3
Habakuk Dung Dang
1 Heika lvpe Habakuk dah shvmanh dung dang nghuot.note 3.1 Hebre mas ma bvng.
2 Yhensain eh, ngos nvng cha kuot khoq yvlyis xauhgyo goeus las
gyuk zis yah dyingh joq.
Gvshih ngamoq dah shishenh lyis eq,
nvng gyangh kuot dah kuhxing muhzoh doms kuot aq.
Nvng nhaiqyo uhlyis yangh nhaiqnyen aq.
3 Mangso ka Edom masyah doms los nyeis;
Gyingshang Mangso ka Paran jing jens masyah los.
Nyah yunghshop phunk nyoqnho ngelang gas maukhung lhyi nghop las,
nyeisjvng gas nyang lyis chungh cho yah dyingh joq. (Selah)
4 Nyang gas bvng dah maunyoq nyik zis yah los;
nyah yomsoq lyis bvng zis yah gos toh.
5 Nyang nyah xik mas noslom nhang lha,
shei cho ka nyah thang mha chank los nhang.
6 Nyang yap lyis nyeisjvng gas nonh;
Nyang yoeuh kat lyis dius nyau jens nvn nyeis.
Vcaiq vto boms jens gas dyis loh;
gohlhain nyang suh las
vjangh joq dah jing jens gyop loh.
7 Ngos Khushan dius jens gyuk nyeis zis eq,
Midian dius jens nvn nyeis zis eq nyvng.
8 Yhensain eh, nvng lyis nhaiqyo nhang zis
jeislvng jens nghuot lhyeh?
Nvng lyis nhaiqlom tsoeu nhang zis thomh nghuot lhyeh?
Nvng gas jyommauh mas ji.
Nvng nah dius jens jyank mas ung cho chi los uhlyis
lyeisjyang jyommauh gas nah jeslhyingh nghuot.
9 Nvng nah lyei yhung das zis cicont kuot:
Nah nyo baiq das zis cicont kuot.note 3.9 Hebre mas ma bvng.
Nah maunyoq gas nyeisjvng lyis gwi loh nhang. (Selah)
10 Boms jens gas nvng lyis nyvng lyis gyuk nvn.
Jeis gas maukhung mhayah huot khyoq.
Nyeiskhau mha dah jeis nyings nyeis.
Nyamoq dah jeisphauq gas nyhang doq los.
11 Nah nyo dyvm zis yvng las bvng,
nah lham ying ying nghuot las buis yahge
lhamhmuh gas tsain no yap joq.
12 Nvng gas nhaiqyo zis yah nyeisjvng cho, jens lai loh;
Nvng nhaiqlom tsoeu zis yah
dius nyau jens lyis nang nheh.
13 Nvng nah dius jens yahge
nvng khyen toh hwankti lhyi khyuot das zis thuq loh.
Nvng Lhung bang dah uhjyung lhyi
thungh thyi lha nyah thang chank bang lyis shank shoq mhont tyamp.note 3.13 Hebre mas ma bvng. (Selah)
14 Nah nyo jens gas nyah jesphung dah
zau lyis baiq kyank tyamp.
Nyah jesphung ka ngamoq lyis khat sanh das,
nyungs bang lyis gauh zaiq bang teh,
nyhau das ge, lyeismuh jyang teh los.
15 Nvng thomh mas nah nyang yah nang thyi loh lyis
than dah jeisphauq mas nyop thuq.
16 Ngos haih zis dvnganh xauhgyo lyis ngos nvn nyeis.
Gyuk las ngah nhuotkuk loek loek ko nyeis.
Gungs eq nhuk gyoh las
Ngamoq lyis zan bang lyis
Mangso joeng das shishenh jweh das yvlyis
ngos tsoek yah langh nyeis das.
17 Maiphang zains vshih ma shih,
zvbiq nwis mas zvbiq shih ma dap,
tsanlun shih ma shih,
yos mas eq jyo ma thuq;
Yvng eq dvnganh shei lha
noeu zungs eq vkom dvnghuot laus eq,
18 Ngos gas gauslaus zis yah gaus nyeis shih das,
khasoeh ge lyis Yhensain Mangso ka
ngah khyuot yoeus soeu nghuot.
19 Yomzains Yhensain ka ngos lyis yomdyei.Ref 3.19: 2Sa 22.34; Chd 18.33
Nyang ngah khyei lhyi cvt khyei teh kuot las,
ngos lyis boms jens thoq mas jesluiq zis yah toh.