46
1 Heika Babilon mangso jens dah vthang nghuot.
Bel yahge Nebo lyis xik pheh paiq khoq, nghuot laus eq
gvshih gas mauhlyihzoe jens thoq mas yvwons zwis toh.
Nyungdaus dah gaunyhauq dah gvnungh mas yvwons bweh joq.
2 Phvra jens gas nyamoq nyang ma yoh khyuot yoeus zo.
Nyamoq nyhik las yoeus loh goeus.
Heika Babilon dah mangso jens xiklyis vthang nghuot.
3 Yakop dah vnyau vshih jens,
ngah dius jens mas nyet shih bang dvnganh eh, ngah dang gyo geh,
khoeu los lyis yah ngos namoq lyis nyhoeu tsoh kat.
4 Ngos namoq Mangso nghuot las,
namoq mang las cam thyoeu shoq ngos namoq lyis dyangh das.
Ngos namoq lyis kuot toh las namoq lyis gomh das.
Ngos namoq lyis pangh cho dyei las khyuot kat das.
5 Namoq ngos lyis hank yah byi das ge Yhensain taiq.
Ngos yah doeus zis dvyuk yuk bos lhyeh?
6 Dius jens gas nyamoq ngwis thung phank las xing huot khyoq.
Nyamoq jvng mas ngwis tsain laiq.
Nyamoq xing shonh soeu lhyi nghoh las mangso kuot lho lha,
nyamoq hauh yvlyis gop las tsain paiq.
7 Nyamoq hauh yvlyis nyamoq kvtoq mas toeu kih las wuq.
Joqyos mas toh lyis hauh zis houmha joq,
hau joq masyah ma yoh cheh loh.
Dvyuk yuk hauh yvlyis dung lyis ma yoh toeuh dyei,
nghuot ya nyang lyis dyoqbis zainsmuh masyah ma yoh khyuot yoeus.
8 Namoq yaunos wons bang eh, haih zis soh geh.
Ngos kuot goeus yvlyis nghamh yoeuh geh.
9 Gohlhain cha bweh ku zis soh geh.
Ngos dvyuk kyingh Mangso nghuot yvlyis seq geh,
ngos yah doeusgoh zis hank ma bos.
10 Cangxeih lyis yah ngos vkyuh lyis uhlhomh taiq toh.
Gohlhain yah cha bweh los das zis taiq toh.
Ngos nghamh toeuq cho khanhamp eq ma dyoq loh das,
ngos kuot mes cho dvnganh kuot das oen taiq toh.
11 Ngos buisthuq pheh yah dius dvyuk los das xiklyis lui nyeis.
Nyang gas zonsmuh teh dang gyoh los las
ngos nghamh toeuq toh cho nyuk shoq kuot dyei.
Ngos taiq toh goeus las hauh zis bweh los das.
12 Dan cho yah we joq ge nghamh dah ehnyet than bang eh,
ngah dang gyo geh.
13 Ngos hau dan cho ni shoq shwih los.
Houka ma we,
ngah khyuot yoeus cho lhyi ma sheq toh.
Ngos Yerusalem lyis khyuot yoeus das las
houmha Israel lyis nyoqnho ngelang dyei cho she los.