13
Mangso Babilon lyis Joeng das
1 Heika Amoz lo Esaia Babilon yah sen lha Mangso jyank masyah xauh yoeus dah loeus nghuot.Ref 13.1—14.23: Esa 47.1-15; Yer 50.1—51.64
2 Lhyang dah jing nyhang thyoh mas jeszan khyiq lhangh geh! Jeslo jens lyis khwank dah wus khomh jens lyis zan das xiklyis vsoh dyei khyvlyis loq toeu lha kaiq geh.
3 Yhensain ka gyingshang dah moeng zan las nyang nhaiqyo bang lyis joeng das xiklyis nyang nghamhnywe las khwank nyeis dah jeslo jens lyis khi thuq kat.
4 Boms thoq mas moqjens teh dah thwe lhyi gyo geh, dius nyau jens yahge munghdan jens huom dah thwe nghuot. Yhensain dah jesphung ka jeszan das xiklyis sont nyeis.
5 Nyamoq gas nyeisjvng vthang Mau we mhayah los. Yhensain ka nhaiqyo zis yah mau gonh lyis mhont tyamp das nyhenshang los.
6 Yhensain dah buisnyeis ni los, Maukhung Jesphung dyoqbis cho she los yvmvyah nos las kaiq ngaus geh.Ref 13.6: Yol 1.15
7 Yuk khanghmuh dah loq gas nhuk gyoh das; Yuk khanghmuh dah womh ehnyet ma bos lo.
8 Nyamoq dvnganh gas gyuk dvn das, vmesbih lokhoeu nos nos teh chiqjyen das. Nyamoq gyuk zis yah nyang changh nyang yoeuh tsuk goh toh das, nyamoq dah nyoqnho ka xoqphuh cho yah ngeh das.
9 Yhensain dah buisnyeis jweh los - houka gyukphoh nhaiqyo zis yahge nhaiqlom tsoeu cho ge lhoeng buisnyeis ni los; nyeisjvng gas jyamhjyuklhyuk kuot las, yaunos wons bang khanghmuh dyoqbis das.
10 Maukhung kyi jens yahge hauh vwot eq ma bvng lo das. Buisthuq los lyis eq soeng soeng noq das, lhamhmuh eq ma tso lo das.Ref 13.10: Ezk 32.7; Mat 24.29; Mak 13.24-25; Luk 21.25; Nyoq 6.12-13
11 Yhensain taiq, Ngos mungkvn mas dyoqbis cho she los las lhung bang dah yaunos xiklyis joeng das. Khwank bang yuk khanghmuh lyis nyhen mha khyoq das. Lhoq lhoq teh kuot bang yahge lhoeng bang yuk khanghmuh lyis joeng das.
12 Doeng nyeis bang xing thoq lyis xo nanh nhang das.
13 Ngos Maukhung Jesphung Yhensain dah nhaiqyo cho chixoeuq nyeih lyis, ngos maukhung lhyi tsain nvn nhang das. Nyeisjvng nonh las nyah joqyos masyah ywi loh nhang das.
14 Babilon mas nyeis dah gohmau bang gas nyamoq nyang nyeis mau pheh, shoh khat bang loq masyah phang dyos loh dah cvt teh, yvng yoeuh soeu ma bos dah yvng teh phang dyos sanh loh das.
15 Xauh nyhik soeu hank laus eq jap sat zis xauh das.
16 Nyamoq vshoh vjyen bweh uhlyis nyamoq dah lonoeuh jens lyis thungh thyi das. Nyamoq dah yhen lhyi thyoq das, nyamoq yhensain nyhiq jens lyis lhuot yoeus loh das.
17 Yhensain taiq, Babilon lyis zan das zis Mede jens lyis jausjyonh das. Nyamoq gas ngwis lyis chaxwe ma nhang, xing lyis eq ma o bang nghuot.
18 Nyamoq dah lyei yah nyo yah loyvm jens lyis sat das, nyamoq gas lonoeuh jens lyis nhaiqnyen cho ma chixoeuq das, loshang jens lyis nhaiq ma nyen das.
19 Babilon gas munghdan dvnganh thoq lyis yungh thank las nyah dius jens dah nyoqnho ngelang eq nghuot. Nghuot laus eq ngos Yhensain ka Sodom yahge Gomora lyis mhont tyamp teh Babilon lyis toeu-mhuk tyamp das.Ref 13.19: Vpm 19.24
20 Houmha hank khanhamp eq ma doms nyeis lo das. Kwang yenh dah Arab dius jens houmha zvng ma kuot, yvng yoeuh soeu eq nyah yvng phung lhyi houmha ma kat tsoh lo das.
21 Mhanhdyvp gaunyhauq nyeis dah joqyos yahge khunghbop sot sot joqyos duot das. Houmha gola-u nghoq nyeis das, beq lamh jens hau dyoqgyoh joq yvmas pant nyeis das.Ref 13.21: Es 34.14; Zep 2.14; Nyoq 18.2
22 Tyoeuqzvm jens yahge hwankti yhen jens gas Pauzoe jens yahge womkhuih jens gyap thwe yah dvgeh hoeu das. Babilon dah shishenh jweh goeus! Nyah shishenh vluk thank goeus.