11
Lomsjingh Zis
1 Lomsjingh ge zis gas yang nghamhloms dah vyhang ka jyoengh bweh das ge cho lhyi nghamhnywe nyeis las ma nyvng dah vyhang ka jyoengh joq oen seqgyo las lhom yoeus yvlyis ge.
2 Gohlhain dah dius jens gas nyamoq dah lomsjingh cho gvng mas Mangso yah gausyis lhom yoeus cho lhyi xauh yoeus.
3 Ma yoh nyvng dah vyhang mhayah yoh nyvng dah vyhang bweh los das xiklyis Mangso dah dang yah hai dwis ya dwis yvlyis gvnkhanh toh goeus cho yang yoh seq zis gas hau lomsjingh gvng mas nghuot.Ref 11.3: Vpm 1.1; Chd 33.6, 9; Yoh 1.3
4 Lomsjingh zis yah Abel gas Ka-in dah lomhxangh thoq lyis zes gis dah lomhxangh lainh goeus. Mangso ka nyah lomsjingh cho lhyi yoeuh las nyang lyis dan soeu ge lhom yoeus zis xauh goeus. Khasoeh ge lyis nyang lomhxangh lainh dah jyungshuk lyis Mangso nyang nhaiqdoeus dyei goeus yvmvyah nghuot. Abel shei goeus laus eq nyang lomsjingh gvng mas gvshih jweh shoq nyang dang taiq nyeis shih.Ref 11.4: Vpm 4.3-10
5 Lomsjingh gvng mas Enok gas ma shei shei Mangso yah thot yoeus loh zis xauh. Nyang lyis Mangso yah thot yoeus loh goeus las nyang lyis hank eq xo ma nyvng lo. Mangso yah thot yoeus zis ma xauh shih lyis, Enok gas Mangso dah nhaiqdoeus soeu nghuot, ge Jyomp maussauh mas taiq toh.Ref 11.5: Vpm 5.21-24 (LXX)
6 Lomsjingh zis ma bos lyis gas hank eq Mangso lhyi nhaiq ma yoh doeus nhang. Khasoeh ge lyis Mangso jyank mas los soeu hank laus eq Mangso nyeis zis yahge nyang lyis chank xo bang lyis jyehjuh dyei nyeis oen yvlyis lomsjingh soeu nghuot chah das.
7 Jweh los das shishenh lyis bweh das cho ma nyvng shih dah vyhang yah sen lha Mangso zaih nhang yvlyis Noa xauhgyo zis gas nyang lomsjingh gvng mas nghuot. Nyang gas Mangso dah dang lyis domsyos gyo zis yah sangpho dvlom tsuk las nyang yahge nyah yhenbang gas khyuot yoeus zis tsain xauh goeus. Housoeh las mungkvn lyis nyang dang thang thyet las, Noa gas lomsjingh zis yah sen, dan cho dah vso vlho kham yoeus zis nghuot.Ref 11.7: Vpm 6.13-22
8 Abraham gas Mangso nyang lyis dyei das ge dangthoengh toh mau pheh thuq loh das xiklyis lomsjingh cho ka nyang lyis domsyos gyo nhang. Housoeh las nyang khapheh loh nyeis zis nyang ma seq laus eq nyah mau masyah thuq gyoh loh.Ref 11.8: Vpm 12.1-5
9 Mangso dangthoengh toh dah mau mas nyang gas boenghwus teh lomsjingh zis yah nyeis yenh. Nyang gas Mangso jyank masyah nyang teh dangthoengh vso vlho chomp kham yoeus dah Isak yahge Yakop teh muga zvng mas nyeis.Ref 11.9: Vpm 35.27
10 Khasoeh ge lyis Abraham gas Mangso yah vzwvng kuot las goeng toenk dah vpom yah tsuk toh goeus dah wus lyis nghamhloms las langh nyeis.
