26
Mangso Ung Cho Dyei das
Yuda mau mas dius jens haih chunghthwe kat dah buisnyeis jweh los.
Ngamoq dah wus gas goeng!
Mangso nyang hauh ciank lyis khomp toh.
Jus cho chank kuot bang dah dius nyau,
lomluk dah dius nyau wvng bas jungh wus khomh jens phank toh geh.
Yhensain eh, toeuqkhom goeng goeng yah
nvng lyis loms toh bang lyis
dyinghjet dah nyenstap cho dyei aq.
Yhensain lhyi vcaiq vto loms aq,
nyang yang lyis vjangh gos toh dyei das.
Nyang gas khwank bang lyis nyhen nhang,
nyamoq nyeis, goeng dah wus lyis mhont, wusciank lyis tsohmop mas thungh thyi tyamp.
Zaiq zis xauh bang gas
gvshih hauh thoq mas suh nyeis, nyamoq khyeiwu yah nang nyeis.
 
Yhensain eh, nvng gas dius gis jens xiklyis cho gis kuot dyei las
nyamoq suh dah cho ka dvm.
Ngamoq nah ehnyet chank las ngamoq dah nghamhloms cho nvng mas toh:
nvng gas ngamoq omes cho dvnganh nghuot.
Nyenh lyis ngos nvng lyis ngah ehnyet dvnganh yah soh nyeis.
Nvng nyeisjvng yahge nyah dius jens lyis soetuon uhlyis
lyi jus cho cha nghuot yvlyis nyamoq dvnganhmoq xuq das.
10 Nvng lhung bang lyis nhaiqbos laus eq
nyamoq jus yvlyis kuot das zis khanhamp eq ma xuq.
Hai dan bang dah mau mas yangh nyamoq shuot cho dvkuot nyeis shih.
Nyamoq gas nah kuhxing cho lhyi ma mes soh.
11  Yhensain eh,
nvng nah jeswus lyis joeng das cho nyamoq ma seq.Ref 26.11: Heb 10.27
Nyamoq lyis xoqphuh nhang lha xauh kham nhang aq.
Nvng sont toh dah joeng cho nyamoq lyis xauh kham nhang aq.
Nvng nah dius jens lyis kha iq jyetdap cho nyamoq lyis chixoeuq aq.
 
12  Yhensain eh, nvng ngamoq lyis nyeisgis yaplhoq cho dyei.
Ngamoq yoh ung los cho dvnganh gas nvng kuot cho dah vkyuh nghuot.
13 Ngamoq dah Yhensain Mangso eh, ngamoq lyis gohyuk yah guon zis xauh goeus.
Nghuot laus eq nvng dvyuk kyingh ngamoq dah Yhensain nghuot.
14 Gvshih nyamoq shei goeus, ma dwis los lo.
Nyamoq sidyos ma toq los lo.
Khasoeh ge lyis nvng nyamoq lyis joeng zis yah mhont tyamp.
Hank eq nyamoq lyis ma soh lo.
15  Yhensain eh,
nvng ngamoq dius nyau lyis je los nhang.
Mau eq shot khanghmuh jyeq kat dyei.
Heika nah nyoqnho ngelang bos los cho nghuot.
16  Yhensain eh,
nvng nah dius jens lyis joeng,
housoeh nyamoq yaukyenh lyis nvng lyis shvmanh dung.
17  Yhensain eh,
nvng ngamoq lyis vmesbih lokhoeu nos nos las kaiq ngaus teh,
kaiq ngaus nhang.
18 Ngamoq lokhoeu nos nos shanghsenh laus eq
cha ma khoeu los.
Ngamoq mau xiklyis ung cho cha ma yoh;
ngamoq kuot las nyuk los cho cha ma bos.
 
19 Ngamoq dah dius jens shei bang doms dwis das!Ref 26.19: Dan 12.2
Nyamoq dah mvng jens doms dwis toq das.
Nyamoq lop mas yhet joq bang dvnganh soh los las gaus zis yah chunghthwe kat das.
Kyi kyi bvng dah jyweh gas nyeisjvng lyis jyweq nhang teh
Yhensain ka nyangh lyis yah shei goeus bang lyis doeng los nhang das.
Soetuon, Doms Toeu
20 Ngah dius jens eh, namoq yhen khau mha wvng las khomh nyheih toh geh. Namoq Mangso dah nhaiq yo cho jam loh shoq dvsoq tamh joq geh. 21 Nyeisjvng dius jens lyis nyamoq nyang dah yaunos gvng mas joeng das xiklyis Yhensain ka nyang nyeis joqyos maukhung mhayah los. Nyeisjvng thoq mas dius gauh sat bang lyis chixoeuq los das, nyeisjvng gas sat xauh bang lyis ma shung toh dyei lo das.