11
Mangso Dius jens lyis Jyet
1 Yhensain taiq,Ref 11.1: Dyu 4.22; Mat 2.15
Israel loshang nghuot yoq lyis ngos nyang lyis jyetdap las
ngah loloeu khyvlyis nyang lyis Egutu masyah khi yoeus.
2 Nghuot laus eq ngos nyang lyis zes lui zes
ngah jyank masyah nungs phuk loh.
Ngah dius jens Bala lyis phudyei las,
nyamoq gas phvra jens lyis xangh ngheq dyei.
3 Nghuot laus eq ngos gas Israel lyis cho suh jyauh soeu nghuot las
ngah dius lyis loqyom mas po khoq.
Nghuot laus eq ngos nyamoq lyis loqzamh zwi zis nyamoq ma seq.
4 Ngos nyamoq lyis jyetdap sainhnos shvnanh khying yah lang.
Ngos nyamoq lyis bvlot changh tanh shoq kui po.
Ngos gop las nyamoq lyis tsoh.
5 Nyamoq ngah jyank pheh tauh los das zis ngoek, housoeh las nyamoq Egutu pheh tauh e chah. Housoeh Asiria gas nyamoq lyis guon das.
6 Jeszan cho ka nyamoq dah wus jens chank shenh loh das las wus khomh lyis tsain khyauh das. Houka nyamoq nyang nghamh zis gis thank ge kuot yvmvyah ngah dius jens lyis mhont das.
7 Nyamoq ngah jyank masyah nungs tungh phuk loh. Nyamoq thoq mas dah tanzoe gvng mas nyamoq kaiq ngaus das laus eq, nyamoq lyis hauh zis hank ma toeu tyamp dyei das.
8 Israel eh, ngos nvng lyis khasoeh yoh tyamp toh das?Ref 11.8: Lyi 29.23
Ngos nvng lyis khasoeh yoh doeuh tyamp das?
Ngos nvng lyis Adma wus lyis teh,
nghuot ya Zeboim wus lyis teh khasoeh yoh mhont das?
Ngos namoq lyis jyet cho ka goeng las
ngah ehnyet gas ngos lyis housoeh ma kuot nhang das.
9 Ngos nhaiqyo zis yah namoq lyis ma joeng das.
Ngos Israel lyis ma doms mhont lo das.
Khasoeh ge lyis ngos gas diuslaiq dius ma nghuot, Mangso dvnghuot.
Ngos Gyingshang soeu ka namoq yah nghuot.
Ngos nhaiqyo zis yah namoq jyank mas ma los das.
10 Ngos ngah dius jens lyis khangkhyi soeh nyings lyis, nyamoq ngah thang mha chank das. Nyamoq buiswvng pheh yah ngah jyank lvnyap los das.
11 Nyamoq gas Egutu masyah nghoq teh, Asiria mau masyah khotjyauh teh dang jweh los das. Ngos nyamoq lyis nyamoq yhen mas doms shwih los das. Ngos Yhensain taiq goeus.
Dang thang thyet
12 Yhensain taiq, Israel jens gas hwah las, mhuih zis yah ngos lyis lhaink toh. Yuda jens ngos, wontang lha gyingshang dah Mangso lhyi tyi lha gomloeus toq nyeis shih.