11 Abraham gas mang goeus, Sara nyang eq nyenhkyi lai goeus las lo ma gis yoh lo. Nghuot laus eq Abraham gas lomsjingh zis yah uwus bweh loh goeus. Mangso ka nyang dangthoengh toh zis yah dvyhangteh wontang dah Yhensain nghuot yvlyis Abraham loms.Ref 11.11: Vpm 18.11-14, 21.2
12 Abraham gas jyoengh shei goeus yukgis teh nghuot joq laus eq, nyang dvyuk masyah jebais los dah lo jens gas maukhung mha dah kyi jens yahge nvmukdra yvm mas ma thoq suon lo dah sihsho teh nyo dah lo jens nyeis dyos los.Ref 11.12: Vpm 15.5, 22.17, 32.12
13 Haih bang dvnganh gas lomsjingh yvmas shei loh goeus. nyamoq gas Mangso dyei toh dah dangthoengh yah sen dah vso vlho ma xauh lhom yoeus. Nghuot laus eq hauh yvlyis we masyah nyvng kat zis yah lhom yoeus. nyamoq gas hai nyeisjvng thoq mas lvbaus yahge boengh dvtsain duot yvlyis rhen yoeus.Ref 11.13: Vpm 23.4; 1Ss 29.15; Chd 39.12
14 Housoeh teh cho lhyi tsain taiq bang gas nyamoq nyang nyeis das nyhenshang munghdan dvkoeuq xo nyeis zis gas dede nghuot.
15 nyamoq thuq khoq mau cho lhyi nghamh suon yoeuh las soh nyeis zis ma nghuot. Hauh mau mas tauh loh mes lyis yoh loh das toeuh yoh toh.
16 Gvshih gas hauh thoq lyis zes dah maukhung mha dah munghdan lyis soh nyeis. Housoeh yvmvyah Mangso ka nyamoq dah Mangso oen das yvlyis xoq
zis ma nghuot. Khasoeh ge lyis Mangso ka nyamoq xiklyis nyeis das joqyos dvkoeuq sont toh dyei.
17 Abraham gas Mangso shi yoeuh zis xauh uhlyis, Lomsjingh zis yah lo Isak lyis phudyei jyungshuk kuot las phudyei. Abraham gas Mangso jyank masyah dangthoengh kham yoeus soeu nghuot laus eq nyang gas nyah loteh lyis lomhxangh kuot las phudyei das zis
gaunyhauq nghuot.Ref 11.17: Vpm 22.1-14
18 Mangso ka Abraham lyis, Ngos nvng lyis dangthoengh toh dah vnyau vshih gas Isak masyah gyoh das, ge.Ref 11.18: Vpm 21.12
19 Isak lyis shei masyah Mangso yoh dwis toq kat ge Abraham nghamh suon zis yah dvyhangteh jyoengh Abraham gas Isak lyis, shei masyah doms xauh yoeus.
20 Lomsjingh zis yah Isak gas jweh los das shishenh lyis xauh kham yoeus das shvmanh jyehjuh yah sen lha Yakop yahge Esau lyis dangthoengh dyei.Ref 11.20: Vpm 27.27-29, 39-40
21 Lomsjingh zis yah Yakop gas nyang shei yeis lyis Yosep dah lotang lhyi shvmanh dyei las, nyah lhamloq thyoh mas nges las Mangso lhyi paiq.Ref 11.21: Vpm 47.31 (LXX), 48.1-20
22 Lomsjingh zis yah Yosep gas nyang shei das shishenh ni los lyis Israel jens Egutu mau masyah luiq thuq los das cho taiq kyingh toh las, nyah shohyau lyis khasoeh kuot das cho shet toh dang dyei toh.Ref 11.22: Vpm 50.24-25; Dyu 13.19
23 Lomsjingh zis yah Moshe dah nyhiphoq gas Moshe khoeu los thang lhyi lhamhmuh somh khyvp top nyang lyis shung toh: Moshe ka svsoh yungh dah loshang nghuot yvlyis nyah zomh nyvng las hwankti dah zau dang lyis lhyweq das zis ma gyuk.Ref 11.23: Dyu 2.2, 1.22
24 Moshe ka kuh los lyis, lomsjingh zis yah Pharao lonyi dah lo ge das yvlyis he tyamp.Ref 11.24: Dyu 2.10-12
25 Nyang gas dvyoq kyingh yaunos dah pyo cho mha pyo das thoq lyis, Mangso dah dius nyau yah dvgeh shohjyen xauh das yvlyis zes o.
26 Nyang Meshia xiklyis jwangh nyhap xauh zis gas Egutu munghdan dah zisyos dvnganh thoq lyis zes gis ge nghamh. Khasoeh ge lyis nyang gas jweh los das shishenh lyis doms xauh yoeus das phauh shangh jyungshuk lyis yoeuh tsuk toh.
