17
Siria yahge Israel lyis Joeng
Yhensain taiq zis gas, Damasku gas wus ma nghuot lo das; khyompboms dvnghuot lo das.Ref 17.1-3: Yer 49.23-27; Amo 1.3-5; Zek 9.1 Siria wus jens gas tyamp toh goeus las houmha yvng katjang, noeu katjang bweh das. Hau gaunyhauq jens lyis hank ma khat tyamp das. Israel jens lyis gos cho ma bos lo das, Damasku gas nyang luiq cho chithyuk tyamp das. Nyet joq dah Siria jens gas Israel jens teh xoqphuh das, ge Maukhung Jesphung Yhensain taiq goeus.
Israel dah kuhxing cho thank loh las dis cho ka nyungs cho thaiq los das buisnyeis jweh los. Israel gas guk yet las jyo yhomh goeus dah yos teh nghuot das. Jyo dye yhomh dah Rephaim langhkhau tyeihgesles mus joq teh nghuot das. Dius nainlo kyingh dvdoeng lo das. Israel jens gas tsanlun zains mas shih dye thyoq thang lhyi vthyoh mas aiq somh lom, nghuot ya nyhen dah shih ko mha dvtsiq dvnyet joq lo teh nghuot das, oen ngos Yhensain, Israel Mangso taiq goeus.
Hauh buisnyeis jweh lyis dius jens gas nyamoq lyis gvnkhanh Soeu, Israel dah gyingshang Mangso jyank pheh pangh das xiklyis tauh los das. Nyamoq gas nyamoq nyang loq yah kuot phon lhyi ma nges lo das, nyamoq loqmuh dah Ashera gywes nyhiq lho yahge xangh ngheq dah phon jens lyis ma loms lo.
Hauh buisnyeis jweh lyis nyamoq dah goengtoenk wus jens gas, doeuh tyamp toh zis xauh las saiq khyam bweh zis yah jyamhjyuklhyuk mus das.
10 Israel eh, nvng gas nvng lyis khyuot yoeus las lukmuh lom teh gos dyei dah Mangso lhyi tohnyhik goeus. Hauh gungsthaiq lvbaus mangso lhyi paiq das ge gyingshang khyam tsain tsungh nyeis. 11 Hau nvng xoh nvp masyah hauh vzains gas vnyet thuq las vbuh buh los laus eq yhomh das zis ma bos. Houmha yau cho yahge ma yoh yhoh dah nos kyingh dvbos.
Jeswus dius Nyau Gyoh
12 Yomsoq bos dah dius nyau jens gas thomh mas jeis hoeu toq thwe teh nyings nyeis, jeisphauq zainsmuh bat teh nghuot. 13 Dius nyau jens gas jeisbaus guons teh guons los laus eq Mangso nyamoq lyis nyho lha nyamoq gas jik phang loh. Jing pheh phvlhau dang loh teh, lyeis jyon yah mhanh kyuk muot tangh teh khat tangh tyamp das. 14 Nyenhthang lhyi nyamoq lyis gyuk shoq kuot, nghuot laus eq nvp lyis gas nyamoq phang loh goeus. Heika yah mau lyis thyoq sanh soeu khanghmuh dah gvmboms nghuot.