49
Yakop Dang Thang
Hauh thang lhyi Yakop nyah loloeu jens lyis khi tsainh toh las taiq zis gas, Heimha ywi huom geh, ngos namoq lyis thang pheh cha bweh los das cho tsain taiq bah, ge.
Yakop loloeu jens eh,
los huom lha gyo yoeus geh,
Namoq uwus Yakop dah dang gyo yoeus geh.
Ruben eh, nvng ngah loxeih nghuot,
ngah phunk, ngah yom monh nyoqnho ngelang yahge
yomzains soq zains nvng nghuot.
Nvng gas guons dah jeis baus teh nghuot laus eq
nvng ma yoh zes.
Nvng nah uwus jung mas doq las
hauh yvlyis vwot v-oeu kuot -
nvng ngah jung mas doq nyvng.
Simon yahge Lewi vmang vwik,
nyah zomh dah moengsa ma gis ma shop jes tsain nghuot.
Ngos nyah zomh gauh xam yvmas ma bos;
nyah zomh huom mha ma wvng.
Nyah zomh nhaiqyo zis yah dius sat goeus.
Vsainnyang ehnyet chank las noeulu langhkhank-gyi thyet goeus.
Nyah zomh nhaiqyo zis than,
nyah zomh khonh changh yvmvyah
ngah nhoengh khonh zangh bas jungh.
Ngos nyah zomh lyis Yakop masyah kangh das,
ngos nyah zomh lyis Israel masyah sanh tyamp das.
Yuda eh, nah vmang vnoeuh moq
nvng lyis chungh lo das.
Nvng gas nvng lyis jes sont bang lyis ung das.
Nah uwus lo jens nah xikkhonh mas gop das.
Yuda gas khangkhyi lo teh nghuot:Ref 49.9: Gyu 24.9; Nyoq 5.5
Ngah lo eh, nvng dyvm nyhik zo masyah doq los los kuot:
Khangkhyi yahge khangkhyi zains teh
whop las lhom nyeis:
Nyang lyis hank womh zeh das lah.
10 Nyenstap Yhensain jweh las
dius nyau jens nyah dang gyo shoq
Yuda jyank mas hwankti dunghkuq,
nyah khyei jo mas guon dunghkuq ma gang loh das.
11 Nyang nyah mauhlyihzoe lyis
nyah zvbiq zains mas,
nyah mauhlyihzoe lo lyis
gis thank zvbiq nwis mas twih las,
nyah dyi zvbiq jeis mas,
nyah dyimis zvbiq shih jeis nes mas cheih das.
12 Nyah nyoqjeih zvbiq yah nes das,
nyah zwis eq noeu nauh yah thyoeu das.
 
13 Zebulun gas thomh yvm mas nyeis las sangpho goeukhanh duot das.
Nyah maukyo Sidon nvm mas jweh shoq dvm das.
 
14 Isakha ka nyangtu jo mas whop joq;
yombos dah mauhlyihzoe nghuot.
15 Nyang gas noyos gis dah
maunyeis gis lyis nyvng.
Nyang yvwons wons das ge
kvtoq kham lha tungh zwi khank chah dah jyeidwis duot das.
16 Dan gas, Israel mas dah
dvnyau soeh teh nyah dius jens lyis soetuon das.
17 Dan gas talhoeu mha lhangnyis,
choyvm mas ywimuhtsanh teh duot las,
nyang ji bang lyis dyetgyoh nhang das ge,
nyang dah khyeichuk mas chweh das.
18  Yhensain eh,
ngos nah khyuot yoeus cho langh nyeis.
19 Gad gas nyang lyis jesphung
tsain lhaink nyhamh toh laus eq
nyang nyamoq lyis yoh tauh zan das.
20 Nghamh dah zonoms gas
Asher masyah thuq las,
hwankti zo nghamh ja nyang dyei das.
21 Napthali gas kat kat goeus
cvtzains teh nghuot, Dang nauh chau.
22 Yosep gas vshih shih dah saiqko nghuot.
Jeis thuq dwang nvm mas vshih shih dah vko nghuot.
Ciank thoq mas mau toh.
23 Lyei baiq soeu nyang lyis hoeng lha
nyang lyis toeuq baiq las tsain shoeuhshih.
24 Nghuot laus eq nyah lyei gas yombos las
nyah loqyom tsain yangh zis gas,
Yakop dah Yomzains Mangso dah loq yah eq,
Yvng yoeuh soeu ge, Israel dah luk masyah eq,
nvng lyis pangh nyeis nah uwus dah Mangso yahge,
25 maukhung mha dah shvmanh jyehjuh,
nyeisjvng khau jeisnoq thomh mas dah shvmanh jyehjuh,
dyei nauh yahge ung dah
shvmanh jyehjuh gas nvng lyis
shvmanh dyei das Yomzains masyah eq nghuot.
26 Nah phauh thyeih moq
dyei dah shvmanh jyehjuh gas,
vcaiq vto boms jens thoq lyis eq,
vcaiq caiq joq jing cauh jens mas
yoeuh o phoh vyhang thoq lyis eq zes.
Hauh jyehjuh gas Yosep dah
uhloms thoq mas,
nyah vmang vnoeuh moq mas dah
zau thoq mas joq lo das.
27 Benyamin gas lhuot zo dah cauhpau nghuot: Nvp lyis khat shoh zo, nyenh lyis yoh los lvnyhvp gvm das, ge taiq.
28 Hai dvnganh gas Israel vnyau dvci aiq nyau nghuot. Haih dang eq nyamoq dah uwus nyamoq lyis taiq las shvmanh dyei zis nghuot. Nyang yuk nyang toeu yoh vvng dah jyehjuh yah dvyhangteh nyamoq lyis shvmanh dyei.
Yakop Shei lha Nyhop
29 Hauh thang lhyi nyang gas nyamoq lyis, ngos gas ngah vnyau huom nyeis yvmas loh lo das; housoeh las ngos lyis Hiti dius Ephron pa mha dah lukkhyung, ngah phauh thyeih moq yah dvgeh nyhop geh. 30 Khanan mau Mamre xik Makpela pa mha joq hauh lukkhyung lhyi Abraham, nyang sain toh das nyhenshang lop-yos lyis, hauh jangpa yah dvgeh Hiti dius Ephron jyank masyah wis toh.Ref 49.30: Vpm 23.3-20 31 Houmha Abraham yahge nyah yhensain nyhiq Sara lyis nyhop. Isak yahge nyah yhensain nyhiq Rebeka lyis eq houmha nyhop. Ngos Lea lyis eq houmha nyhop.Ref 49.31: Vpm 25.9-10, 35.29 32 Houka Hiti lo jens jyank masyah wis yoeus dah pa yahge houmha bos dah lukkhyung nghuot, ge tyeh taiq kyingh toh. 33 Yakop gas nyah loloeu jens lyis jyuk yang dye taiq goeus ya, nyah khyei jung mas she yoeus zis yah soq dom las nyah vnyau huom nyeis yvmas jweh loh.Ref 49.33: Lgy 7.15