nyamoq chamus ma toeuh?
Nyamoq lyis khyuot yoeus das zis ngos yom sunk nhuk lhyeh?
Ngos thomh lyis vmingh yah yoh kyuk nhang.
jeislvng jens eq sihmuis yos thaiq loh las
houmha dah oengdoq eq jeis ma yoh las tsain shei.
3 Ngos maukhung lhyi yoh noq nhang.
Houka shei soeu xiklyis kuk bang dyi noq wuot teh nghuot.
Domsyos gyo dah Jyeidwis
4 Yomzains Yhensain ka
ngos nyungdaus bang lyis yom yoh dyei das xiklyis cha taiq das cho jyauh.
Nvp yau nvp nyang ngos lyis jyauh das cho
xauhgyo shoq ngos lyis nhaiq wvng nhang.
5 Yhensain ngos lyis seqgyo cho dyei las,
ngos gomloeus ma toq,
nghuot ya nyah jyank masyah ma tauh loh.
6 Ngos lyis lyuk bang lyis ngah gvnungh kham,Ref 50.6: Mat 26.67; Mak 14.65
ngos lyis ma phauh gis kuot bang, nhuotmi khuot bang,
nyoqnho mha svkanh dyeh gyon bang lyis ma tomp tyamp.
7 Yomzains Yhensain ngos lyis pangh cho dyei yvmvyah
nyamoq dah laihwangh cho ngos lyis ma yoh nos nhang.
Ngos hauh yvlyis yoh kham shoq ngvnyang thoenk toh.
Ngos xoq ma phuh das zis ngos seq.
8 Yhensain ka ngos yah ni nyeis lasRef 50.8-9: Rom 8.33-34
nyang ngos mas yobos ma bos zis kyink thuq kat das.
Dvyuk yuk ngos lyis zau hank womh kauq?
Soetuon jang mas dvgeh e goh.
Nyang kauq cho chi los bas jungh!
9 Yomzains Yhensain nyang ngos lyis khomp dyei -
housoeh lyis ngos yobos bos ge hank yoh kyink.
Ngos lyis zau kauq bang dvnganh dyuk loh das.
Nyamoq gas dyimis lyis naus zo teh dyuk loh das.
10 Namoq Yhensain lhyi gyukwoms bang yahge,
nyah jyeidwis dang lyis domsyos gyo bang dvnganh eh,
namoq suh dah cho ka jyoengh chuot mvbeh,
nghuot laus eq Yhensain lhyi loms aq, nah Mangso lhyi nges aq.
11 Namoq Mangso lhyi ma loms,
vsainnyang nyi tuonh las loh bang eh, namoq hauh yvmas suh nyeis geh.
Yhensain nyang haih zis bweh nhang das.
Namoq shanghsenh xauh kham das.