2
Vcaiq vto Nyenstap cho
(Mik 4:1-3)
1 Heika Yuda mau yahge Yerusalem wus yah sen lha Mangso Amoz lo Esaia lyis dyei dah dang nghuot.
2 Thang buisnyeis lyis Yhenmuh joq dah boms gas,
boms jens jing jens dvnganh thoq lyis nyhang thank nghuot das.
Dius nyau nyoshoq houmha tsain jens los das.
3 Nyamoq dah dius jens taiq das zis gas,
Yang Yhensain dah boms,
Israel Mangso dah Yhenmuh pheh doq loh goh.
Nyang yang lyis cha kuot nhang mes zis jyauh das;
yang nyang khyen toh cho chank suh das.
Yhensain dah jyauh cho ka
Yerusalem masyah los yvmvyah, nyang nyah dius jens lyis Zion mhayah taiq.
4 Nyang gas dius nyau zainsmuh jens jo masRef 2.4: Yol 3.10
phyen-goh cho lhyi tamp das.
Nyamoq gas nyamoq moengsa lhyi khont-suh,
lham lhyi banlyenh bat das.
Dius nyau jens khanhamp eq
jeszan das xiklyis ma doms sont lo das.
5 Yakop masyah dyos bang eh, gvshih Yhensain dyei dah bvng yvmas suh e goh.
Lhoq Lhoq Teh Bang Dyoqbis
6 Mangso eh, nvng gas Yakop vnyau vshih ge, nah dius jens lyis tyamp goeus. Hauh mau gas buisthuq mau yahge Philisti jens jyank mas dah nyoq hweq kat cho yah dye dyingh goeus. Hauh dius jens gas Lvbaus lyi thungh tsain chank.
7 Nyamoq mau gas ngwis xing yah dyingh las nyamoq zisyos ma thank loh. Nyamoq mau mas nyang jens yah dyingh las jeslhyingh ma thank.
8 Nyamoq mau gas phvra silho yah dyingh joq. Nyamoq gas nyamoq nyang loq yah kuot vyhang lhyi tsain paiq.
9 Yuk khanghmuh gas nyhen khyoq zis xauh las xoqphuh. Yhensain eh, nyamoq yobos vkhyuot dyei.
10 Nyamoq gas Yhensain dah nhaiqyo cho, nyah yomsoq yahge phunk masyah luiq das xiklyis luktyoq lukkhyung mha nghuot ya, nyeisjvng mas dwang doeu las tsain tamh das.Ref 2.10: Nyoq 6.15; 2 Th 1.9
11 Dius jens dah khwank cho thank las lhoq lhoq teh kuot cho dyoqbis dah buisnyeis jweh los das. Hauh thang lhyi Yhensain dvyuk kyingh chunghtoq zis xauh das.
12 Hauh nyeih lyis Maukhung Jesphung Yhensain ka yomsoq bos bang, khwank bang, ehnyet nyhang bang khanghmuh lyis o mha khyoq das.
13 Lebanon mas Arit saiq nyhang zains dvnganh, Bashan mha dah wons zains dvnganh thyoqpi das.
14 Boms nyhang jens yahge jing jens lyis xiq das.
15 Nyhang dah tyoeuqzvm khanghmuh, thoenkgus jesdvp joq dah wusciank khanghmuh thyoqpi das.
16 Nyang gas kuh thank las, yungh thank dah sangpho jens lyis yangh nyhop tyamp das.
17-18 Hauh nyeih lyis khwank bang thank tyamp das, dius dah lhoq lhoq teh cho eq dyoqbis loh das. Phvra dvnganh gas dyuk loh das. Yhensain dvyuk kyingh chunghtoq zis xauh das.
19 Yhensain ka nyeisjvng lyis nhont kat lyis, nyah nhaiqyo cho, nyah yomsoq yahge phunk masyah luiq das xiklyis luktyoq, luk-uk mas, nyeisjvng dwang mha tsain tamh.
20 Hauh nyeih jweh lyis nyamoq kuot dah ngwis xing phvra silho jens lyis tyamp das. Gyuqxauh yahge phoqxik jens jyank mas doeuh tyamp das.
21 Yhensain nyeisjvng lyis los nhont kat lyis dius jens gas nyah nhaiq yo cho, nyah yomsoq yahge phunk masyah luiq das xiklyis luktyoq, luk-uk mas tamh das.
22 Seq shei dah dius lyis vnghamhnywe goh, nyamoq lyis cha yoh loms!