ESAIA SAUHBUK
(ISAIAH)
(1) Sonzoh 1-39 Mautyi shot munghdan nghuot dah Yuda mau gas yomsoq bos dah yhenkyoh munghdan Asiria yah kyuktant zis xauh nyeis shishenh nghuot. Esaia nyvng zis gas Yuda mau lyis jyoengh kyuktant nyeis zis gas Asiria dah yomsoq ma nghuot. Nyah dius nyau jens dah yaunos yahge Mangso dah dang ma gyo cho, Mangso lhyi ma lomsjingh cho dvnghuot. Lvpe ka dius jens yahge nyamoq dah uhshe bang lyis bvng bvng taiq zis gas, dan dah kang dwis cho yahge lyi jus dah kang dwis cho kuot geh. Mangso dang ma gyo cho ka dom das cho yahge dyoqbis cho she los das, ge zaih nhang. Hauh thoq lyis mungkvn gonh yah sen dah nyenstap cho yahge lyi yah dvyhangteh guon das hwankti dvyuk Dawi vnyau vshih masyah thuq los das cho eq uhlhomh taiq.
(2) Sonzoh 40 - 55 gas Yuda jens nyoshoq Babilon mas jonsdoeus nyeis dah shishenh, gyvzaiq gyvnang xauh kham nyeis shishenh, nghamhloms cho ma bos dah shishenh nghuot. Lvpe taiq hoeuh zis gas, Mangso ka nyah dius jens lyis luiq los nhang lha nyamoq lyis Yerusalem mas shwih tauh los zis yah kang dwis cho vsaiq xi das. Heimha vgungs toh cho ka, Mangso ka sungson dah vsain nghuot. Israel jens yah dvgeh nyamoq gvng mas shvmanh yoh das bang dius nyau dvnganh xiklyis Mangso dah nghamh toeuq cho nghuot. Yhensaindah jyeidwis, ge dah dang gas Thanghchvp Cauh mas dius jens nyoshoq seq cho nghuot.
(3) Sonzoh 56-66 Yerusalem mas doms los bang xiklyis toeuq las lhaih toh. Mangso ka nyah dius jens mas nyah dangthoengh nyuk los das cho lhyi soh soh nghuot mes bang xiklyis lhaih toh. Dan cho yahge lyi jus cho, no nyeih chank kuot das cho, phudyei cho yahge shvmanh dung cho chixoeuq toh. Comh phoh zis 61:1-2 mas dang gas, YhensainYesu dah muh kuot xi lhyi nyang khi dah dang nghuot.
1
1 Yuda hwankti jens Uzia, Yotham, Ahaz, Hezekia moq dah zaih lyis Yuda mau yahge Yerusalem yah sen lha, Mangso Amoz lo Esaia lyis nyoqnyvng dyei.Ref 1.1: 2Hw 15.1-7, 15.32—16.20, 18.1—20.21; 2Ss 26.1—32.33
Mangso than than taiq
2 Yhensain taiq, Maukhung nyeisjvng eh, ngos taiq nyeis zis gyo aq! Ngos nyhoeu bes kat dah lo jens gas ngos lyis gomloeus toq.
3 Noeu jens gas yhensain lhyi seq, mauhlyihzoe jens eq nyamoq lyis tsoh dah lang lyis seq. Nghuot laus eq ngah dius jens Israel gas ma seq. Nyamoq ma seqgyo.
4 Yaunos kuot vnyau eh dyoqbis las, ma gis bang eh, namoq soetuon zis xauh goeus! Namoq dah yaunos gas namoq lyis lang khyoq goeus. Namoq gas Israel dah gyingshang Yhensain Mangso lhyi peq tyamp las nyang lyis nungs phuk khoq goeus.
5 Namoq yobos dyei zis zes zes xauh shoq chamus gomloeus tsoq toq nyeis goh? Israel jens eh, namoq uhloms gas dvm yah dyingh joq; namoq nhaiqlom yahge nghamh cho ka nos nyeis.
6 Nah gungs mas uhloms mas zis khyei jweh shoq yanghzan vchuq ma bos, thungh cwe, dvm, dvm kuh yah dyingh joq. Hauh dvm lyis ma cheih ma shang, ma lyet, mvcheih ma kat.
7 Namoq mau lyis shont, namoq wus jens eq nyi ngheq tyamp. Namoq xikkhonh mas lvbaus gas namoq maunyeis lyis yoeus las thyoqpi tyamp.
8 Zvbiq khyam zungh soeu dah zvng teh, tunghuh yos mas dah gyamh teh, khomp toh cho ma bos lhaink toh zis xauh dah Yerusalem wus nyang kyingh dvnyet joq lo.
9 Maukhung Jesphung Yhensain yang lyis dius dvyhamh ma nyet joq nhang lo lyis gas, Yerusalem wus gas Sodom yahge Gomora wus teh monh tyamp das.Ref 1.9: Vpm 19.24; Rom 9.29
10 Yerusalem eh, nah guon bang yahge nah dius jens gas Sodom yahge Gomora dius jens teh nghuot. Yhensain nvng lyis cha taiq zis gyo aq. Yah Mangso nvng lyis jyauh yvlyis kamp gyo geh.
