28
Mautsung bang Zaih geh
1 Israel munghdan gas dyoqbis goeus! Nyah phunk gas yheiyet dah uhshe bang dah uhloms mas ban khwank buismuk nyhauh teh nyhauh goeus. Nyamoq dah khwank uhloms jens gas xangh coeu vlhomuh juot toh laus eq nyamoq yet shei joq goeus.
2 Yhensain ka yombos, kank bos las nyamoq lyis zan das zis cicont nghuot soeu yoh. Gyutomp mau teh, mau thungh kyei teh, yomkat duon los teh, jeis nhauq teh hauh mau lyis nghop das soeu yoh.
3 Yhei yet dah uhshe bang dah khwank cho ka khyeiwu mas nang nheh zis xauh das.
4 Khwank uhshe bang dah nyhauh loh nyeis phunk nyoqnho ngelang gas, shih nyhink nyos lyis maiphang shihxeih lyis nyhink yah dvyih thyoq zo tyamp teh dyuk loh das.
5 Maukhung Jesphung Yhensain ka doeng nyeis shih dah nyah dius jens xiklyis nyoqnho ngelang buismuk yungh dah bankhwank duot das buisnyeis jweh los das.
6 Nyang gas soetuon bang lyis dan khyvlyis soe seq tuon das ehnyet, wus khomh mas jes yoh toeu-nghank bang lyis yomdyei das.
Yuda Yheiyet Lvpe jens
7 Lvpe jens yahge phudyei bang yangh nyo yet las vtyi vkamh nghuot. Nyamoq gas zvbiq yahge yhei nyo shuk las khamkhvv zis yah thungh lains. Lvpe jens gas Mangso dyei dah nyoqnyvng ma seqgyo shoq yet. Phudyei bang eq nyamoq jyank mas chi los dah soe lhyi ma daq tuon shoq tsain yet.
8 Nyamoq tsung dah kihgus dvnganh gas duk toh zis yah dyingh las, lhoq zis dvchuq eq ma nyet lo.
9 Nyamoq ngah cho tsain lop. Nyamoq gas, Jyauh mes soeu hank nghuot? Nyah loeus hank gyo chah? Hauh zis gas lonoeuh nauh kangh xiklyis kyingh dvgis!
10 Nyang gas ngamoq lyis dvchvp dvchvp, dvjens dvjens, xuqzoh dvkoeuq dvkoeuq jyauh bah ge, ge.
11 Nvng ngah dang ma gyo lyis Mangso ka gohmau nyingh kat bang lyis yhung lha ma gyo ku dah nyingh yah nvng lyis jyauh das.Ref 28.11-12: 1Kr 14.21
12 Nyang gas namoq dvnganh lyis no cho yahge nhaiqtaink cho dyei, nghuot laus eq namoq gas nyah dang gyo yoeus das zis ngoek.
13 Hauh gvng mas Yhensain ka namoq lyis dvchvp dvchvp, dvcho dvcho, xuqzoh dvkoeuq dvkoeuq jyauh das. Housoeh lyis namoq cheh dah beszoh khanghmuh mas thungh lains das. Namoq gas dvm dap, lhyik mas nyih, thung lungh bang bweh loh das.
Zion Xiklyis Yhenthunk Luk
14 Gvshih Yerusalem mas haih dius jens lyis guon las lhoq lhoq teh kuot bang eh, Yhensain cha taiq nyeis zis gyo geh.
15 Namoq gas shei cho yah thanghchvp toh goeus. Mungkvn shei mau yah xamxonh ge khwank nyeis. Namoq gas hwah cho yahge mhuih cho yah lhuiq kat das ge nges toh yvmvyah dyoqbis zainsmuh jweh los lyis namoq lyis lhaiq toh das ge jyuk jyuk mus.
16 Gvshih haih zis gas Yomzains Yhensain taiq: Yoeuh aq, ngos Zion mha yombos las goeng dah vpom toh das. Hauh vkhau mha ngos goeng dah yhenthunk luklom toh das. Lomsjingh soeu ka ma gyuk noh.Ref 28.16: Chd 118.22-23; Rom 9.33, 10.11; 1Pt 2.6
17 Hauh vpom xiklyis Lyi jus cho ka keq twih nghuot las, wontang cho ka xiq cuitungh nghuot.
Nvng nges toh dah hwah cho dvnganh lyis gyutomp mau yah shenh loh das, jesluiq cho lhyi jeis yah nhauq thyoq tyamp das.
18 Namoq shei zis yah thanghchvp toh cho dyoq tyamp das. Shei dah mungkvn yah xamxonh cho eq ma doengs das. Dyoqbis zainsmuh yah shenh loh lyis nvng lyis duons das.
19 Hauh zis dvnvp thang lhyi dvnvp nvng lyis doms thungh doms thungh das las nvng nyeih nyenh kham chah das. Mangso jyank masyah los dah loeus saiq khanghmuh gas nvng lyis gyuk cho vsaiq shwih los dyei das.
20 Nvng gas Khyei ma yoh jyangh shoq jung lyung, gungs lyis ma goms shoq mis ngis ge dah dius yuk teh nghuot das.
21 Yhensain ka Perazim boms mas, Gibeon langhkhau mha kuot khoq teh jeszan das. Nyang kuot mes zis yah dvyhangteh kuot las ma bweh ku dah muh lyis nyvng das. Nyang nyah dah nghop shung toh muhzoh lyis nyuk shoq kuot das.Ref 28.21: Yosh 10.10-12; 2Sa 5.20; 1Ss 14.11
22 Ngos namoq lyis dyei dah zaih nhang cho lhyi vyis goh. Namoq jwangh lyis gas namoq phang luiq das cho yangh zes yau los das. Maukhung Jesphung Yhensain Mangso ka dvmau gonh lyis mhont tyamp das ge nghamh thyet dang lyis xauhgyo goeus.
Mangso dah Joeui
23 Ngos cha taiq nyeis zis gyo geh; Ngos namoq lyis taiq yvlyis kamp gyo geh!
24 Danh zwi soeu hank eq jyo khyoq das nyhenshang vjangh yah malyen lo phuk kyeq nyeis zis ma nghuot.
25 Yos lyis dvlhain ba sont goeus ya, jyo nyau tsain nghuot dah hoeuhxangh sunghso, guk lyis vjens jens tsungh. Thunghthang mha eq gohtoeu jyo khyoq toh.
26 Mangso ka nyang lyis jyauh toh yvmvyah nyang nyah muh khasoeh zwi das zis seq.
27 Hoeuhxangh shomnhamh jeih ko das lyis thyeq tungh ma yhung, hauh gungsthaiq geh ko dah wuseh yah, dvbat khywi.
28 Guk bat lyis yonh loh shoq ma bat thyi, guk ma nos shoq lhyingh yah khasoeh nang das zis nyang seq.
29 Hai joeui dvnganh gas Maukhung Jesphung Yhensain jyank masyah los. Mangso kuot dah nghamh toeuq cho ka joeui bos las hauh zis vjangh ung los.