36
Yerusalem lyis Kyuk
(2Hw 18:13-27; 2Ss 32:1-19)
Yuda hwankti Hezekia guon zis dvci nyei vzvn lyis Asiria hwankti Senakherib gas Yuda ciank ci wus jens lyis los zan yoeus loh. Asiria hwankti ka nyah jeszau zains lyis jesphung zainsmuh yah dvgeh Lakhish wus masyah Yerusalem pheh loh las hwankti Hezekia vsomh kham das nyhenshang taiq aq, ge vmingh dyei. Hauh zau gas khying cauh muh zwi bang dah janggyon pheh loh cho, goq pheh thomhlo mas dah jeis she lyih dah jeiskhyoh yvm mas los tsain dyingh joq. Hwankti yhen guon soeu ge Hilkia lo Eliakim; muh sain Shebna; comh soeu Asap dah lo Yoa moq ge, Yuda jens Somh yuk hauh soeu yah e thuq xauhgoh. Hau Asiria zau nyamoq lyis taiq, Hwankti Hezekia lyis cha yah nghamhnywe nhang nyeis cho Asiria hwankti seq mes. Nvng jeszan das xiklyis lyes, yomsoq bos ge zis yah yoh bweh das oen nghamh lhyeh? Nvng lyis hank pangh das oen nghamh las Asiria hwankti lyis gomloeus toq lah, ge sang. Nvng gas Egutu pangh das ge nghamhloms nyeis, nghuot laus eq hauh zis gas jvmbu yah lhamloq kuot teh dvnghuot; hauh zis gyau las nah loq mas zoeu das. Houka dvyuk yuk Egutu hwankti lhyi nges lyis housoeh teh nghuot, ge.Ref 36.6: Ezk 29.6-7
Asiria zau jens tsoq taiq. Namoq gas Yhensain, namoq dah Mangso lhyi nges toh ge nvng ngos lyis ma taiq das lhyeh? Hezekia gas Yuda jens yahge Yerusalem mas dah dius jens lyis phon dvkoeuq mas chomp paiq das ge taiq uhlyis nyang thyoq tyamp dah zvng yahge phon jens gas Mangso zis nghuot. Asiria hwankti nyings masyah ngos nvng lyis goeus taiq khyoq bah, nvng nyang ji dius yoh xo das lyis ngos nvng lyis nyang aiq khyoengh dyei das. Nvng gas ngis thank Asiria zau lyis yangh ma yoh zan ung zis Egutu bang nvng lyis jeslhyingh yahge jes nyang dvp nhang dyei das zis nghamhloms nyeis lhyeh? 10 Ngos namoq dah mau lyis Yhensain dah pangh cho ma bos bos zan las mhont tyamp oen nghamh goh lhyeh? Yhensain nyang, ngos lyis zan las mhont das xiklyis taiq goeus, ge.
11 Hauh thang lhyi Eliakim, Shebna yahge Yoa ka jeszau lyis, Ngamoq lyis Hebre nyingh vkat, Aramik nyingh kat aq ngamoq daq gyo, wusciank thoq mas bang dvnganh gyo nyeis, ge.
12 Nyang phuk taiq zis gas, Nvng yahge hwankti lhyi kyingh haih dang taiq kyoh das xiklyis hwankti ngos lyis nhang kat oen nghamh lhyeh? Ma nghuot, Wusciank thoq mas tsung toh las namoq teh nyamoq nyang dah khyeih yheih zo shuk bang lyis taiq das nyhenshang ngos lyis nhang kat, ge.
13 Jeszau toq yap las Hebre nyingh yah than than taiq, Asiria hwankti namoq lyis cha taiq nyeis zis gyo geh. 14 Hezekia namoq lyis ma mhuih jyomh nhang das xiklyis hwankti namoq lyis zaih nhang. Hezekia namoq lyis ma yoh khyuot yoeus. 15 Namoq Yhensain lhyi nges das cho vlos jyoeuq nhang goh. Yhensain ka Asiria jesphung namoq wus lyis zan yoeus das mhayah yoh tomp las namoq lyis yoh khyuot yoeus das oen vnghamh goh. 16 Hezekia dang vgyo goh. Asiria hwankti vmingh gas, Namoq wus masyah thuq los las vsomh kham geh. Housoeh lyis namoq dvnganh hank eq hank nyang zvbiq nwis mas dah shih, maiphang zains mas dah vshih xauh zo das. Vsainnyang jeisdwang mas dah jeis xauh shuk das. 17 Houka Asiria hwankti namoq lyis namoq nyang mau teh shuk das zvbiq dyei dah zvbiq nwis bos, ohlhyoq xiklyis sunghso zains bos dah mau mas ma toh dvchank nghuot. 18  Yhensain ka namoq lyis khyuot yoeus das, ge namoq lyis nghamh nhang dah Hezekia koh yenh yvlyis vgyo goh. Gohnyau bang dah mangso jens gas nyamoq dah mau jens lyis Asiria hwankti loq masyah khyuot kat ku lhyeh? 19 Gvshih Hamat yahge Arpad mangso jens khalhye gah? Sephawaim dah mangso jens khalhye gah? Nyamoq dvyuk yuk Samari mau lyis khyuot kat lhyeh? 20 Hau vmau mau mas dah mangso jens mas khah mangso ka nyamoq mau lyis ngamoq hwankti masyah yoh khyuot ku lhyeh? Housoeh lyis Yhensain ka Yerusalem lyis khasoeh yoh khyuot yoeus das lah, ge.
21 Dius jens gas hwankti Hezekia nyamoq lyis taiq toh zis yah dvyhangteh samlo tsain nyeis; dvkhonh eq ma taiq. 22 Hauh thang lyis Eliakim, Shebna yahge Yoa moq gas kuk zis yah nyamoq dyimis langchuiq zis yah Hezekia jyank mas Asiria zau taiq dang loh taiq kyoh.