11 Yhensain taiq zis gas, Ngos namoq tsoq phudyei nyeis dah lomhxangh dvnganh lyis o oen nghamh goh lhyeh? Ngheq phudyei dah yvng, nyhuk toh gaunyhauq coeu yah ngos jo goeus. Noeuchoq, yvnglus, shvbeq jens dah suih lyis ngos nghoengh goeus.Ref 1.11-14: Amo 5.21-22
12 Namoq ngos lyis paiq los uhlyis haih zis tsain yoeus los aq ge hank dung? Ngah Yhenmuh mas los nang yenh das zis namoq lyis hank sang?
13 Namoq chi los dah jyungshuk gas vnyet dvnghuot. Ngos namoq ngheq dyei dah xangh shom lhyi choqh. Lhamhmuh canh nyeih pwe, no nyeih, lomsnoq cho dah moq huom lhyi tsain choqh. Hau dvnganh lyis namoq dah yaunos yah lhoeu thyoq tyamp goeus.
14 Ngos namoq dah lhamhmuh canh nyeih pwe yahge gyingshang nyeih lyis tsain hoeng: houka ngos jhen nghoengh dah yvwons nghuot.
15 Namoq loq toeu las shvmanh dung lyis ngos namoq lyis ma yoeuh. Namoq khanyhoq dung laus eq ngos ma gyo dyei das. Khasoeh ge lyis namoq loq gas suih yah dyingh joq.
16 Namoq nyang gungs lyis shank shoq cheihshang geh. Ngah xikkhonh mas namoq kuot dah ma gis cho dvnganh masyah no geh. Nghuot goeus, ma gis zis vkuot lo goh.
17 Jus zis kuot xuq geh, lyi jus cho lhyi kuot geh, zaiq zis xauh soeu lhyi pangh geh, chauhlo jens lyis nyamoq dah toeuh dyei geh, chauhmuh jens lyis gos toh dyei geh, ge.
18 Yhensain taiq zis gas, Los geh, taiq goh goh: Namoq gas yaunos yah zoek zoek nes shoq lhoeuh laus eq gyu teh thyoeu shoq cheih dyei das. Nes noq teh nghuot laus eq namoq yvng mauh teh thyoeu los das.
19 Nvng ngah domsyos gyo lyis gas, maunyeis masyah thuq los, gis dah vyhang xauh zo das.
20 Nghuot laus eq nvng ngos lyis gomloeus toq lyis gas, shei cho soetuon zis xauh das. Ngos Yhensain nyang taiq goeus.
Yaunos Bos dah Wus
21 Xikpheh dvlhain lomluk khoq dah wus gas nghe nyhiq teh kuot nyeis! Dan bang yah dyingh khoq laus eq gvshih gas dius sat bang dvnyet joq lo.
22 Yerusalem eh, nvng gas xikpheh dvlhain ngwis teh nghuot khoq laus eq gvshih gas chah phauh ma dap lo. Nvng zvbiq gis teh nghuot khoq laus eq gvshih gas jeis dvnghuot lo.
23 Nah uhshe bang gas gomloeus toq bang, khauh bang dah loeuzomh jens nghuot goeus. Nyamoq gas vjangh khauwhot, jyungshuk lyis ngwis. Nyamoq gas chauhlo jens nghuot ya, chauhmuh jens dah soe mha ma gos dyei.
24 Housoeh las gvshih Maukhung Jesphung Yhensain, Israel dah Yomsoq bos Mangso taiq nyeis yvlyis gyo geh. Ngah jeswus jens eh, ngos namoq lyis lvto phuk bah, housoeh namoq ngos lyis yau ma yoh dyei lo.
25 Ngos nvng lyis tyixo zis yah kuot das. Ngos nvng lyis ngwis khyink teh cheihshang das. Ngos nah ma lhoq ma shang zis lyis dvnganh shang tyamp das.
26 Gohnhamp yoh dah guon bang, xamchangh jens teh zis ngos nvng lyis dyei das. Hauh thang lhyi Yerusalem wus lyis, Dan dah wus, wontang dah wus, ge lui das.
27 Yhensain ka dan soeu nghuot yvmvyah nyang Yerusalem yahge houmha dah nhaiqlom thaiq bang yuk khanghmuh lyis khyuot yoeus das.
28 Nghuot laus eq nyang lyis tyixo lha gomloeus toq bang yahge yaunos kuot bang khanghmuh lyis thungh thyi das. Nyang lyis tyamp bang khanghmuh lyis sat das.
29 Namoq paiq ku dah saiqzains jens yahge tsungh dah gyingshang khyam lyis auhuiq das.
30 Namoq gas nyhauh dah wons zains, jeis hank ma sanh dah khyam teh mus das.
31 Nyijyenh yah huhyau ngeh teh, loyangh jens gas nyamoq nyang kuot dah ma gis muhzoh yah mhont zis xauh das. Hauh monh loh cho lhyi hank ma yoh no nhang, ge.