40
Nghamhloms Dang
Ngah dius jens lyis nhaiqtaink geh,
nyamoq lyis nhaiqtaink geh! ge yah Mangso taiq.
Yerusalem mas bang lyis yomdyei geh.
Nyamoq xauh kham zis nyangh goeus las gvshih nyamoq dah yaunos khyuot dyei goeus.
Nyamoq dah yaunos dvnganh gvng mas ngos nyamoq lyis dyingh shoq joeng las thank goeus, ge.
 
Kaiq thwe dvkoeuq thuq los,Ref 40.3: Mat 3.3; Mak 1.3; Yoh 1.23 Ref 40.3-5: Luk 3.4-6
Mhanhdyvp mas Yhensain dah cho lhyi sont toh geh!
Yah Mangso xiklyis Sihyos pa mha talhoeu soq geh.
Langhkhau khanghmuh yoh tyink das.
Boms khanghmuh, jing khanghmuh lyis chink khyoq das.
Cho yauhyot lyis yoh xiq das.
Hauh thang lhyi Yhensain dah phunk thuq xoeuq das las,
suihshoh bos bang dvnganh nyvng das.
Yhensain nyah nhuot yah taiq goeus.
 
Kaiq thwe thuq los zis gas,Ref 40.6-8: Yak 1.10-11; 1Pt 1.24-25
Loeus taiq hoeuh aq, ge lyis ngos gas,
Ngos chah loeus taiq hoeuh das, oen.
Suihshoh bos bang dvnganh gas mhanh teh nghuot;
Nyamoq gas mhanh buh thoq lyis ma nyangh.
Yhensain lyeis muot los nhang lha
mhanh gas kyuk las ban eq nyhauh loh.
Dius jens eq mhanh thoq lyis ma zes yoh kham.
Mhanh kyuk las ban nyhauh laus eq
yah Mangso dang gas vcaiq vto goeng joq, ge.
 
Yerusalem eh, boms nyhang thoq mas doq las loeus gis taiq hoeuh aq.
Zion eh, thwe than yah kaiq aq, loeus gis taiq tyo aq!
Vgyuk, taiq thuq aq, nyamoq dah Mangso jweh los nyeis oen
Yuda wus jens mas taiq aq.
 
10 Yomzains Yhensain kaRef 40.10: Esa 62.11; Nyoq 22.12
yomsoq yah guon das zis
nyang khyuot yoeus toh goeus bang lyis shwih las los nyeis.
11 Nyang gas yvng yoeuh soeu teh nyah yvng phung lhyi gomh das;Ref 40.11: Ezk 34.15; Yoh 10.11
Yvnglo jens lyis dvgeh tsainh las nyah loqyom mas po das,
Yvngzains jens lyis zoh yah shwih das.
Ma yoh byi dah Israel Mangso
12 Dvyuk yuk thomh jeis lyis nyah loqkhyont yah yoh laiq las,
maukhung lhyi nyah loq yah yoh thu lhyeh?
Dvyuk yuk tsohmop lyis kom masyah, boms jens jing jens lyis jvng mas yoh laiq lhyeh?
13 Dvyuk yuk Yhensain lhyi cha kuot das zis yoh taiq lhyeh?Ref 40.13: Rom 11.34; 1Kr 2.16
Nyang lyis hank jyauh? Nyang lyis joeui hank dyei?
14 Mangso ka vyhang khasoeh kuot toh das zis seq das zis yahge
seqgyo las xuq das xiklyis hank yah xamgoh?
 
15  Yhensain xiklyis dius nyau jens gas cha ma nghuot.
Jeiszoq thoq lyis ma zes.
We mau goeujo jens gas, phvlhau teh somh.
16 Lebanon saiq khyam mha dah yewus dvnganh gas
ngamoq dah Mangso lhyi dvlhain phudyei das xiklyis ma tham,
houmha saiqzains jens eq ngheq das thangh kuot das zis svsoh nain.
17 Dius nyau jens gas nyah xiklyis cha eq ma nghuot.
 
18 Mangso lhyi hank yah yoh byi das lah?Ref 40.18-19: Lgy 17.29
Nyang gas cha yah doeusgoh oen nvng khasoeh yoh taiq kyoh das lah?
19 Nyang gas gungslho thwang lha
ngwis xing shonh bang gas ngwis yah nyhoeuh,
xing yah shauq toh dah Gungslho yah ma doeusgoh.
20 Ngwis xing ma yoh thyeq soeu ka,
ma cuih dah saiq lyis khyen lha
ma lains das gungslho lhyi thwang das xiklyis
lyes dah loqmuh dap soeu lhyi xo.
 
21 Namoq ma seq lhyeh?
Gohlhain yah namoq lyis ma taiq kyoh ku lhyeh?
Mungkvn khasoeh xi los cho ma xauhgyo ku lhyeh?
22 Nyeisjvng dah vthoq pheh,
maukhung dah thyitvp pheh nyah hwankti tank mas tsung soeu kuot toh.
Hauh o mha dah dius jens lyis gas janghgyik jens teh ngis ngis dvnyvng lo.
Nyang gas maukhung lhyi gosseh teh lhywa lha,
nyeis das zvng teh kuot toh.
23 Nyang gas yomsoq bos dah guon bang lyis khyoq las,
nyamoq lyis vkyuh ma bos mus nhang.
24 Nyamoq gas dvtoh las vnyet ma chent dah jyo lo zains teh tsain nghuot.
Yhensain lyeis muot nhang lhyi
hauh vzains jens gas kyuk loh las
nyoq kyuk lyis teh muot tangh tyamp.
 
25 Gyingshang Mangso lhyi hank yah yoh byi das?
Nyang yah doeusgoh soeu hank bos lah?
26 Maukhung lhyi nghank yoeuh aq,
Nvng nyvng dah kyi jens lyis hank gvnkhanh toh?
Jes dvphung lhyi shwih thuq soeu ka
houmha khanyhoq yuk bos zis seq las
dvyuk dvyuk nyings yoeus las lui teh nghuot.
Nyah yomsoq gas svsoh kuhxing lha
dvkoeuq eq khanhamp ma dyuk.
 
27 Housoeh lyis Israel eh, Yhensain nah yau cho ma seq dyei,
nvng ma jus khyvlyis xauh kham yvlyis
ma yoeuh dyei oen chamus lop goh?
28 Nvng ma seq lhyeh? Ma xauhgyo ku lhyeh?
Yhensain ka mathank magons Mangso nghuot.
Nyang mungkvn gonh lyis gvnkhanh toh.
Nyang khanhamp eq ma nyung ma daus.
Nyang nghamh cho hank eq ma daq gyo dyei.
29 Nyang gas nyungdaus bang,
yomnhuk bang lyis yombos nhang.
30 Loyvm jens yomnhuk las.
Loyangh jens daus las lains das.
31 Nghuot laus eq Yhensain lhyi
pangh cho loms toh bang gas yomsaiq xo nyvng das.
Nyamoq zonsmuh teh dang doq das.
Nyamoq wuih lyis eq ma nyung,
suh lyis yom ma nhuk.