HOSEA SAUHBUK
(HOSEA)
1
1 Heika Yuda hwankti jens Uzia, Yotham, Ahaz yahge Hezekia moq yahge Israel hwankti Yehoash lo Yeroboam zaih lyis, Yhensain ka Beri lo Hosea lyis dyei dah loeus nghuot.Ref 1.1: 2Hw 14.23—15.7, 15.32—16.20, 18.1—20.21; 2Ss 26.1—27.8, 28.1—32.33
Hosea dah Lo Mebih
2 Yhensain Israel lyis Hosea lyis yah cangxeih taiq lyis, nyang Hosea lyis taiq, Nvng nyi loh hwank aq; nah yhensain nyhiq lom ma luk das, nah lo jens eq nyang teh nghuot das. Houyah dvyhangteh ngah dius jens eq ngos lyis tyamp las lom ma luk bang bweh los, ge.
3 Housoeh las Hosea gas Diblaim dah lonyi Goma lyis nyihwank yoeus. Nyah zomh dah loloeu loxeih khoeu thang lhyi,
4 Yhensain ka Hosea lyis taiq, Nyang lyis Yezrel nyhink aq: khasoeh ge lyis ma nyangh lyis ngos Israel hwankti dah phauh thyeih Yehu ka Yezrel mas dius sat yobos gvng mas Israel hwankti lhyi joeng das. Ngos Yehu dah hwankti dius caiq thank nhang das.Ref 1.4: 2Hw 10.11
5 Hauh shishenh jweh lyis ngos Yezrel langhkhau mha Israel dah jes yomsoq lyis mhont das, ge.
6 Gomer loshang aiq vyuk yoh, haq lhain ka nyelo nghuot. Yhensain Hosea lyis taiq, Nyang lyis Ma jyet oen nyhink aq: khasoeh ge lyis ngos Israel dius lyis jyet cho ma chixoeuq lo das, nyamoq lyis yobos ma khyuot dyei lo.
7 Nghuot laus eq ngos Yuda dius jens lyis jyet cho chixoeuq das. Ngos Yhensain, nyamoq dah Mangso nyamoq lyis khyuot yoeus das. Nghuot laus eq moengsa, lyei yah nyo yah, nyang jens, nyang ji bang dah jeszan zis yah ma kuot das.
8 Gomer nyah lonyi lyis nauh kangh thang lhyi nyang loshang gungs lyis doms chi lha gohtoeu yukgis lo dvyuk yoh.
9 Yhensain Hosea lyis taiq, Nyang lyis Ngah dius ma nghuot, oen nyhink aq: khasoeh ge lyis Israel dius jens gas ngah dius ma nghuot, ngos eq nyamoq dah Mangso ma nghuot, ge.
Israel Doms Toeu zis Xauh
10 Israel dius jens gas ma yoh suon, ma yoh laiq dah thomh mas sihsho teh bweh das. Gvshih Mangso nyamoq lyis taiq, Namoq gas ngah dius ma nghuot, ge laus eq nyang nyamoq lyis, Namoq gas dwis nyeis Mangso dah lo jens nghuot ge nyamoq lyis taiq das buisnyeis jweh los.Ref 1.10: Rom 9.26
11 Yuda dius jens yahge Israel dius jens doms xonh das. Nyamoq gas nyamoq xiklyis uhshe soeu dvyuk kyingh lyis khyen das. Nyamoq gas nyamoq mau mas dvlhain doms kuh los las nyeisgis das. Nghuot goeus, Yezrel buisnyeis gas buisnyeis zainsmuh nghuot das.