27 Lomsjingh zis yah Moshe ka hwankti dah nhaiqlom dyis yvlyis ma gyuk, Egutu mau masyah thuq khoq. Nyang gas nyoq yah ma yoh nyvng dah Mangso lhyi yoh nyvng teh Egutu mau pheh tauh loh das zis he tyamp.
28 Nyang gas lomsjingh zis yah lomons jens lyis sat dah loeuswons soeu ka Israel Vnyau dah lomons jens lyis ma sat bas jungh, Lhuiq Kat Pwe xi kuot las yvng suih lyis khomh mas sanh gyuon das cho taiq toh.Ref 11.28: Dyu 12.21-30
29 Lomsjingh zis yah Israel jens gas tung yos mas teh Thomh Nes lyis yoh tsain goeu lai los. Egutu dius jens eq housoeh goeu yoeuh lyis tsain nyop shei zis dvxauh.Ref 11.29: Dyu 14.21-31
30 Lomsjingh zis yah Israel jens gas nyhet nyeih top Yerikho wus lyis dye suh lhaink lyis, hauh wusciank lyis yoh gyop gyoh nhang.Ref 11.30: Yosh 6.12-21
31 Lomsjingh zis yah nghe nyhiq Rahab gas Israel jens dah joh yoeuh bang lyis dyenschangh khyvlyis lhom yoeus yvmvyah Mangso lhyi domsyos ma gyo bang yah dvgeh sat zis ma xauh.Ref 11.31: Yosh 2.1-21, 6.22-25
32 Ngos tsoq taiq chah shih lah? Gideon, Barak, Samson, Yeptha, Dawi, Samuel yahge lvpe jens dah cho taiq das ge lyis ngah shishenh mathoq luk.Ref 11.32: Soe 6.11—8.32, 4.6—5.31, 13.2—16.31, 11.1—12.7; 1Sa 16.1—1Hw 2.11; 1Sa 1.1—25.1
33 Hauh bang gas lomsjingh gvng mas svbih munghdan lyis yoh zan ung. Nyamoq gas dan cho lhyi chank kuot las Mangso dangthoengh dyei toh cho lhyi xauh kham yoeus. Khangkhyi jens dah nhuot lyis yoh cheiq toh.Ref 11.33: Dan 6.1-27
34 Nyilhyam lhyi yoh sat, moengsa thyoh masyah yoh phang luiq, nyamoq yomnhuk laus eq yombos nhang zis xauh yvmvyah moengzan yvmas lyes las lvbaus dah jesphung lhyi yoh zan shuq tyamp.Ref 11.34: Dan 3.1-30
35 Vmesbih jens eq lomsjingh zis yah shei goeus dah nyamoq buisnoms jens lyis kang doms dwis nhang zis tsain xauh.Ref 11.35: 1Hw 17.17-24; 2Hw 4.25-37
Dvyhamh gas nyamoq lyis lhuiq kat das ge dah toeuh lyis ma lhom yoeus, zes phauh thank dah kang dwis cho pheh dwis toq das xiklyis shoeuhshih zis tsain kham.
36 Tsai dvyhamh gas, jwangh las lyuk thoq lyis magoh, twih las thung lhunk zis tsain xauh.Ref 11.36: 1Hw 22.26-27; 2Ss 18.25-26; Yer 20.2, 37.15, 38.6
37 nyamoq gas luk yah doeuh sat, kywizoe yah vchink chink kywi sat, moengsa yah jap sat zis tsain xauh. Vshoh vjyen shoeuhshih, yhenh zis tsain xauh las yvng yeis shvbeq yeis khuk las tsain yenh.Ref 11.37: 2Ss 24.21
38 Nyamoq gas yaukyenh shanghsenh las khaugus xo bang teh mhanhdyvp mas, boms mas, lukkhyung mha, tsoh khyung mha tsain nyeis yenh. Mungkvn gas nyamoq yah ma mon.
39 Hauh dvnganh zis gas, nyamoq dah lomsjingh gvng mas chunghtoq zis xauh laus eq Mangso dangthoengh dyei toh jyehjuh lyis nyamoq ma xauh kham yoeus shih.
40 Khasoeh ge lyis Mangso ka yah xiklyis zes gis dah nghamh thyet cho toh dyei. Hau thyet toh cho ka yang yah dvgeh nghuot lyis nyamoq lomsjingh dah dyinghjet vkyuh lyis xauh yoeus das.