22
Yerusalem lyis Tyi
1 Heika Nyoqnyvng Langhkhau cho dah loeus nghuot. Cha mus nyeis? Hau wus mas dah dius jens dvnganh chamus yhenkhung mas pwe tsain kuot nyeis?
2 Wus gonh hoeu thwe yahge sainh hwangh phoh zis yah dyingh joq. Haih jeszan yvmas nah dius jens shei bang gas jeszan las shei zis ma nghuot.
3 Nyamoq nyo dvkhvt eq ma baiq shih lyis namoq dah uhshe bang dvnganh phang loh, wus mas bang eq phang loh laus eq nyamoq dvnganh lyis xauh nyhik.
4 Gvshih ngos shei loh dah ngah dius jens xiklyis oek oek oen ngaus bah. Ngos lyis nhaiqtaink das zis yom vkat goh, oen.
5 Heika Nyoqnyvng Langhkhau mha hoeu cho, ung cho yahge nhunk cho bos dah shishenh nghuot. Maukhung Jesphung Yhensain Mangso ka hauh zis ngamoq jyank mas nhang kat. Ngamoq dah wusciank thyoq khyoq toh, pangh das xiklyis kaiq lui dah lvngtang ka hauh jing masyah thuq los.
6 Elam mau mas dah jeslo jens gas lyei chi nyo tsain chi zis yah nyang ji las tsain los. Kir mau mas dah jeslo jens eq nyamoq dah gos cicont tsain chi toh.
7 Yuda dah jenh bos langhkhau jens mas jeslhyingh dyingh joq. Nyang ji dah jeslo jens gas Yerusalem wus khomh xik mas yap joq.
8 Yuda dah thoenkgus jesdvp jens dvnganh gas thyoqpi goeus.
Housoeh bweh joq lyis nvng kyonhkhyi lhyi hauh zis kuot dah zungs masyah yoeus thuq los das.
9-10 Namoq Dawi dah wus, Yerusalem wusciank soq ci chah dah joqyos jens lyis nyvng. Housoeh namoq Yerusalem mas dah yhen dvnganh lyis kyink yoeuh las wusciank pho das luk tsain yoh das xiklyis yhen dvkhamh lyis thyoq khyoq.
11 Jeis thomh cauh masyah yaus lyih dah jeis lyis wus khau mha twink toh das xiklyis jeis twink joqyos kuot. Nghuot laus eq gohlhain yah nghamh toeuq las haih zis kuot toh soeu, bweh nhang soeu Mangso lhyi ma yoeuh, ma gyo kuot.
12 Housoeh las Yomzains Yhensain Mangso ka ngaus, kuk, uhtyauh, yanghthung dyi wuot das cho nvng lyis lui thuq kat.
13 Hauh gungsthaiq namoq gas, yis las pwe tsain kuot. Yang phvnaq nyeihyo shei das, yhei shuk shoh zo las pyo pyo nyeis goh, ge noeu sat, yvng sat las shoh zo, zvbiq shuk nyeis.Ref 22.13: 1Kr 15.32
14 Yomzains Yhensain Mangso nyang ngos lyis jis las taiq. Nyamoq ma shei dvchank hai ma gis cho lhyi khanhamp eq ma yoh khyuot tyamp dyei. Ngos Maukhung Jesphung, Yomzains Yhensain Mangso taiq goeus, ge.
Shebna lyis Zaih Nhang
15 Yomzains Yhensain Mangso heisoeh ge. Zau Yhen guon soeu, hau ziszom Shebna lyis loh taiq aq.
16 Nvng cha nghuot oen nghamh? Lukjvp jing mas nvnyang xiklyis lop kyungh das zis toeuh yoh lhyeh?
17 Nvng yhaugyen soeu nghuot mvbeh, nghuot laus eq Yhensain nvng lyis yoeus las doeuh tyamp das.
18 Nyang nvng lyis lyeislhaink lyis yoeus teh yoeus las svsoh zes kuh mau mas doeuh kat das. Houmha nvng khwank nyeis dah jeslhyingh jens yvm mas shei das. Nvng gas nah yhensain yhenbang dah xoqphuh cho nghuot.
19 Yhensain nvng lyis zau masyah khyoq das, nvng lyis nah dah nyhang zau keq masyah lang khyoq das, ge.
20 Yhensain Shebna lyis taiq. Hauh zis bweh lyis ngah jyeidwis, Hilkia lo Eliakim lhyi khi das.
21 Ngos nah zau dyixing yahge dyichih nyang lyis gvm huot las nvng yoh khoq dah toeuh dvnganh nyang lyis dyei das. Nyang gas Yuda yahge Yerusalem dius jens dah uwus duot das.
22 Ngos nyang lyis Dawi dah dius jangh caiq hwankti guon yvmas toeuh dyingh dyingh dyei das. Nyang gas zau guon toeuh yoh das las nyang phank yvlyis hank ma yoh nyheih, nyang nyheih yvlyis eq hank ma yoh phank das.Ref 22.22: Nyoq 3.7
23 Ngos nyang lyis nyah joqyos mas jywangh soeh goeng goeng cuk las, nyang gas nyah dvyhen gonh lyis nyoqnho ngelang dyei das.
24 Nghuot laus eq buisnoms jens dvnganh yahge vnyau vshih jens gas nyah yvwons duot das. Nyamoq gas, nghweh mas auh khuq lhangh teh, nyang mas lang lhangh toh das.
25 Hauh zis bweh lyis goeng goeng tap toh dah nghweh gas nuot tyamp las gyoh das. Houka hau lhangh toh vyhang dvnganh dah vthang nghuot das, ge Yhensain taiq toh goeus.